Read Kapampangan Sirach 38 Bible Online

Sirach 38 - Kapampangan bible

Sirach 38

¹Ibie king doktor ing kagalangan a mangaintulid, uling ing Ginu ya ing linalang king doktor.

²Ibat king Kakataskatasan ing gelingan nang pakayap, at parangalan de ring ari.

³Maulaga ing katungkulan na ning doktor uli ning kabiasnan na, at lalawan deng matas ding atyu king kayupayan.

⁴Ibat king gabun, linalang yang panulu ing Ginu, at e ya sukat mikakunu ing tau a gamitan na iti.

⁵E wari ing danum a mapait meging danum a malyaring inuman king kapamilatan ning kapirasung dutung ban mipakilala ing kayupayan ning Gino?

⁶Atin taung dininan nang kabiasnan ning Ginu ban purian ta ya uli da reting taung biasang gawang panulu.

⁷Piyalu-alu na ning parmasyotika ban gawan panulu, at gamitan na ning doktor ban uluan ing sakit.

⁸Alang tuknang ing pamagobra na ning Ginu, ing mimingat karing tau ning yatu ban e la mika kapanamdaman.

⁹Anak ku, neng sasakit ka, iti agad mung lingapan. Manalangin ka king Ginu ba na kang pakayapan.

¹⁰Sisian mu ing sablang kakulangan mu at magbayu kang dalan; linisan me ing pusu mu king sablang kasalanan.

¹¹Miyain kang insenso at ain-a-binutil agpang king agyu mu.

¹²Kaybat na nita, parakit me ing doktor a lelang ning Ginu; e me palakuan uling keka yang kailangan.

¹³Ating oras a ing pangapaldan mu atyu king gamat na.

¹⁴Manalangin ya ing doktor king Ginu ba neng patnubayan king pamanulu na ban asagip ne bie ing uluan na.

¹⁵Ing taung mikasala laban king Linalang king bie karapatdapat ing sakit ya.

¹⁶Anak ku, manangis ka neng ating mete tau. Kumiak ka at manangis ban ipasiag ing kekang kalungkutan. Piblasan me ing mete agpang king makatud a paralan at makipaglibing ka.

¹⁷Manangis kang kapait-paitan at kumiak kilub ning metung o aduang aldo ban ala lang asabi deng tau. Kaybat na nita, pamatulan mu na ing sarili mu.

¹⁸Ing labis a kalungkutan makasira king katawan at pota ikamate mu.

¹⁹Paburen manatili saguli ing kalungkutan king mete pakamalan, oneng e ustu ing gawan na kang pakakalulu.

²⁰E ka paisaul king pamagmalun; kalinguan mu uling mate tamu ngan.

²¹E mu kakalinguan king e ne pasibayung makapagbalik ing mete. E nia naman asaupan ning kekang pamangiak; pota ika pa ing misakitan.

²²E mu kakalinguan king ika man mate kang kalupa na. Ya ngeni ing mete; bukas ika.

²³Potang ing mete mibili ne king tauli nang pagkabilian, tuknang na ka kanitang paibalisa; e mu ne pigaganakan pa. Paburen mu neng mipayapa.

²⁴Sukat yang ating panaun ing magaral ban mabiasa ya. Sukat yang alang obrang pakibatan ban lubus yang makapagaral.

²⁵Makananu yang mabiasa ing sasarul nung ala yang aliwang gagawan nune mu ing sasarul at alang aliwang sasabian nung e mu ding sese nang animal?

²⁶Ala yang aliwang isipan nune mu ing matulid ing serul na king marangle, at ing mangumpe dikut anggang bengi ban pataban na lang sese nang animal.

²⁷Makanyan munaman ing kabilian ding magobra at ding mangagaling a pangamat a aldo't bengi mandukit at manabas ampon gugulis ban maging kalupa ne nitang buri dang lunto.

²⁸Makanyan munaman ing kabilian ning pande a makatalakad arap ning palian na at mimisip nung nanu ing daptan na king kapirasung bakal. Masasalab ya balat king pali kabang mipapawas ya. Mangaklak ya king kalaksing ding masu at mantilyu kabang ding mata na makalawe la king bakal a pagobran na. Mibabata ya ban mayari ya ing pagobran na, at e bala ing mabengi ya maging masanting ya sa ing gagawan na.

²⁹Makanyan munaman ing kabilian ning gagawang kuran. Makalukluk ya kilub ning patingapun arap ning pagobran na. Karing bitis na padurut ne ing gulung, at atyu king gagawan na ing mabilug nang pamisip ban atantia na nung nu anti ing ayari na.

³⁰Daramusakan de ring bitis na ing pila, at ding gamat na ila ding miyuyubug. Kaybat lamayan ne king api ning ornu ban lunto yang matibe at makintab ing gewa na.

³¹Mangagaling la ngan a gamat deting tau king obrang keyaus da.

³²Mitalakad ya ing siudad king uli ra; alang manuknangan o magbisitang tau nung e king karelang kasuyuan.

³³Oneng e da la yayabe king konsehu ning balen at e la tatalan matas a katungkulan. E da la gagawan ukum uling ala lang beluan king kautusan. E la megaral at e la biasang sumulat kasebian.

³⁴Oneng ila ding makapagmantini king yatu, at neng magobra la anti na lang manalangin.