Read Kapampangan Wisdom 3 Bible Online

Wisdom 3 - Kapampangan bible

Wisdom 3

¹Atyu la king gamat na ning Dios ding taung matulid at e na paintulut ing dumalan lang kasakitan.

²Bala da reng mangmang king mete la deng taung matulid at king ing kamatayan da metung yang kapahamakan.

³Wa, lakuan da katamu, oneng iti e kapahamakan. King kamatutuanan atyu la king kapayapan ding taung matulid.

⁴Mapalyaring magdusa la king akakit da ring tau, oneng atin lang matibe kapanayan king bie alang angga.

⁵At kaybat ning makuyad dang kasakitan, tanggap lang maragul a kaligayan uling mesubuk la king Dios at meyakit lang tapat.

⁶Wa, sibukan na lang anti ing gintu king aping paglaso at metanggap lang anting ain-a-durulukan.

⁷Potang datang ne ing Dios ban dinan lang galal ding taung matulid sunlag lang maslag anti ding batuin neng benging madalumdum.

⁸Ila ding manimuna karing bansa at karing tau, at ing Ginu ya ing karelang maging Ari king kapilan pa man.

⁹Kamtan da ring manalig king Ginu ing tune beluan tungkul karing paralan na. Detang menatiling tapat mibiebie lang kayabe na king lugud uling maganaka ya at malunusan karing pinili na.

¹⁰Oneng tanggap lang parusa ding taung e mayap, ing parusang karapatdapat uli na ning e ustung kaisipan at uling linaban la king Ginu at e ra ginalang ing hustisia.

¹¹Makalunus ing kararasan na ning taung alang pansin king kabiasnan at king pamagaral. Ala yang asahan; alang ulaga ing dapat na at ala yang arapat nanumang makabaldugan.

¹²E me apanaligan ing maging asawa na at e la maging mayap ding anak na.

¹³Mibili la king sumpa ding maging lahi na. Mapalad ya ing babaing e bitasang mikayanak, nung e ya mikasala king pamakipangatawan king e na asawa. Tanggap yang galal king Dios paniatang ning Aldo ning Pamanukum.

¹⁴Mapalad ya naman ing lalaking kapun a e linabag king Kautusan at e misinup paginakit laban king Ginu. Tanggap yang galal uli na ning katapatan na. Midinan yang makapasubaling galal a maygit karetang mikayanak. Mirinan yang lugal king Templo ning Ginu king banua.

¹⁵Ing matulid a dapat kalupa ne ing tanaman a dakal a bungang maniaman. Ing kabiasnan kalupa ne ing uyat a mabie at parating manyuli.

¹⁶Oneng e la maglambat ding anak a bunga na ning pamakipangatawan o ning bawal a pamisiping; agad lang mate.

¹⁷Nung kumaba la man a bie, ita ala mu ring ulaga. Alang gumalang king karelang ketuan.

¹⁸At nung agad no mang mate, ala la mu ring kapanayan o kapasnawan king Aldo ning Pamanukum.

¹⁹Magdusa la ding anak a bunga na ning pamakipangatawan.