Read Kapampangan Sirach 43 Bible Online

Sirach 43 - Kapampangan bible

Sirach 43

¹Kalagu nang lalawan ing alang ulap a meto sikluban! Kalagu nang lalawan!

²Pawaga ning saslag a aldo ing ligaya na, king makapagmulala ya ing balang bage a lelang ning Kakataskatasan.

³Palangian nang gabun neng gatpanapun; alang makapibata king matinding pali na.

⁴Sisilaban na la ning lalbug a aldo ding bunduk-bundukan, anti yang bakal a ornu a miraralakdak king pali. Parala yang sinag a makabulag uli ning milalu nang aslag.

⁵Ing Ginung kaniti linalang tune yang maula; king utus na mamirapal yang daratang.

⁶Ya naman ing linalang king bulan ban tulduan na, at pirakayan ing panaun king kapilan pa man.

⁷Ing bulan ya ing mitatakda karing aldo pangilinan. Maging ganap yang masala, kaybat ing aslag na lating tunggal ditak.

⁸Ing bulan ya ing babie lagyu karing bulan, makapagmulala yang lalawan neng benging bibilug ya, ing tanda karing sundalus ning banua, saslag a masala king suklub ning banua.

⁹Ding masalang batuin, ilang babie leguan king banua, malagu lang palamuti ning matas nang banua ning Ginu.

¹⁰King utus ning Dios menatili la king lugal da, at e la magpalya king pamagbante ra.

¹¹Lawan ye ing pinanari, at purian ya ing linalang kaniti! Makapagmulala ing leguan na.

¹²Anti yang arku king banua; inubug de ring gamat ning Kakataskatasan.

¹³King utus ning Ginu muran yelu; king amanu na gumulis yang kildap ban tuparan ing kayatulan na.

¹⁴Potang abuklat na lang silid nang pisisinupan, lumual lang ulap a anting susulapo ayup.

¹⁵King upaya na miyuyubug yang punggul-punggul a biga, at panaspakan nang yelu ban maging uran a manabu.

¹⁶At potang datang ya bunduk gagalgal la; potang magsalita ya lulual ing duldul, at mangasayukut ya ing yatu king sakit.

¹⁷Neng buri na, tumiup ing angin ning mauli, datang ing alisus, at ing bagyu ning norti. Anti ding ayup a susulapo sasalbag nang uran yelu, at anti ding durun dugpa king gabun.

¹⁸Mangapamulala lang mata, king puti ning leguan na, ing isip magtaka ya neng mananabu na.

¹⁹Anti ing asin bububud nang yelung mesias king gabun, at maging anti lang tulus a matilus.

²⁰Neng ing angin king norti tutiup maging yelu ing danum; ding ilug at batis anti lang mibalutan kristal.

²¹King pali lalangi lang tanaman karing kabundukan, at pati na ing dikut.

²²Oneng pasibayu na lang pasagiwan potang ing uran datang, at ing lisangan miyalilan, at neng laganap ing ambun.

²³King kabiasnan na patahimikan na la ding malalam a dagat, at kareti tatanam na lang pulu.

²⁴Ing panganib king dagat babalita da ring maglayag, at mangapamulala tamu ngan king karelang sasabian.

²⁵Dakal lang e pangkaraniwan at makapagmulalang melalang ding mabibie king dagat, miyayaliwa la at mangaragul la pa.

²⁶Ing metung at metung karing tubud na magtagumpe ya king lakad na; miyugne-ugne ing sabla uli ning amanu na.

²⁷Agyang sabian ta ngan, makanyan man e tamu rin agisan. Muli mu ing amanu tamu king anti kaniti: Ing Ginu ya ing heganagana.

²⁸Makananu tamung mika sikanan ba ta yang apurian? Maygit ya kesa karing lelangan na.

²⁹Ginu yang alang kalupa king degulan; makapagmulala ing upaya na.

³⁰King anggang agyu yu purian ye ing Ginu, maygit ya king agyu yung sabian. Agyang kekayu yang purian king mabilug yung sikanan, at e manamdaman kapagalan, makanyan man kulang pa mu rin yan para king keyang kamalan.

³¹Ninu ing menakit king Ginu ban ilarawan ya? Ninu ing makapuri king Ginu agpang ketang buri na?

³²Dakal lang mangaragul a bage a maygit kesa kareti, at ditak mu ing kekatamung beluan karing depatan na.

³³Ing Ginu ya ing linalang king heganagana, karetang tapat babie yang kabiasnan.