Read Kapampangan Sirach 48 Bible Online

Sirach 48 - Kapampangan bible

Sirach 48

¹Kanita linto yang anting api i Elias; anti lang sulung milalablab ding amanu na.

²Ya ing pepasari king maragul a danup karing tau at dakal lang mete uli na ning pamagkapilit na.

³King amanu na ning Ginu pinigil na ing uran at atlung besis yang pepauran api.

⁴Elias, makapagmulala la ding depat mung milagru! Ninu ing kalupa mu karing depat mu?

⁵King lagyu ning Kakataskatasan pepasublian meng mebie ing mete a atyu na king kutkutan.

⁶Bigsak mu la king kasiran ding ari at ding pikabaluan a tau king sakit, at kaybat pepapuntan mu la king karelang kamatayan.

⁷Ika ing mekaramdam ketang babala ning Dios karin king Bunduk ning Sinai at karing parusang mipasiag king Bunduk ning Horeb.

⁸Ika ing miglania karing aring mepili ban mamarusa, at king propetang manalili keka.

⁹Miyukiat ka banua king kapamilatan na ning milalablab a alisus king karwaheng guguliutan ding milalablab a kabayu.

¹⁰Misulat king datang kang pasibayu king mitakdang panaun ban aruan ing mua ning Dios bayu maspak, ban pikasunduan la ding pengari at ding anak at ban pasibayu lang tipunan ding tribu nang Israel.

¹¹Mapalad la ding manakit keka at detang mete a linugud king Dios, uling ikami man mie kami.

¹²Misalikut ya i Elias king alisus, at mikatmuan ya i Eliseo king espiritu na. Alang ari a makapamatakut kang Elias inyang mabie ya, at ala munamang makapasuku.

¹³Arapat na ing nanumang bage at inyang mete ne makagawa ya pang milagru ing bangke na.

¹⁴Dakal ing milagrung depat na inyang mabie ya at pati na inyang mete ne.

¹⁵Makanyan man e la rin ginulut ding tau king dapat dang e mayap; e la bisang mibalik lub king Dios angga king mitabi la king bansa ra at mikalat king mabilug a yatu. Ditak na la mu ding mitagan karela a pemahalan da ring lahi nang David.

¹⁶Ating mapilan karelang dinapat ketang dapat a katanggap-tanggap king Ginu, oneng lalu lang meging makasalanan ding aliwa.

¹⁷Pepagawa na lang matibe Hezekia ding bakud nang pader ning siudad, at mibili yang depositung danum. Pepabusbus na la ding batung mangaragul king kapamilatan da ring bakal ban dalanan ning danum palub king siudad.

¹⁸King kapanaunan na kanita ya sinalake king siudad i Senakerib. Tiburan neng Senakerib ing pekawanan nang gamat a opisyal a ibat king Lakis, at belan ne niti ing Jerusalem at migsalita yang kapalaluan king pamagmayabang na.

¹⁹Meina la lub ding memalen at ginalgal la king takut; mengari la king babaing manganak king sakit a panamdaman da.

²⁰Oneng menalangin la king Ginung malunusan, ing Bukud Banal king banua. Agad nang pekibatan ing panalangin da at linigtas na la king kapamilatan na ning pamitubud na kang Isaias.

²¹Liban ne ning Ginu ing kampu da ring Asirianung kalaban at gisan na lang pete ning anghel na.

²²Depat nang Hezekia itang katanggap-tanggap king Ginu at migkapilit yang tinuki king mayap nang alimbawa ning makatua nang i David. Mekiramdam ya king payu nang Isaias, ing marangal a propetang pagkatiwalan da king sasabian na.

²³King kapanaunan na, pepagbalikan ne ing aldo at pepakaba bie ing ari.

²⁴King upayang atyu kang Hezekia, ikit na la ding bage mapalyari king paintungul at pepasiknangan na la lub ding malungkut king Jerusalem.

²⁵Belita na la ding bage mapalyari bayu datang ing kawakasan na ning panaun, ding bage milihim a e pa milyari.