Read Kapampangan Sirach 40 Bible Online

Sirach 40 - Kapampangan bible

Sirach 40

¹Dakal a kasakitan ing makapanaya king ninumang tau. Mabayat ya ing paud a makasulud king balang anak nang Adan manibat na king kabait na angga na king mibalik ya king gabun, ing ima ta ngan.

²Maliligalig ta ngan at mitatakutan king aldo paniatang ning kamatayan:

³magumpisa ketang makalukluk king marangal a tronu angga ketang makalukluk king alikabuk at abu,

⁴at pati na itang makaimalan mal a purpura at ating koronang makaputung king buntuk na angga na ketang makaimalan a magaspang.

⁵Kabang bie ra ding sabla daratangan no ning mua, ning diria, at ning problema. Tatakut tamu ngan king kamatayan, at parating balisa at makilaban. Agyang king kekatamung pagkeran neng bengi malilingasngas tamu at e mipapatudtud.

⁶Ditak mu ing tudtud tamu, nung mekatudtud tamu man. Agyang matudtud ta na e ta pa mu rin mipaynawa uli na ning makatakut tamung akakit karing kekatamung paninap a tatakas tamu karing kekatamung kalaban.

⁷At potang ararakap na na katamu ning kalaban kanita tamu migising, at akilala tamu king ala tamung sukat pitakutan.

⁸Oyni ing pakiarapan da ring sablang melalang, tau la man o animal (oneng pitung besis ing dalanan nang kasakitan ning makasalanan):

⁹ing kamatayan at ing katampalasanan, ing pamakipate at ing espada, ing kapahamakan, ing danup, ing kasiran, at ing sakit a makapanawa.

¹⁰Linto la deti uli da ring darapat e mayap; ila ding makipasari king maragul a albug.

¹¹Mibalik king gabun ing sablang ibat king gabun antimo ing danum a mamagus papunta king dagat.

¹²Mawala ing sablang ibat king suhul at king keyalan hustisia, oneng ing katapatan manatili kapilan man.

¹³Ing pibandian a ibat king e ustung paralan mamala ya anti ing sapa, matda anti ing duldul neng mumuran.

¹⁴Uling masikan ing agus tutuki la ding batung daralanan na, oneng kabukasan malangi ne at alang laman.

¹⁵E ya dakal ing lahi da ring taung e mayap, anti ya king yamut ning tanaman a atyu king gabun a mabatu.

¹⁶Anti la naman king dikut a tutubu king pampang ning ilug; muna lang matibag kesa karing aliwang tanaman.

¹⁷Oneng e makalimbatawan ing kayapan; manatili ing katuliran king kapilan pa man.

¹⁸Mapalad ya ing taung sapat a kabiayan o ating kapanintunan, oneng lalu yang mapalad itang makakulkul king makasalikut a pibandian.

¹⁹Manatili ya lagyu ing pengaring maki anak o ing taung mitalakad king balen, oneng lalu yang mayap ing mekatagpu king Kabiasnan. Mibantug ya ing ating dakal a baka at ing dakal a mulahan ubas, oneng lalu yang maulaga kareti ing ating mayap a babaing asawa.

²⁰Babie yang saya king tau ing alak at ing tigtigan, oneng maygit ya kareti ing lugud king Kabiasnan.

²¹Makawiling daramdaman ing musika ning plauta at alpa, oneng lalu yang makawili ing malagung siwala.

²²Makawili yang lalawan ing malagu at ing masanting a katawan, oneng lalu lang makawiling pagumasdan ding sagiwang tanaman king marangle.

²³E ka magkamali nung ing abe mu mayap yang kakaluguran o kasiping bale, oneng maygit ya kareti ing asawang babaing biasa.

²⁴Mayap ing ating kapatad at kapanalig a sasaup king oras ning pamangailangan, oneng lalung mayap ing babie limus karing kalulu.

²⁵Babie yang kapanatagan ing gintu at ing pilak, oneng lalu yang matimbang ing mayap a payu.

²⁶Babie yang kapanatagan a lub ing pibandian at ing sikanan, oneng lalu yang makaibie kapanatagan a lub king tau ing takut at kagalangan king Ginu. Potang iti atyu keka ala na kang pigaganakan pa; ala na kang kailangan pa.

²⁷Ing takut at kagalangan king Ginu mengari ya king malabung a hardin a mibendisyunan at maygit ya iti king nanumang parangal.

²⁸Anak ku, e ka sa mabibie king kapamilatan na ning pamagpalimus; lalung mayap ing mate kesa king magpalimus ka.

²⁹Nung ing asahan mu ing makikipangan karing aliwa, kanita e ka tune mabibie king bie mu. Sisiran mu ing sarili mu king kapamilatan ning pamagpalimus mung pamangan karing aliwa. Iti pangilagan na ning taung ating pegaralan.

³⁰Gagawan nang mayan ning taung alang marine ing pamagpalimus, oneng malagnat ya kilub nang pilubluban.