Read Kapampangan Sirach 35 Bible Online

Sirach 35 - Kapampangan bible

Sirach 35

¹Ing pamanupad king Kautusan katumbas ne ning dakal a ain, uling ing pamamintu karing utus anti na king minie karing ain-ning-pamisulusulu.

²Ing pamangilalang utang a lub anti na king pamamie king masanting diling arina, at ing pamamie limus karing kalulu anti nang pamamie ain-a-kapasalamatan.

³Tutula ya ing Ginu ngening kekang pangilagan ing e ustu, at ing pamakilaban king keyalan hustisia metung nang lakbang ban ing kekang kasalanan mipatawaran.

⁴Oneng e ka lulub king Templo a alang daralan a ain,

⁵uling aduan ning Kautusan ing magdala kang kekang ain.

⁶Neng babie ne ning taung makatuliran ing ain na, ing banglu ning taba a maduduluk king altar miraras king arap ning Kakataskatasan.

⁷Katanggap-tanggap ing ain na at iti e makalinguan king kapilan pa man.

⁸Samban me ing Ginu king kapamilatan ning pamamie mung ain; e mo pagkaimut king Ginu ding mumuna mung pupul.

⁹Atin ya sanang timan ing kekang lupa neng yayain mu la; masaya ka sana neng babie mu la ding kekang sikapulu.

¹⁰Munie ka king Kakataskatasan king anggang agyu mu antimo nung makananu yang mamie keka.

¹¹At ing Ginu siguradung ablasan na ka; maygit pitung besis ing iyablas na keka.

¹²Oneng e me susuhulan ing Ginu uling e na tanggapan, at e mo panaligan ding ain a e mayap a panibatan. E ya mangabiran ing Ginu uling ya ing ukum.

¹³E ya masama karing kalulu; pakiramdaman ne ing ninumang meyalipit neng manalangin ya.

¹⁴Papansingan na la ning Ginu ding ulila at ding babaing mebalu neng manalangin la.

¹⁵Ing luang tutulu king pisngi ning babaing mebalu kukulisak laban ketang pepasari king keyang kaguluan.

¹⁶Maramdam ya itang matulang susuyu king Ginu; mipakibatan lang panalangin na.

¹⁷Lalagpus la king biga ding panalangin na ning taung mapagpakumbaba angga king miras la king Ginung Kakataskatasan. E ya patugut anggang e ne pansingan at dinan king hustisiang mangaintuliran.

¹⁸Agad ne mang kimut ing Ginu; e na la malyaring pibatan ding dinapat e ustu. Ganap na lang ablasan ding alang lunus at ding paganung bansa. Lubus na lang gisanan a lahi ding palalu at paklian na ing upaya da ring taung e mayap.

¹⁹Ibie na king metung at metung itang mangaintulid king depat na at pignasan. Uli na ning lunus ning Ginu, tumula la ding memalen na potang atulan na la.

²⁰Anti ing uran a panenayan neng maleldo, makanyan panenayan ing lunus ning Ginu king oras ning kaguluan.