Read Kapampangan Sirach 19 Bible Online

Sirach 19 - Kapampangan bible

Sirach 19

¹Nung makanyan ing kekang gagawan e ka mika pibandian. Nung salaula ka ketang ditak a atyu keka e magluat kagisanan ka.

²Ing alak at ding babai makasira la king matinu rang isip ding lalaki. Ing lalaking pupunta karing babaing magtinda king katawan da maging ala yang marine uling e ne maningat.

³At iti ya ing makapasari king kasiran na; kanan de ring ulad ing katawan na.

⁴Ing agad magtiwala king tau mangabaldugan ing kakuyaran na ning kaisipan, at ing kekang sarili ya ing mismung kekang panasakitan neng darapat kang kasalanan.

⁵Datang ing kayatulan king tutula king e mayap.

⁶E ka mangalat indredus ban milaut ka king kapahamakan.

⁷E mu na lilipat kaninu man itang kekang dimdam, at e ka miyabe king nanumang kaguluan.

⁸E mu na paniabian king kakaluguran o king kalaban, subali mu nung kailangan ing magsalita ban e ka mikasala.

⁹Ing ninumang makaramdam keka milako ya tiwala keka at e lumuat pikasaman na ka.

¹⁰Atin kang abalitan a indredos? Sarilinan mu nia mu. E ka tatakut; e na ka apamakbungan.

¹¹Anti ya king babaing manganak ing taung mangmang a misasalikut lihim.

¹²Anti ya king paslung tinusuk king puad na ing lihim a atyu king pusu na.

¹³Pakisabian meng tapatan ing kekang kakaluguran, nung dinapat ya ping kasalanan. Marahil iti e tutu, at nung katutuan naman e na na ulitan.

¹⁴Pakisabian meng tapatan ing kasiping mung bale tungkul king abalitan mung sinabi na, pota e na sinabi ita. Nung sinabi na pin, e na na ulitan.

¹⁵Pakisabian meng tapatan ing kekang kakaluguran king ababalitan mu tungkul king pangatau na, magkang ita pamanyira da reng tau. E ka agad maniwala keng balabalita.

¹⁶Neng misan asasabi na ning tau ing e na sukat sabian. Ninu wari ing e mikakasala king pamagsalita na?

¹⁷Pakisabian me pang tapatan ing kekang kasiping bale bayu me kamuan. Kaybat na nita, ing Kautusan ning Kakataskatasan ya na ing bala.

²⁰Ing takut at kagalangan king Ginu ya ing kabilugan a Kabiasnan. Ing ganap a Kabiasnan ya ing pamanupad king Kautusan.

²²E Kabiasnan ing beluan king e mayap. E mayap ing tukian ing turu da ring palpikasala.

²³Ating kabiasnan a magagamit king e ustu, at ating mangmang uli na ning ala lang beluan.

²⁴Mas mayap ing atin kang takut king Dios at alang balu kesa king biasa ka oneng lalabagan mu ne man ing Kautusan.

²⁵Ating taung gagamit king beluan da king e makatuliran, at ating manabusu ban apakilala ra ing matulid.

²⁶Atin munamang taung magkunwaring makaduku at papakit malungkut, oneng kilub dang pusu buri da ing maglinlang.

²⁷Tatakpan ne ing lupa na at magkunwaring maklak ya, oneng potang alang manakit samantalanan na ka.

²⁸At nung e ya mika oportunidad daptan na mu rin king aliwang panaun.

²⁹Akilala me ing tau king lupa na at abalu meng agad ing biasa kabud akatagpu me.

³⁰Akit mu ing ugali na king kapamilatan na ning piblas na, neng mayli ya at neng lalakad ya.