Read Kapampangan Wisdom 2 Bible Online

Wisdom 2 - Kapampangan bible

Wisdom 2

¹Magkamali la deng taung e mayap neng sasabian da king sarili da: Makuyad mu ing bie mi at mitmu yang kaguluan, at e mu apangilagan ing paniatang ning kawakasan ning tau. Ala pang mete a migbalik mabie ibat king kutkutan na.

²Mipaintagun mu ing mibait tamu at kaybat na nita lumbug tamung balamu e tamu bitasang linto. Mengari mung asuk ing pangisnawa tamu at ing pamisip tamu anti ya mu king tilamsik ning titibuk tamung pusu.

³At potang tuknang neng titibuk, muli ne kanita king gabun ing katawan tamu at miyabe king angin ing pangisnawa tamu.

⁴King katataulian, makalinguan la ding lagyu tamu; ala nang makaganaka pa karing depat tamu. Mawala anti ing lalabas a biga ing bie tamu, at lumbug anti ing ulap king pali ning aldo.

⁵Anti ya king lalabas a anino ing bie tamu at alang makapigil king oras ning kekatamung kamatayan. Mitakda na iti at ala nang makapagbalik pa.

⁶Ngara pa ding taung e mayap: Uli na niti, tara magpakasawa tamu king sablang mayap a bage at mibiebie keti king yatu antimo kanitang kayanakan tamu.

⁷Minum tamu king mal diling alak at gamitan ing mal diling pabanglu, at samantalanan la ding bulaklak king panaun ning karelang pamaniampaga.

⁸Agtalan ta na la ding rosas kabang sagiwa la at gawan lang palamuti king buntuk tamu.

⁹Tara, miyabe-abe tamu king pamagsaya at king balang lugal milakuan tamung bakas ning tula tamu, uling mangaintulid iti kekatamu at makanyan ing bie.

¹⁰Gipitan ta la ding pakakalulu agyang matulid la pamibiebie. Samantalanan ta la ding babaing mebalu at e ta la sukat gagalangan ding makatua.

¹¹Ing gawan tamung kautusan ya ing sikanan tamu uling ala tamung akua king pamaging maina.

¹²Sabatan ta la deng taung matulid uling sagabal la mu kekatamu. Laban la king sablang daraptan tamu; sasabian da king lalabag tamu karing Kautusan at karing kaugalian tamu.

¹³Sasabian da king balu re ing Dios at sasabian da naman king anak na la ning Ginu.

¹⁴Sagabal la kekatamu deng taung makanyan; laban la king kekatamung isipan at daraptan.

¹⁵Masora ka kabud akit mu la uling makayaliwa la ugali.

¹⁶Mababa ing lawe da kekatamu at anti tamung dinat a pangilagan da. Pagmaragul dang sasabian king ing Dios ya ing karelang Ibpa, at sasabian da pa king ligaya ing kamtan ding makatuliran paniatang ning kawakasan.

¹⁷Lawan tamu nung tutu pin! Lawan tamu ing mapalyari karela potang mate na la.

¹⁸Nung anak no pin ning Dios ding taung matulid, saupan na la at iligtas karing kalaban da.

¹⁹Inya subukan ta la at panasakitan. Akit tamu kanita nung nu angga ing karelang kapibabatan.

²⁰Ibili ta la king kamatayan a makarine uling sasabian da king iligtas na la ning Dios.

²¹Makanyan lang mipagsalita deng taung e mayap, mu pin magkamali la. Mabubulag la king dapat dang e ustu.

²²E da la balu ding malalam nang lihim ning Dios; e da la aisip ding galal ning kabanalan at ning bie alang kapintasan.

²³Inyang lelangan na katamu ning Dios e na kapagnasan ing mate tamu; lelang na katamung kalupa nang alang kamatayan.

²⁴Ing diria ning diablo ya ing makipasari king paniatang ning kamatayan king yatu, at detang maka-diablo ila ding mate.