Read Kapampangan Sirach 23 Bible Online

Sirach 23 - Kapampangan bible

Sirach 23

¹O Ginung kakung Ibpa at Ari ning bie ku, e mu paintulut ing ipusan na ku ning dila ku king kapahamakan.

²Dinan mu kung beluan a magsilbing pamarug karing kaisipan ku at layun madisiplina ining bie ku. Kanita e ku mipanupaya karing kamalian ku at e makalimbatawan ing depat kung kasalanan.

³E na munaman kanita dakal ing kakung kakulangan at pamikasala. E na ku masambut pa karing kakung kalaban o gawan dang pikaylian.

⁴O Ginung kakung Ibpa, O Dios ning bie ku, e mu paintulut ing maging palalu ku;

⁵e mu ku paisambut king e mayap a kapagnasan.

⁶Ikabus mu ku king kasakiman o king e mayap nang pita ning laman; e mu paintulut ing maging ipus na ku ning makarineng kapagnasan.

⁷Anak ko, makiramdam kayu king sabian ku tungkul king ustung pamagsalita. Pakapakiramdaman yu ing ituru ku ban e kayu mipakarine.

⁸Mangapakarine la deng palpikasala uli ning pamagsalita dang masaklo; palalu la at lapastangan mangamanu.

⁹E ye sasane ing asbuk yu king pamanyumpa, at e ye gagamitan ing banal nang lagyu ning Dios.

¹⁰E la mamako ding late king katawan ning ipus a parating mababarug. Makanyan munaman, siguradu yang mikakasala ing taung parating susumpa at babanggit king banal nang lagyu ning Dios.

¹¹Mitatambak ing kasalanan na ning taung parating susumpa, inya e ne lakuan ning kapahamakan ing pibalebale na. Nung e na tiparan ing sinumpa na, maging dobli ing kasalanan na. At nung sinumpa yang alang katapatan, mikasala ya mu rin. Inya naman mangatmu yang kaguluan ing pibalebale na.

¹²Ating pamagsalita a kalupa na ning kamatayan. Mananu na sanang kapilan man iti e maramdam karing lahi nang Jacob. E la magsalitang makanyan ding taung ating Dios a katawan at e magbabad king kasalanan.

¹³E yu sa panugalian ing pamagsalitang magaspang at kabastusan uling iti kasalanan.

¹⁴E yo kakalinguan ding pengari yu neng atyu kayu king kapulungan da ring kagalang-galang a tau. Pota mangalinguan kayu at makagawang e ustu uli ning penugalian yu. Kanita pagnasan yung e na kayu mibait at isumpa ye ing aldo kebaitan yu.

¹⁵Ing taung misane king pamagsalitang kabastusan masakit na nang itabili kabang mabibie ya.

¹⁶Ating aduang uring tau a daragdagan da nang daragdagan ing kasalanan da, at ing katlu naman agkatan na ing mua na ning Ginu. Oneng ing kasalanan ning pita ning laman anti yang milalablab a api; e ya matda anggang e ya mapupud. E ya tuknang ing taung mahilig king pita ning laman anggang e ne agisan dilukan ning api.

¹⁷Pagnasan na la ning taung anti kaniti ding sablang babai. E ya tuknang kabang mabibie ya.

¹⁸Nganang sasabi king sarili na ning lalaking taksil king asawa na, Alang manakit kaku uling madalumdum at makapadurut ku karing pader. Alang manakit kaku, inya ala kung pigaganakan. E na la apansin ning Kakataskatasan ding kakung kasalanan.

¹⁹Ding tau ilang katakutan na ning taung anti kaniti. Kelinguan na king ding mata ning Ginu apulu lang libu kasala king aslag ning aldo, king akakit na ngan ning Ginu ing daraptan da ring tau at pati na itang pakalihim-lihim da.

²⁰Balu na na ning Ginu ing sabla bayu ne lelangan ing yatu at angga na inyang ayari ne.

²¹Ing anti kanitang tau marakap ya king oras a e na balu, at miparusan ya arapan da ring memalen.

²²Makanyan munaman ing mapalyari king babaing taksil king asawa na at mikayanak king aliwang lalaki.

²³Mumuna, lebagan ne ing Kautusan ning Kakataskatasan; kadua, sinira ne dangalan ing asawa na; katlu, gewa nang taksil ing sarili na at mikayanak ya king e na asawa.

²⁴Miparusan ya iting babai king kapulungan da ring tau at midame la pati na ding anak na.

²⁵E da la galangan deting anak at e la mika pamilya.

²⁶Isumpa de ring tau ing anti kaniting babai at e makalinguan kapilan man ing makarine nang depatan.

²⁷Kanita ra aintindian ding tau king ala nang mayap dili nung e mu ing pitakutan ya at galangan ing Ginu, at ala nang maniaman nung e mu ing mamintu karing kautusan na.