Read Kapampangan Wisdom 9 Bible Online

Wisdom 9 - Kapampangan bible

Wisdom 9

¹O Dios da ring kakung makatua at malunusan a Ginu, king kapamilatan na ning amanu mu lelangan mu ing sabla-sabla.

²King kapamilatan na ning kekang Kabiasnan lelangan me ing tau ban mamahala king sablang kekang lelangan.

³Lelang me ban pamahalan ne king kabanalan at king katuliran ing mabilug a yatu, at ban ipatupad ing hustisia king mitmung katapatan.

⁴Dinan mu ku sa king Kabiasnan a makalukluk king lele mung tronu at iyabe mu ku karing kekang anak.

⁵Ipus mu ku, anak na ku ning ipus mung babaing i ima ku; metung ku mung taung maina at makuyad mu ing bie ku. Ditak mu ing aintindian ku king Kautusan at king hustisia.

⁶At agyang pang maging sakdal ya ing tau ala ya ring ulaga, nung ala yang Kabiasnan a manibat keka.

⁷Pinili mu ku kesa karing aliwa ban maging ari na ning kekang balen at ukum da ring kekang anak.

⁸Inutus mu kanaku ing gawang metung a Templo king banal mung bunduk, at metung a altar king Jerusalem, ing siudad a pinili mung kekang tuknangan. Iting Templo larawan ne nitang Templong atyu banua a sidia mu manibat na kanitang minunang panaun.

⁹Atyu kayabe mu ing Kabiasnan at balu na ing kekang daraptan. Atyu ya inyang lelangan me ing yatu. Balu na nung nanu itang katanggap-tanggap keka, itang mayap at makayagpang karing utus mu.

¹⁰Ibat king kekang banua, manibat king kekang maligayang tronu, itubud me ing Kabiasnan ban pakiabayan na ku king kanakung daraptan, at ban ituru na kanaku itang babie tula keka.

¹¹Balu na at aintindian ing sablang bage. Patnubayan na ing sablang dapat ku, at ingatan na ku king kapamilatan na ning upaya na.

¹²Kanita ayatulan ku lang alang pamangabiran ding kekang memalen at maging karapatdapat ku king tronu nang tata ku. At maging katanggap-tanggap keka ing sablang dapat ku.

¹³Ninung tau ing makabalu king kapagnasan ning Dios? Ninu mo ing makibalu king kaburian na?

¹⁴E makagyu ing kaisipan ning tau at mapanganib la ding kekeng pamalak,

¹⁵uling ding malalaso ming katawan abitan na keng pababa at iting katawan ming gabun pabayat ya king kaisipan ming mitmung pamalak.

¹⁶Ala kaming aliwang arapat nune mu ing mamatulus karing bage keti king yatu; magkasakit kaming abalu mi la ding bage a makapaligid kekami. Ninu ngeni ing makaintindi karing bage atyu banua?

¹⁷Ala metung mang mekabalu king kaburian mu subali mu nung dininan meng Kabiasnan at tinubud kapamilatan na ing banal mung espiritu.

¹⁸King anti kaniting paralan la mu mituntun ding tau king dalan a matulid, at mebiasa ketang katanggap-tanggap keka, at miligtas king kapamilatan na ning kekang Kabiasnan.