Read Kapampangan Sirach 11 Bible Online

Sirach 11 - Kapampangan bible

Sirach 11

¹E ya sukat marine ing taung pakalulung ating kabiasnan uling balu da ring tau king metung yang taung marangal.

²E me durukuan ing ninuman uli ning sintingan na, at e mu ne man insultuan ing taung alang leguan.

³Metung yang malating ayup-ayupan ing panilan, oneng ing pulut a gagawan na ya ing pekamaniaman.

⁴E me kaylian ing taung makaimalan basan a daralan kasakitan. King e ra apapansingan ding tau, darapat yang makapagmulalang bage ing Ginu.

⁵Dakal na la mu rin ding ari a minuling makalukluk na king gabun kabang detang e pikabaluan a tau ila ding makalukluk king tronu.

⁶Dakal na la mu rin ding manimunang kewalan dangalan at dakal a pikabaluan a taung mipailalam king upaya da ring aliwa.

⁷Bayu ka manatsa kareng aliwa magsalamin ka pa.

⁸Makiramdam ka pa bayu me ibie ing kekang pakibat. E ka sasabat kabang ating magsalita.

⁹E ka makialam king pisasabian a e mu balu. E ka makikiabe king pisasabian da ring darapat pamikasala.

¹⁰Anak ko, e mu luluban ing tutung dakal a bage. Misakitan ka, nung kekang gawan iti at e mu ayari ing kekang obra. Nung pamiraplan mu maging magadtu at e mu na alisian ita.

¹¹Ating taung e patugut magobra, oneng ala yang amamasalese.

¹²Atin namang taung mabagal magobra, maina ya, kalulu ya, at kailangan yang saupan. Oneng matula ya keting tau ing Ginu at liligtas ne king makalunus nang kabilian.

¹³Tatalakad ne king dangalan at mangapamulala la ding dakal.

¹⁴Manibat ngan king Ginu ing mayap at ing e mayap a kalma, ing bie at ing kamatayan, ing kakaluluan at ing pibandian.

¹⁵Manibat munaman king Ginu ing kabiasnan, ing pamanalastas, ing beluan karing Kautusan, ing lugud, at ing dapat a mayap.

¹⁶Manibat na king kapupurmeruan kakambal da na ding makasalanan ing kamalian at ing karalumduman, at detang matula king e ustu dalan dang tumua.

¹⁷Manatili la king kapilan pa man ding babie na ning Ginu para karing relihiosung tau. Parati kang magtagumpe, nung katanggap-tanggap ka king Ginu.

¹⁸Malyaring mibandi ya ing metung a tau uli ning pamagsikap na at pamagtipid. Oneng nanu mo ing pakinabang na kaniti?

¹⁹Sabian na king sarili na, Malyari na ku ngening magpaynawa at magsaya uling dakal ku tipun. Oneng e na balu nung nu ya anti kakaba ing bie na bayu ya mate, at kaybat malakuan mu karing aliwa ing pibandian a tinipun na.

²⁰Mibata ka at manatili king obra mu angga king tumua ka.

²¹E mo kariririan ing tagumpe a kakamtan da ring taung e mayap; manatili ka king obra mu at manalig ka king Ginu. Mayan king Ginu ing bigla na lang gawan mabandi ding kalulu.

²²Ing bendisyun ning Ginu ya ing regalu na karing relihiosung tapat at ibie ne iti king saglit a penandit.

²³E ka pailigalig king kekang kailangan o king mapalyari keka karing aldo daratang.

²⁴At e mu isipan king atyu na ngan keka ing sablang kekang kailangan o alang e mayap a dugpa keka king daratang a panaun.

²⁵Makakalinguan ing kasakitan king panaun ning tagumpe at ing tagumpe king oras ning kasakitan.

²⁶Mayan king Ginu ing ibie na ing mayap a ablas o ing parusa king taung miras king aldo ning kamatayan na.

²⁷King oras a ita, mibulalag ing sablang depat na; makalinguan ngan king penandit a ita ing kasakitan.

²⁸Inya e mu sasabian king masuerti ya ing metung a tau kabang mabie ya, uling king oras na mu ning kamatayan na kanita mayakit ing pangatau na.

²⁹E na bala nang tau agkatan mu king pibalebale mu uling dakal la deng magkunwaring tapat.

³⁰Mengari ya ing taung palalu king ayup a panapan o king ispia a lalawe king kekang keinan.

³¹Manaya yang pamikatagun ban ing mayap gawan nang e mayap o pamarsalanan ding alang kamuang-muang.

³²Masilab ya ing bale king metung mung lipatu at ing pamamaramdam na ning taung e mayap mumuli king dayang mamagus.

³³Mingat ka karing taung anti kareti at king e mayap dang kapagnasan, uling ing kekang pangatau lubus dang siran.

³⁴E me paluban king pibalebale mu ing taung e mu kakilala, uling guluan na ka mu at ing pamilya mu.