Read Kapampangan Wisdom 19 Bible Online

Wisdom 19 - Kapampangan bible

Wisdom 19

¹Oneng alang tuknang dang panamdaman ding taung e mayap ing alang lunus mung mua, uling balu mu na ing daptan da bayu ra depatan.

²Balu mu king peintulutan da lang meko malalagua ding kekang memalen, oneng kaybat tegal da la.

³Kabang malungkut la ding tau Ehipto karing kutkutan da ring mal king bie ra, inari da king lub da ing tagalan da la ring Israelita a ngeni tinuring dang tatakas.

⁴Ing kapahamakan a mangaintulid karela ya ing mitulak karela ban daptan da ita. Akalinguan da iting milyari ban maging ganap ing parusa karela.

⁵Atagpuan da ing alang kalupang kamatayan kabang susundu da ring kekang memalen ing makapagmulalang pamaglakbe ra.

⁶Mibayu ya itsura ing meto sikluban king uli na ning kekang utus ban e la numanu balang ding kekang memalen.

⁷Lilungan ne ning anino ning biga ing karelang kampu, misagsag ing danum, at linto ing malanging gabun. Linto ya ing metung a kapatagan a ating berding dikut libutad ning Dagat a Malutu ban mayan lang makadalakit.

⁸Mekadalakit la ding kekang memalen a kekang ingatan kaybat dang ikit ing milagrung kekang depat.

⁹Anti la karing kabayung atyu karing madikut a pastulan; mengari lang tupang lulundag king tula at pupuri la keka, O Ginu, uling linigtas mu la.

¹⁰Agaganaka ra ing delanan dang bie inyang ipus la king bansang likuan da; linto la king gabun ding niknik lugal king lunto la ding baka, at linto la ding tugak lugal king lunto la ding asan.

¹¹Kaybat na nita, inyang buri da ing maniaman a pamangan ban uluan ing danup da, ikit da la ring aliwang ayup a kanita da pa ikit.

¹²Linto lang ibat king sumangid ning dagat ding dakal a pugu.

¹³Oneng mirinan lang babala ding taung e mayap tungkul king dugpang parusa karela. Karapatdapat mu ing parusan la uli na ning e ustung depat da. Sobra ing sama ra karing mekipamalen karela.

¹⁴Ating bansang e tinanggap karing taung ibat karing aliwang bansa, oneng maygit lang e mayap deti. Inipus da la ring bisita dang sinaup karela.

¹⁵Miparusan ya ing isanu mang bansang e bisang tanggap karing dayuan.

¹⁶Oneng deting tau tinggap da la at pigpiestan da la at tinggap kalupa da, at kaybat pepasakitan da lang mitmung bigsikan.

¹⁷Mebulag la naman a kalupa da retang taung minta king pasbul nang Lot. Kakapkapan da ing karelang daralanan inyang meging madalumdum ing makapaligid karela.

¹⁸Milibe-libe la ding bage elemento, kalupa ning mibabayu ya sunis ing alpa agyang e ya mibayu ing nota ding kwerdas na. Iti malino mayayakit karing bage mangapalyari.

¹⁹Ding animal a manuknangan king bansa maging animal na la ning danuman, at ding king danuman sasaka la king gabun.

²⁰Mitatau ing api agyang king danum at mewala ing upaya na ning danum a patdan ing api.

²¹Makanyan man e na asilab ning api agyang ing mayan masilab a milapit o alaso ing pamangan ibat banua a karaniwan malalaso antimo ing yelu.

²²Ginu, king heganaganang bage gewa mu lang maragul at marangal ding kekang memalen. E mo bitasang pepaburen nu mang lugal ampon panaun.