Read Kapampangan Sirach 44 Bible Online

Sirach 44 - Kapampangan bible

Sirach 44

¹Purian ta la ngeni ding makatua tamung pikabaluan king sarasarili dang kapanaunan.

²King mitmung ligaya deting lalaki perangalan na la ning Ginu, at king kapamilatan da ing upaya ning Ginu mipakilala manibat na kanitang minuna.

³Ding mapilan karela kayarian lang pemahalan da, at meging pikabaluan la king karelang upaya. Ding mapilan naman bantug lang talaturu ampon propeta ning Dios.

⁴Ating karelang meging talapanimuna da ring karelang kabalen, pamuntuk a pepatupad tuntunan, talaturu king mangayap a aral, at magaling karing talimhaga.

⁵Atin karelang ginawang kanta at sinulat poesia.

⁶Ating mika dakal a pibandian at kayupayan a mibiebie payapa karing karelang bale.

⁷Ila ngan meging bantug la king sarasariling panaun da, at ginalang ding tau karing aldo ra.

⁸Atin karelang e da kalinguan ding tau, inya angga ngeni mapupuri la.

⁹Atin namang e ra na atatandanan, mete la at mekalinguan pati na ding anak da.

¹⁰Oneng e makanyan karing kekatamung makatua, uling lalaki lang mitmung katapatan; e tamu malyaring kalinguan ing mayap a karelang depat.

¹¹Ing mayap dang pangatau milipat karing karelang apu, at iti ya ing karelang maging manang pibandian.

¹²Isundu reng tuparan ing kasunduan deting karelang lahi, uling tiparan de ring karelang makatua.

¹³Manatili ya kapilan man ing karelang lahi, at e makalinguan ing karelang kabantugan.

¹⁴Mikutkut na la ding karelang mete katawan, oneng ing mayap dang likuan mabie king kapilan pa man.

¹⁵Isalita da ring tau ing karelang kabiasnan, at ding memalen ning Dios karela munie lang kapurian.

¹⁶Mibiebie ya i Enoc agpang king kaburian ning Ginu at midala ya banua. Meging alimbawa ya i Enoc king kapanisian para king sablang panaun.

¹⁷Meyakit king matulid ya at tapat i Noe. Ya ing penibatan da ring tau kaybat ning maragul a albug. King uli na ating miligtas a tau king albug.

¹⁸Ginawa yang alang anggang kasunduan ing Ginu kang Noe a kayabe ing pangakung e na ne paten pasibayu ing bie king kapamilatan na ning albug.

¹⁹Ing maulang diling tata da ring dakal a bansa ya i Abraham; ala yang kapintasan ing pangatau na.

²⁰Tiparan ne ing Kautusan ning Kakataskatasan at ginawa yang kasunduan kayabe na. Dela ne king katawan na ing tanda na ning karelang kasunduan. Mipatunayan king tapat ya i Abraham inyang mibili ya king kapagsubukan.

²¹Inya taimtim nang pengaku ning Ginu kang Abraham king maging bendisyun la karing bansa ding anak nang anti king alikabuk king karakal; king miparangalan la deti anti ding batuin; king miyabie karela ing karelang bansa, magumpisa ya king dagat at angga ya naman king dagat, manibat king Ilug ning Eufrates angga na karing wakas na ning yatu.

²²Alang-alang kang Abraham, makanyan munaman ing pengaku na kang Isaac: king bendisyunan ne ing mabilug a yatu king kapamilatan na.

²³Linipat ne kang Jacob iting kasunduan at dininan neng sarili nang bansa. Mepirake ya iting bansa para karing labing aduang tribu.