Read Kapampangan Sirach 20 Bible Online

Sirach 20 - Kapampangan bible

Sirach 20

¹Ating panaun a e sukat paniabianan ing metung a tau. Ustu ing manahimik ka pa king oras a anti kanita.

²Oneng mas mayap ing paniabianan mu ne kesa king mapuput ka salu king mua.

³Ing taung tatanggap king kamalian na milaut ya king kamarinayan.

⁴Ing taung gagamit puersa ban lunto ing matulid kalupa ne ing kapun a magnasang manialbahi king puri ning babai.

⁵Ating taung kikilalanan dang biasa uling tahimik ya, at ating taung pikakasaman da uling masalita ya.

⁶Atin namang taung tahimik uling ala yang balung sabian, at atin munamang taung e magsalita uling e pa miras ing oras.

⁷King ustung oras karin ya magsalita ing biasa, oneng ing mangmang ala yang tuknang king kadadaldal.

⁸Makainip ya ing taung makabang magsalita, at kasaman da ne man ing taung e bisang munie dalan ban makapagsalita la ding aliwa.

⁹Neng misan ing mewalang suerti mamungang kayapan, at ing mayap a suerti mamunga namang kasiran.

¹⁰Neng misan e miyablasan ing pamaniapat mayap; neng misan dobli ing tanggapan mung ablas.

¹¹Ating taung ating dangalan a miyangganan king kamarinayan, oneng ating taung e pikabaluan a maging bantug king karangalan.

¹²Neng misan king ditak a salapi dakal ka asali, oneng potang kekang lawan pitung besis ka palang mikamalan.

¹³Manikua yang kakaluguran ing taung biasa neng magsalita ya, oneng metung man ala yang akua ing mangmang agyang pamurian na la.

¹⁴Ala kang nabangnan king regalu na ning mangmang, uling pitung besis ing panenayan nang kayablasan.

¹⁵Ditak mu ing babie na, oneng dakal a pamanatsa ing kayantabe na. Ban damdaman de ring dakal anti yang loro a dadaldal. Nung atin yang peparam ngeni buri na bukas keka yang isubli. Ninu mo ing e masora king taung anti kanyan?

¹⁶Ing mangmang sabian na, Ala kung kakaluguran. Alang pasalamat king daraptan kung mayap. Tatanggapan da ing babie ku, oneng kagulut ku panyiran da ku.

¹⁷Inya naman pituya-tuya de at kaylian ding dakal.

¹⁸Mas mayap ing misakab ka keng dalan kesa king ing dila mu ya ing mitalusad; makanyan lang biglang mate ding taung ating kasalanan.

¹⁹Mengari ya ing taung magaspang a ugali king istoriang alang kwenta a ulit-ulitan nang kukwentu ning mangmang a tau.

²⁰Alang babie pansin king malagung kasebian a sasabian ning mangmang king panaun a e karampatan.

²¹Ing taung e makagawang kasalanan uli ning kakaluluan na e ya maligalig a kaisipan potang matudtud ne king keyang pagkeran.

²²Makalunus ya ing taung papaten na ing sarili na uli ning malamarine ya o uli ning pakiramdaman na ing sasabian da ring mangmang.

²³Makalunus ya ing taung pengakuanan ne ing kakaluguran na uling e ne buring pakarinayan, inya ginawa yang kalaban na.

²⁴Mantsa ya ing pamaglaram king ninuman, at ing pamaglaram maralas dang daraptan ding mangmang.

²⁵Mas mayap ya ing mapanako kesa king taung malaram. Oneng ing mapanako at ing malaram parehu lang papunta king kasiran.

²⁶Pikakasaman ing ugaling kalaraman. Inya mabibie ya ing malaram king alang dangalan.

²⁷Mitatas ya katungkulan ing taung biasa uli ding amanu na; akakua na la pilubluban ding tatalan upaya.

²⁸Itang babie tula karing manimuna mipanupaya ya king kamalian a agawa na. Itang sasarul at tatanam king marangle na mupul yang dakal.

²⁹Agyang deng biasa mabubulag la kareng regalu at suhul, maging sangkan la king e ra pamagsalita king katutuan.

³⁰Ing kabiasnan a e gagamitan mengaring makakutkut a pibandian a parehung alang kasilbian.

³¹Oneng mas mayap ya ing taung misasalikut king kamangmangan na kesa king taung misasalikut king kabiasnan na.