Read Kapampangan Wisdom 6 Bible Online

Wisdom 6 - Kapampangan bible

Wisdom 6

¹Ikong sablang ari makiramdam kayu at paki-intindian iti; ikong sablang manimuna ning yatu, pakiramdaman yu ing sasabian ku.

²Makiramdam kayu, ikong pamuntuk ding dakal, ikong magmaragul king dakal kayu sasakupan.

³Ibat king Ginu ing kekong upaya; binie na ning Kakataskatasan ing kekong pamag-ari. Ya ing sumuri king kekong dapat at sumiasat king kekong pilubluban.

⁴Manungkulan kayu king uli na ning Dios at ning kayarian na. At nung ing kekayung pamanungkulan e makatuliran, nung e yu patupad ing kautusan, nung e kayu mibiebie agpang king kaburian ning Dios,

⁵kanita bigla yang datang at parusan na kayung alang kapara. Makatalaga ing mabagsik a kayatulan karetang tatalan upaya.

⁶Mapalyaring lunusan na la at patawaran ding taung karaniwan, oneng maging mabayat ing parusa da ring tatalan upaya.

⁷Uling e ya tatakut kenu man ing Ginu ding sabla, nu ya man iti karangal. Ya mismu ing maki kaburian, maging malati la o maragul a kabilian, paraparehu ing lawe na karela.

⁸Mu pin, maging maigpit ya pamanatul karing dapat da ring pamuntuk.

⁹O mayupayang ari, para kekayu ya iting susulat ku ban kanita mabiasa kayu at e kayu magkamali.

¹⁰Banal la deting bage at nung gamitan yu la king paralan a banal, maging banal kayu. Nung abalu yu la deting aral, malyari yung adipensa ing sarili yu king Aldo ning Pamanukum.

¹¹Uli na niti, pakamalan yu la at pakaingatan deting kanakung aral at lubus kayung mipabiasnan.

¹²Saslag yang maslag ing Kabiasnan at e ya kukupas kapilan man. Akit de retang malugud at manintun.

¹³Papakit yang agad karetang magnasang Kabiasnan.

¹⁴Migising kang maranun ban panintunan me at akit meng agad uling atyu manenaya arap mung pasbul.

¹⁵Mika Kabiasnan kang agad kabud pinsinan me. Nung panintunan me, mika kapanatagan ka pamisip

¹⁶uling panintunan na la detang karapatdapat, at akit na ka nu ka man karin. Maganaka ya at akayabe me king nanumang kekang isipan.

¹⁷Ing pamagumpisa na ning Kabiasnan ya ing tune kapagnasan a bisa kang mabiasa. Ing pamagnasa king Kabiasnan pamaglugud na king kabiasnan.

¹⁸Ing pamaglugud king Kabiasnan ya ing pamamintu karing kautusan; ing pamamintu karing kautusan na ya ing kasiguraduan king bie alang kapupusan.

¹⁹At ilapit na kang malapit king Dios ning bie alang kapupusan.

²⁰Isadia na ka ning pamagnasa king Kabiasnan para pamahalan ya ing metung a kayarian.

²¹Uli na niti, ikong mamahala karing bansa, nung paulagan yu lang tronu yu at setro, galangan yu ing Kabiasnan ban mag-ari kayung alang angga.

²²Sabian ku kekayu nung nanu ing Kabiasnan at nung makananu yang linto. Ala kung isalikut kekayu. Panuyatan ku ing pegumpisan na at iladlad ku karing sabla ing beluan. Ala kung lakton a dake ning katutuan.

²³Alang diria iting sabian ku uling e malyaring makapiyabe ing diria at ing Kabiasnan.

²⁴Atyu king keraklan da ring taung biasa ing dalan ning pangaligtas ning yatu, at ing biasang ari ya ing munie kapanatagan karing sasakupan na.

²⁵Uli na niti, magkapilit kayung abalu yu ing ituru ku kekayu at pakinabangnan yu iti.