Read Kapampangan Sirach 27 Bible Online

Sirach 27 - Kapampangan bible

Sirach 27

¹Dakal la deng mamirait ba lang magtubu; nung bisa kang mibandi kailangan ing ala kang konsiensia.

²Masakit ilako ing kapamiraitnan king pamisaliwanan, uling anti yang tulus a mesipit pilatan ding aduang batu.

³Nung e lubus ing takut mu king Ginu, e lumuat mibagsak ya ing bale mu.

⁴Potang ikusug me ing panialak ing malakuan ya ing dinat. Makanyan munaman king tau, neng magsalita ya lunto ing kakulangan na.

⁵Masusubuk la king ornu ding kuran a gewa ning taung gagawang kuran. Masubuk ne man ing tau king sasabian na.

⁶Makilala ya ing masese tanaman karing bunga na; ing atyu king lub ning tau mayakit ne man karing amanung sasabian na.

⁷E me agad pupurian ing tau anggang e me dimdam migsalita, uling makanyan yang makilala.

⁸Nung bisa kang maging tapat, maging tapat ka at isulud meng anti ing malagung imalan.

⁹Ding ayup a miyuyuri miyabe-abe la, at ing katapatan datang ketang bisang maging tapat king dapat na.

¹⁰Manaya ya ing kasalanan ketang darapat kasalanan; anti yang leon a manenayang tikma king paglaklakan na.

¹¹Parating makabaldugan ing pamagsalita da ring taung banal, oneng ing king mangmang manaliwa yang anti ing bulan.

¹²Agad mong lakuan deng kasabi mung mangmang; neng tau lang ating kabiasnan manatili kang makiramdam.

¹³Makasorang pakiramdaman ing sasabian da reng mangmang; gagawan dang biru at pikaylian pati ing mabayat a kasalanan.

¹⁴Mangilabut ka neng maniumpa la at managkas. Inya takpan me ing balugbug mu neng mipapate la.

¹⁵Miyangganan king pamipatayan ing pamipate da ring palalu; makasorang pakiramdaman ing karelang pamipanagkasan.

¹⁶E ka malyaring pagkatiwalan at e ka mika tapat a kalugaran nung bubulalag mu ing sukat ilihim.

¹⁷Luguran me ing kakaluguran at maging tapat ka king kekang kakaluguran; nung ibulalag mu ing lihim na, kalinguan mu nang atin kang kakaluguran.

¹⁸Pete mu na ing pamikalugaran yu antimo nung makananu neng pete ning metung a tau ing kalaban na.

¹⁹Ala ne ing kekang kakaluguran. E mu ne malyaring ibalik pa a anti ing ayup a mebulus king aula.

²⁰E mu ne pupuntalan pa; marayu ne keka. Ala na yung anti ing usa a mikalabius king bitag.

²¹Malyari yang uluan ing sugat at patawaran ing insultu, oneng ala kang kapanayan nung kekang bilalag ing lihim.

²²Atin yang nasang e mayap ing taung pakindat-kindat, at king babalakan na alang makasabat.

²³Makawili ya neng kapagsalita me at pamurian na ka. Oneng kagulut mu aliwa na ing paniabian na, at ing kekang sinabi ibaligtad na ngan laban keka.

²⁴Ala kung aliwang kasusumamian a tau nung e mu ing anti kanitang tau, at kasusumamian nia naman ning Ginu.

²⁵Iyatsa meng batu babo at magbalik ya keka. Nung maniugat ka, masugat ka naman.

²⁶Ding taung manumang bitag ila mismu ding mararakap king karelang bitag.

²⁷Ing depat mung e mayap, magbalandra munaman keka at e mu man balu nung nu ibat.

²⁸Gagamitan na ning taung palalu karing kalupa nang tau ing pamamiru at pamaninsultu, oneng anti yang leon a manenaya itang parusang tanggapan na.

²⁹Detang matutula king pangabagsak ding banal manakbag no man king bitag, at tune lang misakitan bayu la mate.

³⁰Ing mua at ing sama ning lub kakung kasaman, oneng karing makasalanan ila ding karelang penugalian.