Read Kapampangan Sirach 17 Bible Online

Sirach 17 - Kapampangan bible

Sirach 17

¹Lelang na la ning Ginu ibat king alikabuk ding tau, at king alikabuk la magbalik pasibayu.

²Karela tikda na ing kaba ning bie ra, at dininan kayupayan karing sabla nang lelangan keti king yatu.

³Atin lang sikanan a kalupa na ning Ginu, uling lelang nong kawangis na.

⁴Dininan na lang takut ding sablang lelang na ban mitakutan la karela. Dininan na lang kayupayan mamahala karing sablang animal at ayup.

⁶Dininan na lang dila, mata, balugbug, isip, at konsiensia.

⁷Kitmuan na lang beluan ampon pamanalastas, at pepakit na karela ing pamiyaliwa ning e mayap at ning mayap.

⁸Inaslagan na lang pusu ra ban akit dang kamalan ning lelangan na.

¹⁰Purian de ing banal nang lagyu, at sabian ing degulan ning makapagmulala nang dapat.

¹¹Binie na karela ing beluan, at ing Kautusan binie ne bilang sibul ning karelang bie.

¹²Ginawa yang alang anggang kasunduan karela, at sinabi ding kautusan na.

¹³Ikit da ring mata ra ing masala nang kamalan, at dimdam ing ligaya ning siwala na.

¹⁴Belan na la laban king e mayap, at tiru karelang katungkulan karing kalupa dang tau.

¹⁵Akakit na ning Ginu ing sablang daraptan da ring tau; ala kang asalikut king Ginu.

¹⁷Dininan neng manimuna ing balang metung karing bansa, oneng ing Israel ya ing pinili na ban maging sariling bandi na.

¹⁹Parati nang lalawan ning Ginu ing daraptan da reng tau; maygit masala king aldo ing akakit na karing tau.

²⁰E makalingad king Ginu ing dapat dang e ustu; balu na ngan ing karelang kasalanan.

²²King Ginu ing pamamie saup karing kalulu anti ya king singsing a mal. Ing maganakang tau mal yang anti ing bie king arap na.

²³Kaybat atulan na la ding taung e mayap at parusan na la; tanggapan da itang mangaintulid karela.

²⁴Oneng paintulut na ing mibalik la arap na detang sisisi king depat dang e mayap, at pasiknangan na la lub detang milalako kapanayan.

²⁵Lumapit ka king Ginu at tuknang na kang darapat kasalanan. Makisabi kang mayap king Ginu ban mabawas ing pupusanan mung mabayat a kasalanan.

²⁶Magbalik ka king Kakataskatasan at gulutan mu na ing pamikasala. Pikasaman mu ing e mayap.

²⁷Detang mabie makaibie lang kapasalamatan king Ginu, oneng atin king tuknangan da ring mete ing makapagkantang kapurian king Gino?

²⁸E la malyaring makaibie kapurian king Ginu ding mete uling ala na la. E ne manakit paralan ban purian ne. Ding mabie mu at ding masikan a katawan ilang malyaring makaibie kapurian king Ginu.

²⁹Karagul na ning lunus ning Ginu! Patawaran na la ding sablang mibabalik arap na.

³⁰E na malyaring akamtan ning tau ing sablang bage, uling atin yang kamatayan ing balang tau.

³¹Atin pang masala kesa king aldo? Makanyan man akmulan ne ning dalumdum ing aldo. Lalung mayan na lang akmulan ning dalumdum ding kaisipan ning tau.

³²Lalawan na la ning Ginu ding sablang batuin king banua, samantalang ding tau gabun la mu at abu.