Read Kapampangan Sirach 14 Bible Online

Sirach 14 - Kapampangan bible

Sirach 14

¹Mapalad ya ing taung e mitatalusad a dila king pamagsalita na at e maliligalig king sinabi na.

²Mapalad ya naman ing taung e na liligaligan ning konsiensia na at e milalako kapanayan.

³E ya sukat misalapi ing maimut a tau. Nanu ing pakinabang ning maimut king salapi na?

⁴Nung meging maymut ka king sarili mu ban makatipun, miras mu karing aliwa ing kekang tinipun. Gamitan da ing tinipun mung pibandian ban magpasasa king luhu.

⁵Baket maimut ya ing tau king sarili na, oneng maganaka ne man karing aliwa? Ba't e na gamitan ing pibandian na ban paligayan ing sarili na?

⁶Ala nang aliwa pang maygit king kaimutan kesa king taung maimut king sarili na. Ing kaimutan na ya ing mamarusa king bie na.

⁷Mipaintagun mu nung mekarapat yang mayap, oneng king katataulian mibulalag ing kaimutan na.

⁸E ya mayap ing taung masaklo mata; e no balu ding kalupa nang tau at ala yang pakialam karela.

⁹E pa sapat itang atyu na uling ing kasakiman ya ing atyu king pusu na.

¹⁰Pasayangan na ning kuriput ing pamangan; ala kang akit a pamangan king pinggan na.

¹¹Anak ku, gawan mu ing agyu mu ban e mipaburen ing sarili mu at parating mong babie ding ain a karapatdapat king Ginu.

¹²E mu sa kakalinguan king datang ing aldo ning kekang kamatayan, oneng e mu balu nung kapilan.

¹³Daptanan mong mayap ding kekang kakaluguran bayu ka mate; saupan mu la king anggang agyu mu.

¹⁴E me pagkaimutan tula ing sarili mu aldo-aldo. Gawan mu itang buri mung gawan, nung iti e labag king kautusan.

¹⁵Datang ing panaun a pipitnan-pitnan da ring aliwang tau ing pibandian a kekang pipagalan.

¹⁶Inya mamie ka at matulang tanggap king babie ra keka ding aliwa. Magsaya ka uling e ka manakit tula king tuknangan da ring mete.

¹⁷Nung makananu yang kukupas ing imalan makanyan yang kukupas ing katawan. Sasabian na ning matuang kautusan king mate ta ngan.

¹⁸Mengari la ding tau karing bulung ning tanaman, ating malalaglag at atin namang sisibut a bayung bulung. Ating mamamate kekatamu at atin namang mibabait.

¹⁹Malaso at mawala ing sablang gewa da ring gamat ding tau, at tukian nang matda ning tau ding gewa na.

²⁰Mapalad ya ing taung babie pansin king Kabiasnan at gagamitan ne ing buntuk na king mayap.

²¹Abalu na la ding lihim ning Kabiasnan ning ninumang tutuntun king dalan ning Kabiasnan.

²²Antimo ing taung mangasu a lalawe arakap na, makanyan ing kekang gawan king pamandakap Kabiasnan.

²³Sumilip ka karing awang na at makiramdam king pasbul na.

²⁴Manuknangan kang malapit king tuknangan na; itasak mu la king pader na ding tulus ning kekang tolda.

²⁵Kanita mika masanting kang lugal a pituknangan.

²⁶King lilung ning Kabiasnan karin mu la idala ding kekang anak ban e la mabilad king pali.

²⁷King sala na karin ka manuknangan.