Read Kapampangan Wisdom 5 Bible Online

Wisdom 5 - Kapampangan bible

Wisdom 5

¹King aldong ita, talakad yang alang takut ing taung matulid arapan da ring menalipusta king bie na at pepayalang ulaga karing dapat na.

²Mangapamulala la at galgal king takut kabud akit de uling e ra abut isipan ing miligtas ya ing taung matulid.

³Sisian da kanita ing depat da; sabian da king metung at metung kabang sasaingsing la at singap-singap a pangisnawa:

⁴Iti ya ing taung gewa tamung pikaylian. Bala tamu ing sira ya buntuk; itamu pala ing sira buntuk! Bala tamu kamulangan ing ikit tamung bie na at e ta ya perangalan inyang mete ya.

⁵Ngeni metung ya karing binilang nang anak ning Dios at kayabe de ring banal.

⁶Itamu ing linisia king dalan ning katutuan. E tamu mibiebie king aslag ning katuliran; e tamu bitasang miyaslagan king sala na.

⁷Mas buri ta pa ing durut-durutan ta la ding mapaling disyerto kesa king dalanan ya ing dalan a tiru ning Ginu. Inya naman miras tamu king panganib at king kasiran.

⁸Iti ing meging bunga na ning kekatamung kapalaluan at pati na ing pagmaragul tamung pibandian a alang binungang mayap para kekatamu.

⁹Anti ing anino mewala ngan iti, anti king balita a kekang dimdam at kaybat kekang akalinguan.

¹⁰Anti ya king barku a maglayag a alang lalakuan a bakas king delanan nang dagat.

¹¹Susulapo ya king banua ing ayup, oneng ala kang akit a bakas na king delanan na. Susulapo yang mabilis king kapamilatan da ring pakpak nang babagse king angin, oneng ala yang lalakuan a bakas na king pamanyulapo na.

¹²Potang ibugnus ya ing paslu king pana at mikawani ing angin a dalanan na papunta king pupuntirya na, ala ka munamang akit a bakas na king delanan na.

¹³Makanyan munaman ing mapapalyari kekatamu. Mibait tamu at kaybat mate tamu. Ala tamung nanumang likuan a bakas ning kayapan. Ing kekatamung e ustung depat ya ing sinira kekatamu.

¹⁴Mengari ya ing kapanayan da ring taung e mayap king are a simbulat na ning bagyu o king bula ning danum a sepulan na ning alun o ning asuk a tatange na ning angin. Anti ya wari king taung dinalo metung mung aldo at kaybat meko ne.

¹⁵Oneng ding taung matulid mie la king kapilan pa man. Dinan na lang galal ning Ginu; ingatan na la ning Kakataskatasan.

¹⁶Dinan na lang maningning a korona at makislap a diadema. Ingatan na la karing takde na.

¹⁷Lusuban na la ding kalaban na angga king magisan la ngan at gamitan ne ing meto lelangan bilang sandata na ban parusan na la ding kalaban na.

¹⁸Ing katuliran ya ing baluti na at ing helmet na ya ing hustisia,

¹⁹at ing kabanalan ya ing kalasag na.

²⁰Itais na ing mua na ban gamitan anting tabak at pakiabayan ne ning puersa ning naturalesa ban labanan la ding mangmang a sasalangsang.

²¹Dugpa la ding mataram a kildap king pupuntiryan na, anti waring ing Ginu gewa neng pana ing makapal a biga at bubugnus na lang paslu na.

²²Pauran yang mangaragul a tipak a yelu karing kalaban na, sapulan na la ning masikan nang alun ning dagat, at panyud na la ning maragul a albug.

²³Ibalugse na la ning masikan a angin at mikalat lang anti ing are. Ing kaguluan ya ing sumira king yatu at mibagsak la ding kapamahalan uli na ning dapat dang e mayap.