Read Kapampangan Sirach 1 Bible Online

Sirach 1 - Kapampangan bible

Sirach 1

¹Ibat ngan king Ginu ing sablang kabiasnan, at atyu king Dios king kapilan pa man.

²Ninu mo ing makabilang king patak ning uran o king balas ning pampang? Ninu ing makabilang karing aldo ning alang kapupusan?

³Ninu ing makasukad king katas ning banua? Ninu ing makasukad king lualas ning yatu? Ninu ing makataruk king lalam ning dagat? Ninu ing makasaliksik pakibat kareting kutang?

⁴Atyu ne ing Kabiasnan bayu melalang ing sabla, at pati na ing pamanalastas.

⁶Kaninu mipasiag ing penibatan ning Kabiasnan? Ninu ing makaintindi karing malalam nang paralan?

⁸Atin mung bukud metung a biasa, at sukat tamung talakad arap ning tronu nang luklukan a ating kagalangan.

⁹Ing Ginu ya ing linalang king Kabiasnan; ikit na at kilala na ing ulaga na, inya tigtug na ing sablang Kabiasnan king sabla nang lelangan.

¹⁰Minie yang Kabiasnan king metung at metung, oneng labis-labis ing binie na karetang lulugud king Ginu.

¹¹Ing maki takut king Ginu ya ing dangalan na; tula at ligaya ing mikorona king bie na.

¹²Ing takut king Ginu ya ing babie tula king pusu; keka munie yang tula at ligaya ampon makabang inawa.

¹³At king katataulian ning bie mu ing sabla maging mayubu. Bendisyunan na ka ning Ginu king aldo ning kamatayan mu.

¹⁴Ing takut king Ginu ya ing mumunang lakbang ban kamtan ing Kabiasnan. Miyabie na ing Kabiasnan karetang tapat bayu la pa mipanganak.

¹⁵Menuknangan ne ing Kabiasnan manibat na kanitang minuna, at ding anak a mibait karing daratang a panaun manalig la king Ginu.

¹⁶Ing takut king Ginu ya ing ganap a Kabiasnan; pakabsian na ka karing mayap nang bunga,

¹⁷katmuan ne ing kekang bale at kamalig karing mayap a bage.

¹⁸Ing takut king Ginu ya ing korona ning Kabiasnan a maniampagang kapayapan, at masanting a pamikakatawan.

¹⁹Anti ing patak ning uran, babie yang beluan at pamanalastas, at parangalan na la detang pailalam king upaya na.

²⁰Ing takut king Ginu ya ing yamut ning Kabiasnan; ding sanga na bie lang makaba.

²²E makatuliran ing mua kang alang sangkan; idala na ka mu king kasiran.

²³Manaya ka at mibata at kaybat tumula ka uling menaya ka at mibata.

²⁴E ka magsalita nung e pa oras, at mapuri ka uli na ning ulaga ning kekang pamanaguanta.

²⁵Ing Kabiasnan ya ing talaingat karing mayap a aral a babie da ring kasebian, oneng pawang kalapastanganan ing balu da ring makasalanan tungkul king kabanalan.

²⁶Nung bisa kang mabiasa kailangan ing pamintuan mu la ding utus ning Ginu, at ya naman dinan na kang labis-labis a Kabiasnan.

²⁷Kabiasnan at beluan ing takut king Ginu. Tutula ya ing Ginu king katapatan at kapakumbaban.

²⁸E mu lalako ing takut mu king Ginu; samban me king mabilug mung pusu.

²⁹Mingat ka king pamagsalita mu at e ka magkunwari karing tau.

³⁰E me tatas ing sarili mu, uling pota mibagsak ka at mipakarine. Ibulalag na ning Ginu ing lihim a sasalikut mu at pamakarine na ka arapan da ring dakal a tau king sinagoga, uling e ka dinatang karin a maki kagalangan king Ginu, nune mitmu yang pamagkunwari ing pusu mu.