Read Kapampangan Sirach 42 Bible Online

Sirach 42 - Kapampangan bible

Sirach 42

¹E kailangan ing mikasala ka uli ning takut mu king sabian ding tau. Ating mapilan a bage a e sukat ikarine. Ila deti:

²ing Kautusan ning Kakataskatasan at ing kasunduan na, ing pamanatul a alang pamangabiran karing dinapat e ustu,

³ing pamanguang dake king gastus king kayabe mung maglakbe o kasosyu king negosyu o ing ating dake king mana,

⁴ing pamangamit ustung timbangan at paniukad,

⁵ing manakitan king kekang kapanintunan, ditak ya man o dakal, ing makitawaran king magtinda, ing barugan ya ing anak ba yang ituru king mayap, ing barugan ya ing e mayap a ipus agyang pang masugat ya.

⁶Gumamit kang susi o kandadu, nung ala kang tiwala king kekang asawa o nung dakal lang malikut a gamat.

⁷Bilangan mu o timbangan ing pibandian a panilas mu, at ilista ing nanumang babie mu o nanumang tatanggapan mu.

⁸E mu pikakarine ing ituru me king ustu ing e megaral at ing mangmang o bawalan ing matuang lalaking mahilig karing babaing magtinda king katawan da. Iti ngan mayap a turu, at nung tukian mu, galangan da ka ring dakal a tau.

⁹E na balu ning anak a babai king sakit neng buntuk tata na; e ya mipapatudtud kabukas ing tata king pamigaganaka na king anak nang babai. Nung anak ya pa, pigaganakan ne uling pota tumua ya at e ya makapakiasawa; nung talasawa ya, pigaganakan ne uling pota e ya maligaya.

¹⁰Nung dalaga ya, pigaganakan ne uling pota masira ya pangababai at muktut ya kabang atyu ya king bale na. Nung talasawa ne, pigaganakan nia mu rin pota magtaksil ya king asawa na o e ya mikayanak.

¹¹Nung masias ya buntuk, pakabanten me ban e ra ka insultuan ding kekang kalaban o pagindredus ding tau. Kanita mangapakarine ka.

¹²E mu paintulut ing malapit ya karing lalaki o ing makipagindredus ya karing kalupa nang babai.

¹³Nung makananu neng ngangatngatan ning ipas ing imalan makanyan lang mipapanyira ding babai karing kalupa rang babai.

¹⁴Maygit yang mayap ing e ustung ugali ning lalaki kesa king kayapan ning babai; pasari lang kamarinayan at keyalan dangalan ding kebabainan.

¹⁵Buri ku la ngening ipaganaka keka ding dapat ning Ginu, at ilarawan ding bage ikit ku. King kapamilatan ning amanu ning Ginu linto ing sabla keti king yatu, at king utus na mamintu la.

¹⁶Aslagan ning sala ning aldo ing sablang melalang, inya mangatmu king ligaya ing lelang ning Ginu.

¹⁷E na la dininan upaya ning Ginu agyang ding anghel na ban ilarawan ding makapagmulala nang dapat. Wa, dininan na lang upaya ban talakad arap ning maligaya nang kamalan.

¹⁸Atataruk ne ing kalalaman ning dagat, at ing pusu ning tau; balu na ing karelang lihim. Balu na ning Kakataskatasan ing sablang bage kabiasnan, at ing tanda ding panaun.

¹⁹Sasalita na ing panaun a milabas at ing daratang, at lalage na ing makasalikut a lihim.

²⁰Balu na ngan ing sablang kaisipan, at daramdaman na ing balang amanung lulual king asbuk tamu.

²¹Inayus na ngan ing sablang makapagmulala nang lelang ning kabiasnan na; ya ing alang angga at manatili yang alang angga. Ala kang abawas at adagdag pa; e na kailangan ing turu ning ninuman.

²²Malagu ing sablang lelang na pati ing malating aslag.

²³Iti ngan manatili, at ing metung at metung atin yang parasan.

²⁴Ating kaparis iting sablang melalang, ing kabangkilas na makayaliwa ya; alang kulang king lelang na.

²⁵Palabungan ne kayapan ning metung ing metung at metung. Ninu ing sumawang maglalawe king ligaya na?