Read Kapampangan Wisdom 7 Bible Online

Wisdom 7 - Kapampangan bible

Wisdom 7

¹Atin kung kamatayan anti ding aliwang tau. Ibat ku king minunang tau a megawa king gabun. Midinan kung laman king atian nang ima ku.

²Ibat ku king bini nang tata ku a mitanam king ebun nang ima ku king uli na ning malugud dang pamisiping. Kilub ding siam a bulan meubug ya ing katawan ku king uli na ning daya nang ima ku.

³Inyang mibait ku, mengisnawa ku naman king angin a pangisnawanan da ring tau. Kinera da ku king gabun a tatalpakan da at ing minunang meramdam kanaku ya naman ing kiak da ring sablang anak a mibabait.

⁴Milampinan ku at meingat.

⁵Makanyan la ngan megumpisa ding sablang ari.

⁶Metung ya mung dalan ing dalanan ding tau king paniatang da at metung ya naman potang mako la keting yatu.

⁷Uling balu ku king tau ku mu, menalangin ku at midinan kung beluan. Dinatang ya kanaku ing espiritu ning Kabiasnan.

⁸Maygit keng pepakamalan kesa king tronu at setro. E ne malyaring igitan ning isanu mang pibandian.

⁹Maygit ya king isanu mang mal a alahas; pati ing sablang gintu keti king mabilug a yatu mengari mung kasakmal a balas at ing pilak antimong pila.

¹⁰Pakamalan keng maygit king masikan a pamikakatawan ampon sintingan. Maslag ya at e ya bitasang kukupas at mas buri ke king isanu mang sala.

¹¹Inyang datang kanaku ing Kabiasnan, dinatang munaman kanaku ing sablang mayap a bage. Ya ing minie king alang kaparang pibandian.

¹²Masaya ku uling binie na ngan iti kanaku ning Kabiasnan. E ku kapilan man asahan king ing Kabiasnan ya pala ing panibatan na niti ngan.

¹³Taimtim keng buring abalu ing Kabiasnan. Ngeni matula keng idake karing aliwa ing abalu ku king Kabiasnan.

¹⁴Alang makagisan king pibandian ning Kabiasnan. Gamitan yu iting pibandian ning Kabiasnan at maging kakaluguran na kayu ning Dios. Ikatula na ing mabiasa kayu king tuturu na.

¹⁵Paintulut na sa ning Dios king ing pamisip ku maging karapatdapat ya king abalu ku king Kabiasnan, at magsalita ku agpang king kaburian na. Ing Dios ya ing patnube ning Kabiasnan at ya ing sasaup karing biasa.

¹⁶Makapailalam ta ngan king upaya na ning Dios, antimo ing sarili tamu, ding amanu tamu, ing sablang kekatamung beluan ampon kagiwan.

¹⁷Ya ing minie kanaku king tune beluan tungkul king upaya ning naturalesa, ing sangkap ning sablang makalto at ing kaayusan keti king yatu;

¹⁸nung makananu mung abalu ing oras mabalu ya king kapamilatan na ning kimut ning aldo at ding miyayaliwang panaun antimo ing kauran at kaleldo;

¹⁹ing kimut ding batuin at ing pamituki da ring bilang ding banua.

²⁰Abalu ku munaman king Kabiasnan ing kaniwan da ring aliwang mabibie lelangan, ing ugali da reng malyap a animal, ing sikanan na ning angin, ing pamisip ning tau, ding miyayaliwang tanaman, at ing pamanggamit karing yamut da bilang panulu king sakit.

²¹Abalu ku la ding bage pikabaluan na at ding bage a ala pang maki balu,

²²uling ing Kabiasnan, ing miyubug king sabla, ya ing mituru kanaku. Biasa ya at banal ing espiritu na ning Kabiasnan. Bukud yang metung ing kaniwan na, oneng pakilala ya king dakal a paralan. E ya megawa king bage material at malaya yang munta keta at karin. Malino ya, malinis, matatag, at e ya malyaring manyira. Malugud ya king mayap, mataram ya, at e asambut.

²³Maganaka ya at kakaluguran de ring sablang tau. Apagsandalan ya at siguradu ya at ala yang kabalisan. Mayupaya ya at akakit na ing sabla. Atyu king isanu mang espiritu a biasa at dalise at atataglusan na ing nanumang maselan a bage.

²⁴Mayan yang kimut ing Kabiasnan king isanu mang pangimut. At uling dalise ya atataglusan na at alalaganapan ing sablang bage.

²⁵Ya ing pangisnawang ibat king upaya ning Dios; ing dalise at maslag a aslag a ibat king Mayupaya. Alang bage marinat a makapanagkat king Kabiasnan.

²⁶Ya ing aslag ning alang anggang sala, ing alang mantsang salamin ning dapat ning Dios, at ing larawan na ning kayapan.

²⁷Agyang magdili-dili ya, makanyan man agagawa na ing sablang bage. Agyang e ya mibabayu, makanyan man agagawa nang ibayu ing sablang bage. Manibat na kanitang minunang pamagumpisa ning lahi lulub ne karing kaladua da ring banal, at gagawan na la deting kakaluguran at propeta na ning Dios.

²⁸Ala yang aliwang maygit pakamalan ing Dios nune mu ding taung malugud king Kabiasnan.

²⁹Mas malagu ya ing Kabiasnan kesa king aldo at king meto sikluban. Maygit ya king aslag ning aldo

³⁰uling kaybat ning bengi datang ing aldo. Oneng alang e mayap a malyaring maniambut king Kabiasnan.