Read Kapampangan Sirach 13 Bible Online

Sirach 13 - Kapampangan bible

Sirach 13

¹Nung talan kang alketran siguradu kang midinan, nung makikiabe ka karing taung palalu siguradu kang maging anti karela.

²E me bubuat ing mabayat a e mu agyung ibuat, at e ka makikiabe karing taung mas mabandi at mayupaya kesa keka. E mo malyaring pisipingan ing kaldera at ing kuran; mabalbal ya ing kuran, nung turan ne ning kaldera.

³Nung dapat yang e mayap ing taung mabandi king kenu man ya pa ing mimua, at ing taung kalulung keraptanan ya pa ing e mayap.

⁴E na ka ibili ning mabandi kabang pakinabangan na ka, oneng kalinguan na ka potang ya ing kekang kailangan.

⁵Parati na kang pakiabayan kabang atin kang pibandian, at tunggal ditak gisanan na king alang kapikakunuan.

⁶Bilugan na ka buntuk neng atin yang kailangan keka; matiman ya at pamurian na ka. Kaybat ikutang na pa, Nanu ing asuyu ku keka?

⁷Pakaistiman na ka king pamangan na at e me buring pakarinayan. Oneng kaybat, makatadua o makatatlu na kang pagsamantalan at ika pa ing kaylian na. Nung sakaling akasalubung me, pangilagan na ka at piling-piling neng buntuk na.

⁸Mingat ka ban e ka mapirait at e mangapakarine kabang magtamasa kang tula king bie.

⁹Nung agkatan na ka king bale na ning taung masikanan e ka sa agad mabibisa. Kanita na ka lalung pamilitan.

¹⁰E mu pakalapit ing lub mu uling pota masora ya keka, at e mu naman pakalaut pota dumayu ya keka.

¹¹E me pakisabian a balamu pante kayu mu, at e mu agad paniwalan ing sasabian na. King maluat yung pamipagsalita susubukan na ka at titimbangan kabang timan-timan ya.

¹²Ala yang lunus ing taung mikakalat king kekang lihim at e ya mikakunung panasakitan na ka at pasukul.

¹³Inya ika na mu ing misikap king kekang lihim at mingat ka, uling ing kekang lalakaran ya ing sarili mung kapahamakan.

¹⁴Luguran me ing Ginu kabang mabibie ka at maus king Ginu ban iligtas na ka.

¹⁵Pakiabayan ne ning balang melalang a animal ing kalupa nang animal; ing tau anti naman.

¹⁶Makitipun la ding animal karing kauri da; ing tau karing kaugali na.

¹⁷E ya malyaring makapakiabe ing asung-gubat king tupa, at ing taung e mayap king taung mayap.

¹⁸E la malyaring misulung mangan ing pusa at ing asu, at anti naman ing mabanding tau ampon ing kalulu.

¹⁹Lalaklakan ne ning leon ing asnong malyap ning disyerto, sasamantalanan na ne man ning taung mabandi ing pakakalulu.

²⁰Pikakasaman ne ning taung palalu ing mapagpakumbabang tau, makanyan ya naman ing mabandi king pakakalulu.

²¹Neng misakab ya ing mabandi, italakad de ring kakaluguran na; potang ing kalulu ya ing misakab lakuan de pa ring kakaluguran na.

²²Dakal lang sasagip king mabandi potang magkamali ya, at nung magsalita yang kabarumbaduan karela yang panakpan. Potang ing kalulu ya ing magkamali pawang kalibakan ing keyang tanggapan. Agyang pang tutu na ing keyang sasabian alang makiramdam.

²³Potang ing mabandi ya ing magsalita tahimik la ding sabla, kaybat pamurian da angga king banua ing sinabi na. Potang ing kalulu ya ing magsalita sabian da, Ninu mo ya? At itulak de pa nung magkamali ya king pamagsalita na.

²⁴Mayap ing pibandian, nung e ibat king e ustung dapat. E kasalanan ing kalulu. Ding e makadios ilang sasabing kasalanan ing kakaluluan.

²⁵Itang atyu king pusu mu, saya o lungkut, mayakit king lupa mu.

²⁶Ing tanda ning maligayang bie ya ing masayang lupa. Ing pamangawang kasebian makalumpis lupa. Ing pamangawang kasebian makiduang kaisipan a makapagal.