Read Kapampangan Sirach 15 Bible Online

Sirach 15 - Kapampangan bible

Sirach 15

¹Nung katakutan me at gagalangan ing Ginu, iti ya ing daptan mu: Pakapagaralan me ing Kautusan na at kamtan mu ing Kabiasnan.

²Kalupa na ning metung a ima o ning babaing bayung kasal, lumual ya ban salubungan na ka.

³Mengari king pamangan at inuman ing ibie na kekang kabiasnan at pamanalastas.

⁴Magsandal ka king Kabiasnan at e ka mabigu.

⁵Gawan na kang maygit kagalang-galang karing kasiping mung bale, at potang magsalita ka king kapulungan da ring tau, ituru na ing sabian mu.

⁶Manakit kang tula ampon ganap a ligaya, at e ya makalinguan ing lagyu mu kapilan man.

⁷Oneng ding mangmang at makasalanan e re kamtan o akua mang sulyapan ing Kabiasnan.

⁸Malyap ya ing Kabiasnan karing taung matas a lub at marayu ya king kaisipan da ring malaram.

⁹E sukat magkantang kapurian king Dios ing makasalanan, uling e naman tapat ing kapanyamban na.

¹⁰Pamipasiag king Kabiasnan ing pamagkantang kapurian at pamanaus pansin king Ginu.

¹¹E me sisisian ing Ginu uli ning kasalanan mu; e na gawan itang dapat a kasaman na.

¹²E mu sasabian king linili na ka. E na kailangan ing saup da ring taksil king pangatuparan ding binalak nang kapagnasan.

¹³Mikakamas ya ing Ginu king sablang uri ning kasalanan; e la mayayagkat king nanumang e mayap detang tatakut king Ginu.

¹⁴Manibat na kanitang lelangan ne ing yatu, binie na king tau ing kalayaan mamili ketang buri na.

¹⁵Nung bisa ka, atuparan mu la ding utus ning Ginu, atyu keka nung buri mu ing maging tapat ka o ali king Ginu.

¹⁶Mibili yang danum at api king arap mu, kuanan me itang buri mu.

¹⁷Makapamili ka kareting adua: ing bie o ing kamatayan? Itang kekang pilinan ya ing kekang tanggapan.

¹⁸Maragul ing Kabiasnan na at upaya ning Ginu, akakit na ing sabla.

¹⁹Balu na ing sablang daraptan ning tau, at ingatan na la detang ating takut at galang king Ginu.

²⁰Ala yang inutusan a dapat e mayap o peintulutan dapat pamikasala.