Read Kapampangan Sirach 18 Bible Online

Sirach 18 - Kapampangan bible

Sirach 18

¹Ing linalang king meto sikluban ya ing Ginu a mabie kapilan man,

²at ya mung bukud ing makatuliran.

⁴Ala metung man a dininan nang sapat a kayupayan ban ilarawan na ing depat na. Alang makataruk king makapagmulala nang dapat.

⁵Ninu ing malyaring makasukad king makamal nang upaya? Ninu ing malyaring magsalita king sablang lunus na?

⁶Alang makadagdag o makabawas kareti. Tune masakit lang tarukan ding makapagmulalang dapat ning Ginu.

⁷Neng mayayari ne ing istoria ning tau, e ta pa man mekapagumpisa, at potang yari ne malilitu ya pa mu rin.

⁸Nanu ya ing tau? Nanu ing kasilbian na? Nanu ing kabaldugan na ning daraptan nang mayap at e mayap?

⁹E na karaniwan nung ing metung a tau miras yang dinalan a banua,

¹⁰oneng nung ilimpi la deti king panaun a alang angga anti lang kapatak a danum king dagat o metung a binutil ning balas king pasigan.

¹¹Iti ing sangkan nung inya panupaya na la ning Ginu at tune malunusan ya karela.

¹²Akakit na at balu na ing mapait a kawakasan da, inya parati yang makasadiang munie kapatawaran karela.

¹³Ing lunus ning tau para mu karetang kakilala na, oneng ing king Ginu para karing sablang tau. Babarugan ne ing tau ba yang mipakayap; iyanad ne at tuturuanan, at anti ing pastul panintunan ne neng malilili ya.

¹⁴Lulunusan na la detang tatanggap king tuturu na at matulang mamintu karing utus na.

¹⁵Anak ku, e mu ne paniabianan ing taung daraptanan mung mayap. Ala na kang sasabian a makapanasakit kapanamdaman ban ing pamaniaup mu e mawalang kabaldugan.

¹⁶Parimlan na ning ambun ing pali ning aldo. Inya ing amanu mu atin yang arapat a maygit king saup a babie mu.

¹⁷Ing maganakang pamagsalita maygit yang matimbang kesa karing peka mal a lamak. Nung talagang maganaka ka parehu mu lang ibie.

¹⁸Kamangmangan ing maimut at ing mapanyumbat. Alang matula king binie nung ing minie masakit ya lub.

¹⁹Kailangan ing balu mu ing sabian mu bayu ka magsalita, at kailangan ing ingatan me ing katawan mu bayu ka sakit.

²⁰Siasatan me ing sarili mu bayu datang ing pamanukum. At potang datang na, tanggap kang kapatawaran.

²¹Magpakumbaba ka bayu datang ing sakit a parusa. Neng mekarapat kang pamikasala, pakit mu king sisisian mu.

²²Nung mengaku ka king Ginu, daptan mu ing sablang agyu mu ban atuparan mu; e potang malapit na kang mate.

²³Oneng bayu ka mangaku, pakapagaralan me pa mu. E mu sa susubukan ing kapibabatan ning Ginu.

²⁴Misip ka sa! Buri meng mimua keka ing Ginu king oras ning kamatayan mo? Potang marap ka king piukuman na, buri mu ing gulutan na ka?

²⁵E mu sa kakalinguan ing danup neng atyu keka ing sablang pamangan. E mu kakalinguan ing kakaluluan neng atin kang dakal a pibandian.

²⁶Dakal ing malilyaring bage kilub ning patingapun; malagua ing pamagbayu potang buri na ning Ginu.

²⁷Maingat ya ing taung biasa king sablang daraptan na. Lalu yang maingat king tuksung makapadurut ban e ya manabu.

²⁸Agad nang akilala ning taung biasa ing kabiasnan at galangan ne ing ninumang atin kaniti.

²⁹Nung dukuan mu ing kabiasnan kabud damdaman mu iti, maging biasa ka naman at asaupan mu la ding aliwa king kekang sasabian a kabiasnan.

³⁰E ka pailalam king pita ning laman; aguantan mu ing sarili mu king e ustung kapagnasan.

³¹Nung panusigan mu ing sabla mung kapagnasan maging pikaylian ka karing kekang kalaban.

³²E ka sa maluhu king pamibiebie, kakaluluan ing malyaring ibunga na niti.

³³E ka magpiesta, nung ala ka mu ring salapi ban e ka mamulubi.