Read Kapampangan Sirach 16 Bible Online

Sirach 16 - Kapampangan bible

Sirach 16

¹E mu pagnasan ing dakal a anak a alang silbi, at e ka matutula karing anak a lalaking alang Dios a katawan.

²E mo ipagparangalan ding dakal mung anak, nung e la tatakut at gagalang king Ginu.

³E mu pagnasan ing kumaba la bie at e asahan ing mika mayap lang kinabukasan. Mas mayap ing metung ka anak kesa karing libu o mate alang anak kesa king dakal la, nung ala no mang Dios a katawan.

⁴Malyaring dagul ya bilang ing metung a siudad king uli na ning metung a taung biasa, oneng mate ya ing lahi da ring taung e mayap.

⁵Dakal na ku ikit a milyaring anti kanyan, oneng lalu la pang maygit kanyan ing kakung abalitan.

⁶Silaban ne ning milalablab nang mua ning Ginu ing kapulungan da ring makasalanan o ing bansang alang kapamintuan king Ginu.

⁷E na la pepatawaran detang higanti kanitang minunang panaun, detang linaban a menalig king karelang sikanan.

⁸E ya melunus king balen a tuknangan nang Lot a kesaman na uli na ning kapalaluan da.

⁹E ya pepakit lunus ketang memalen a tikda nang gisanan a lahi uli na ning kasalanan da.

¹⁰Makanyan munaman ing merapat karing anam a ralan a libu katau a miyabe-abe linaban king Ginu kanitang miglakbe la king ilang.

¹¹Agyang metung ya mu ing masias a buntuk, maging makapagmulala nung miligtas ya king parusa. Malunusan ya ing Ginu, oneng biasa ya namang mimua. Malyaring maglapo ing kapatawaran na o ing mua na.

¹²Tune maragul ing lunus na at maragul munaman ing bigsikan ning mua na. Ukuman na la ding tau agpang ketang depat da.

¹³E ne paintulutan miligtas ing mapanako at ing penako na, at ablasan na ne man ing mapibabatang taung makadios.

¹⁴Bendisyunan na la ding taung darapat mayap; ibie na itang mangaintulid karela.

¹⁷E mu sukat sabian ing anti kaniti: Salikutan ke ing Ginu. Ninu ing king banua a makaganaka pa kanaku? Ninu ing makapansin kaku libutad da ring dakal a tau. Binang dakal ing melalang, inya nanu ing ulaga ku?

¹⁸Gagalgal ing sabla neng daratang ya ing Ginu, ing yatu at ing danum lalam na niti, ing biga at ding banua lagpas kareti.

¹⁹Gagalgal la deng bunduk, ding pundasyun a pitatalakaran ning yatu neng lalawan na la.

²⁰E na na ku malyaring pansinan pa ning Ginu. Ala nang makialam pa king daraptan ku.

²¹Nung mikasala ku at king lihim ala kung katapatan alang makabalu kaniti.

²²Nung daptan ku naman itang matulid ala namang mamalita kaniti king Ginu. Ninu ing manenaya kaniti? Mabagal yang tupad ketang sinabi nang daptan na.

²³Makanyan ing isipan na ning makitid a isip at ing sasabian na ning taung e mituruanan.

²⁴Anak ku, makiramdam ka at pakaintindian mu ing sabian ku keka ban mabiasa ka.

²⁵Iladlad kung masalese keka ing alang kulang at alang labis a kabiasnan.

²⁶Inyang lelangan ning Dios king kapupurmeruan ing sablang keyang depat, dininan neng lugal ning Ginu ing metung at metung karing keyang lelangan.

²⁷Inisip na ing sablang dapat da para karing sablang panaun, manibat king pamagumpisa da at angga na king marayu dang paintungulan.

²⁸E la misisiksikan o salangsang metung man king keyang kautusan.

²⁹Kaybat nita, linawe ne ning Ginu ing yatu, at kitmuan ne karing bage mayap.

³⁰Kitmuan ne ing balat ning yatu karing sablang bage ating bie; kaybat mate la ban mibalik king keyang penibatan.