Read Kapampangan Sirach 32 Bible Online

Sirach 32 - Kapampangan bible

Sirach 32

¹Nung mepili kang lukluk king kabisera ning lamesa e mu pagparangalan; manugali ka sanang anti ding aliwang kumbiradu. Lawan mu la pa at panayan ding aliwa bayu ka lukluk.

²Lukluk na ka kabud atuparan mu ing kekang katungkulan, at makipagsayang kayabe ra. At mapuri ka uli ning mapinu mung ugali.

³Nung ika ing pekamatua karela, atin kang karapatan magsalita. Oneng balu mu sana ing kekang sasabian at e mu abalanan ing musika.

⁴At nung ating palage e ka salita nang salita; aliwa ita ing oras ban pakit ing mas magaling ka.

⁵Anti ya ing musika king bangketi king rubi a mitampuk king gintung singsing.

⁶Ing musika at ing maniaman a alak anti ya king batung esmeraldang mitampuk king gintung singsing.

⁷Agyang kayanakan ka pa, malyari kang magsalita, nung kailangan o bilang pakibat king kutang. At makagyu na ing aduang besis.

⁸E mu na pilindu-lindu pa ing buri mung sabian; ipakit king dakal ka balu oneng ditak ka amanu.

⁹E mo lalawan ing kasingpara mu la ding kagalang-galang a tau, at e ka salita nang salita kabang ating magsalita.

¹⁰Antimo ing kildap, mumuna ya king duldul; makanyan munaman, balu mu ne kayapan ing pikabaluan a tau bayu me akatagpu.

¹¹Potang yari na ing katatagan agad na kang mamun; e na ka maglambat pa at taglus-taglus na kang muli.

¹²Keta kekayu na ka maglibang, oneng pangilagan mu ing pamagmayabang ban e ka mikasala.

¹³At e me kakalinguan pasalamatan ing Linalang keka, ing minie mayap a bage keka.

¹⁴Tanggapan mu ing pamaniupil ning Ginu, nung atin kang takut at kagalangan king Ginu. Bendisyunan ne ning Ginu itang maranun migigising neng abak ban manalangin.

¹⁵Abalu ne ing kautusan ning taung manintun king Kautusan. E me atagpuan, nung e ka laus a lub.

¹⁶Abalu mu ing matulid, nung atin kang takut at kagalangan king Ginu, at sunlag ing dapat mung mayap anti ing sulung masala.

¹⁷E na tanggapan ning makasalanan ing turuanan me, at dinan nang matulid ing nanumang buri nang daptan.

¹⁸Kilalanan na ning taung ating matinu isip ing nanumang pisasabian a maulaga, oneng e me asabat ing taung palalu king buri na.

¹⁹Pakaisipan me pang mayap ing nanumang bage a buri mung daptan ban e ka sumisi king katataulian.

²⁰E ka lalakad king mabatung dalan ban e ka matisud king kekang pamaglakbang.

²¹Maging maingat ka mu rin agyang patag ya ing dalan.

²²Parati mung lalawan ing kekang daralanan.

²³Mingat ka king nanumang kekang daraptan; iti ya ing buri nang sabian ning pamamintu karing kautusan ning Ginu.

²⁴Pamintuan na la ning maniwala king Kautusan ding kautusan, at nung ing Ginu ya ing panaligan na e ya numanu balang.