Read Kapampangan Sirach 46 Bible Online

Sirach 46 - Kapampangan bible

Sirach 46

¹Metung yang matapang a sundalus i Josue a anak nang Nun; ya ing kayalili nang Moises king pangapropeta. Mibiebie ya agpang king kabaldugan ning lagyu na antimong talapagligtas ding memalen a pinili ning Dios. Simbut na la ding kalaban a linusub karela, at sinakup ne ing gabun a mipangaku para king Israel.

²Makawili yang lalawan inyang tinas ne ing gamat nang ating espada laban karing siudad a kalaban.

³Ala pang meyakit a kalupa nang matatag king pamakilaban, uling ing pamakilaban na para king Ginu.

⁴Aliwa wari ya ing memigil king aldo, inya meging adua yang aldo ing patingapun?

⁵Minaus ya king Kakataskatasan a Dios inyang atyu la king misusumangid ding kalaban ban lusuban de, at pekibatan ne king kapamilatan na ning paniatang ning masikan a uran-lipat.

⁶Bigsak ning Ginu ing uran-lipat karing kalaban at megisan la karin king Bet Horon ban kilalanan da ring bansa nung nu ya kayupaya i Josue bilang tapat a talasuyu ning Ginu.

⁷Tapat ya at mapamintu i Josue king Ginu inyang kapanaunan nang Moises. Makanyan ya naman i Caleb a anak nang Jefune. Ila ding tinalakad matatag laban karing memalen a mig-rebeldi. At mepigil la ding tau king pamaniapat dang kasalanan.

⁸Uli na niti, i Josue at i Caleb ilang mitagan mabie karing anam a ralan a libung Israelitang meko king Ehipto at milub king gabun a mipangaku nung nukarin mataba ing gabun at labis-labis ing pamangan. At bindian de.

⁹Dininan neng sikanan ning Ginu i Caleb; masikan ya angga na inyang matua ne. Inya asakup na lang Caleb ding bulubundukan a tinggap na at karing meging lahi na.

¹⁰Uli na niti, ikit ning Israel nung nu anti ing kayapan na ning tapat tutuki king Ginu.

¹¹Kaybat na nita, ating linto ukum. Pikabaluan ya ing lagyu ning metung at metung king kapanaunan da. Lalaki lang ating pusung tapat at e taksil king Ginu.

¹²Purian la at e sukat makalinguan ing depat da. Mananu na sanang sagiwa la ding butul da king kutkutan karing lahi ra!

¹³Tutu neng pakamalan ning Ginu i Samuel. Bilang propeta na ning Ginu tinatag ne ing kayarian at ya ing tinuldu karing pamuntuk a manimuna karing Israelita.

¹⁴Pemahalan neng Samuel ing mabilug a Israel agpang king Kautusan na ning Ginu, at iningat ne ning Ginu ing Israel.

¹⁵Metanggap yang propeta i Samuel uli ning katapatan na. Penaligan de ring tau bilang propeta uli ning sasabian na.

¹⁶Kanitang atyu la king misusumangid da ring kalaban, minaus ya king Ginu at minie yang tupang pabanua tua bilang ain-sakripisyu.

¹⁷Kaybat na nita, mekibat ya ing Ginu king kapamilatan na ning masikan a duldul king banua,

¹⁸at pete na la ding pamuntuk da ring kalaban a Filisteo.

¹⁹Bayu dinatang ing kamatayan na, inaus ne ing Ginu at ing aring linian na ban saksian ing sabian na. Ngana, Ala kung kinuang nanumang pibandian na ning kalupa kung tau ni kaparis a sandalyas. At ala namang metung man a mekapagsalitang laban kang Samuel.

²⁰Agyang pang inyang mete ne inula na nung makananu yang mate i Aring Saul. Ketang kutkutan nang Samuel migsalita ya pa mu rin bilang propeta ban kalisan ing e ustung dapat da ring kabalen na.