Read Kapampangan Sirach 41 Bible Online

Sirach 41 - Kapampangan bible

Sirach 41

¹O kamatayan, kapait na king taung makaganaka keka a mabibie maligaya at magtamasa king pibandian na o king taung alang problema at magana king pamangan na.

²O kamatayan, ing kekang kayatulan matula nang tanggapan ning taung atyu king kakaluluan, ing maina na katawan, ing matua na, ing kababayatnan karing dakal a problema, ing bulag, at ing ala nang kapanayan.

³E ka tatakut king kayatulan ning kamatayan. E mu la kakalinguan detang minuna nang mete keka at detang katuki mu.

⁴Tikda ning Ginu ing kamatayan karing sablang mabibie lelang na. Ala kang matulid tumutul king kaburian ning Kakataskatasan. E maulaga king tuknangan da ring mete, nung mebie kang apulung banua o dinalan a banua o libung banua.

⁵Lahi lang pikakasaman ding anak da ring makasalanan; meragul lang kayabe ding darapat e mayap.

⁶Mawawala ing karelang amana at mainsultu la ding anak ding karelang anak king kapilan pa man.

⁷Ding pengari dang alang Dios a katawan ila ding karelang pamarsalanan king karelang keyalan dangalan.

⁸Makalunus kayu, ikong alang Dios a katawan a tinanggi king Kautusan ning Kakataskatasan.

⁹Mibait kayung kakambal ing sumpa at mate kayung kayabe ing sumpa!

¹⁰Mibalik king gabun ing sablang ibat king gabun; misumpa la detang alang Dios a katawan at tanggap lang kasiran.

¹¹Pagkalungkutan da reng tau ing pangamate ning katawan, oneng mabura la ngan ding lagyu da ring alang Dios a katawan.

¹²Ingatan me ing kekang lagyu uling magluat yang maygit karing libu-libung pirasung gintu.

¹³Mapalyaring makuyad la ding aldo ning mayap a bie, oneng manatili ya kapilan man ing mayap a lagyu.

¹⁴Kakung anak, tuparan yu ing turu ku at mibiebie kayung payapa. Nanung ulaga na ning makasalikut a kabiasnan at ing makakutkut a pibandian?

¹⁵Mas mayap ing isalikut ing kamangmangan kesa king kabiasnan.

¹⁶Inya oyni ing batayan nung kapilan kayu sukat dumine, agpang king turu ku, oneng ating bage a e kayu sukat dumine.

¹⁷Dumine ka, nung dinapat kang bage imoral king akakit ding pengari mu o migsalitang kalaraman arap ning pamuntuk o ning marangal a tau.

¹⁸Dumine ka, nung dinapat kang krimen arap ning ukum. Dumine ka, nung linabag ka king kautusan king arap ning kapulungan ding tau. Dumine ka, nung e ka meging tapat king kekang kasosyu o kakaluguran.

¹⁹Dumine ka arapan ding kasiping mung bale, nung menako ka. Dumine ka, nung e ka tinupad king pengaku mu. Dumine ka, nung ala kang modu arap ning pamangan o maimut neng ating maniawad keka.

²⁰Dumine ka, nung e ka biasang manatu karing manatu keka. Dumine ka, nung keka lang lalawan deng babaing magtinda king katawan da.

²¹Dumine ka, nung e me sinaupan ing kekang kamaganak, nung kinua mu itang mangaintulid king kalupa mung tau o nung pagnasan me ing e mu asawa.

²²Dumine ka, nung keka yang pagnasan ing ipus nang babai; e ka lalapit man king keyang pagkeran. Dumine ka, nung keka lang insultuan ding kekang kakaluguran o dakal ka sasabian kaybat mung minie regalu.

²³Dumine ka, nung mangalat kang indredus o mibubulalag king lihim a sukat e mabalu. Kaniti abalu mu ing tune makarine, at galangan da ka ring tau.