Read Kapampangan Sirach 24 Bible Online

Sirach 24 - Kapampangan bible

Sirach 24

¹Makiramdam ka! Oyan ing Kabiasnan kakanta na ing sarili nang kapurian libutad ding memalen nang Israelita,

²king katipunan ning Kakataskatasan, arapan ning kayupayan na. Ngana,

³Ibat ku king asbuk ning Kakataskatasan, at anti ing ulap tikpan ke ing yatu.

⁴Atyu king banuang matas ing kakung tuknangan, atyu karing asias a biga ing kakung tronu.

⁵Magdili-dili keng libutan ing mabilug a yatu, at lipatan ing dagat a malalam.

⁶Aku ing sasakup king mabilug a yatu, karing alun ding danuman, king balang bansa at tau.

⁷Linawe kung lugal a maging kakung pipagpaynawan, at tuknangan king metung nang dake ning yatu.

⁸Kanita ing Linalang kaku, at king meto sikluban tildu ne kaku ing lugal nung nu ku manuknangan. Ngana, Italakad me ing kekang tuknangan king Israel, at ding lahi nang Jacob ilang maging kekang memalen.

⁹Lelang na ku bayu pa megumpisa ing panaun, at manatili ku king kapilan pa man.

¹⁰Siyuan ke king Tolda nang banal, at king Bunduk ning Zion ke telakad ing kakung tuknangan.

¹¹Pepatuknangan na ku king Siudad nang Pakamalan, at dinan kayupayan king Jerusalem.

¹²Mika suli ku libutad ding marangal a taung pinili nang maging memalen ning Ginu.

¹³Karin ku meragul anti ing tanaman a sedro ning Lebanon, anti ing tanaman a sipres ning Bunduk ning Hermon.

¹⁴Meragul kung anti ing tanaman a palma ning Engedi, anti ding rosas ning Jerico, anti ing malagung tanaman a olibo king marangle, anti ding tutubung kastanyo lele ning danum.

¹⁵Mabanglu kung anti ing kanela, sasalingalngal anti ing mira o ing gilbano o ing mabanglung insenso king banal nang Tolda.

¹⁶Anti ing tanaman a ensina lalabung lang kakung sanga; malagu la at makayama.

¹⁷Anti ing tanaman a ubas dakal ku suli, at malagu la. Ding kakung sampaga maging marangal la at maligayang bunga.

¹⁹Lumapit ko kaku ikong magnasa kaku, at karing bunga ku magpakabsi kayu.

²⁰Aganaka yu ku anti ing pulut a mayumu, maygit king pulut-panilan.

²¹Detang makatakman kaku parati lang bisa, at detang makainum kaku parati lang kakau.

²²E la mipakarine detang mamintu kaku, at detang tutupad e la manabu king pamikasala.

²³Ing Kabiasnan ya ing Kautusan, ing Kautusan a patupad nang Moises kekatamu, ing kasunduan ning Dios a Kakataskatasan, ing mana da ring memalen ning Israel.

²⁵Nung makananu yang mamagus a danum ing Ilug ning Pison makanyan ya namang mamagus a kabiasnan ing Kautusan. Anti ya king Ilug ning Tigris king panaun ning pamamupul.

²⁶King Kautusan sisibul ing beluan, maglapo anti ing Ilug ning Eufrates, anti ing Ilug ning Jordan king panaun ning pamamupul.

²⁷King Kautusan la sisibul ding mayap a turu, anti ya king Ilug ning Nilo at ning Gihon king panaun ning pamamupul ubas.

²⁸E ne lubus balu ning minunang taung melalang ing Kabiasnan, at e nia naman abalu ning katataulian a tau.

²⁹Uling ding kaisipan na malapad la kesa king dagat at malalam la ding pamalak na kesa king pekamalalam a danum lalam ning yatu.

³⁰Aku naman, anti ku king paligi a daralanan ning danum ning ilug papunta king malagung hardin.

³¹Nasa ku mu ing paranuman ya ing kakung hardin at diligan ding tamnanan a maniampaga. Oneng e miglambat meging ilug ya ing paligi at ing ilug meging dagat ya.

³²Gawan keng pasibayung masala ing kakung kabiasnan, masala anti ing aldo saslag neng abak ban mayakit ya ing sala na angga karing marayung lugal.

³³Anti ing ula, ibulalag ku at ibie mana ing kabiasnan karing tuki-tuking lahi.

³⁴Wa, ing kakung kapagalan e mu para king sarili kung kapakanan nune para kareta yang manintun kabiasnan.