Read Kapampangan Sirach 25 Bible Online

Sirach 25 - Kapampangan bible

Sirach 25

¹Ating atlung bage a kakung katulan, ding bage a katanggap-tanggap king Dios at karing tau. Ila deti: ding mikakapatad a mikakasundu, ding misiping bale a mikakaluguran, at ding miyasawang mikalugud.

²Atin namang atlung uring tau a e ku atanggap at tutu kung kasaman ing karelang dapat. Ila deti: ing pakakalulung mapagmatas, ing mabanding malaram, at ing matuang lalaking mangmang a mahilig king pita ning laman.

³Kailangan ing magaral ka kabang anak ka, uling iti e mu na arapat potang matua na ka.

⁴Makawili yang lalawan miyabe-abe ing maputing buak at ing kayatulan a alang pamangabiran at mayap a turu.

⁵Ing Kabiasnan, ing beluan, at ing mayap a turu makabage la king tutua king idad at karing taung kagalang-galang.

⁶Ing dakal a sibukan ya ing korona da ring makatua, at ala lang malyaring ipagmaragul nung e mu ing takut da't kagalangan king Ginu.

⁷Ating siam a tau a para kaku ila ding pekamasayang tau, at atin pang metung a idagdag ku. Ila deti: itang pengari a maligaya uli ding anak na, itang akit na lang mibagsak ding kalaban na,

⁸ing lalaking mekatagpung mayap a asawa, ding miyasawang mibabage ugali, ing taung e mikakasala king pamagsalita na, ing taung e makipagobra king taung mababa pangatau,

⁹itang mekatagpung tune tapat a kaluguran, ing taung matula rang pakiramdaman ding kalupa nang tau,

¹⁰at ing tune maligaya ya itang mekatuklas kabiasnan. Oneng ing lalung maligaya kareti ngan ya itang ating takut at kagalangan king Ginu.

¹¹Ala yang kalupa ing taung anti kaniti, uling ing takut at kagalangan king Ginu ya ing maulagang dili keti king yatu.

¹³Ing maplas diling sugat ya ing sugat king pusu. Ding mabayat diling problema ila ding pasari da ring babai.

¹⁴Ing masakit diling kasakitan ya ing kasakitan a pepasari na ning kalaban a masama keka. Ing masakit dili ya ing pamanablas a depat na ning kalaban.

¹⁵Ing mabagsik diling lasun ya ing kamandag ning ubingan, at ing mabagsik diling mua a makamate ya ing mua na ning babai.

¹⁶Mas mayap ing manuknangan king bale a kayabe ing leon o ing dragon kesa king e mayap a asawa.

¹⁷Neng makasumpung ya ing asawang babai manaliwa ya itsura angga king maglupa ya king muang animal a oso.

¹⁸Makipangan ya karing kasiping nang bale ing asawa na at karin na bubugnus ing sukal ning lub na.

¹⁹Ala lang kalupa ding kaligaligan a pasari ning babai. Sana kamtan da ring anti kareting babai ing mangaintulid karing palpikasala.

²⁰Mengari ya ing tahimik a lalaking mekapakiasawa king babaing masalita king matuang lalaking mumukiat king bunduk-bundukan a balas.

²¹E ka paisira buntuk king malagung babai o ing pagnasan ya uling mabandi ya.

²²Neng ing babai ya ing manintunan ban pakanan ne ing asawa na, mikamuan ya at mangapakarine ampon mapalmura ing lalaki.

²³Sakit lub, maslam a lupa, at kabiguan ing pasari ning e mayap a asawang babai. Ing mangaina gamat at mainang tud ila ding tanda ning lalaking e maligaya king babaing ayasawa na.

²⁴Megumpisa ing kasalanan king metung a babai, at king uli na mate ta ngan.

²⁵E mu paintulut tumulu ing danum king lulanan, lalu meng e paintulutan ing sakupan na ka ning e mayap a babaing kekang asawa.

²⁶Kawanian me, nung e bisang pasakup keka.