Read Kapampangan Sirach 50 Bible Online

Sirach 50 - Kapampangan bible

Sirach 50

¹Ing maulang dili karing mikakapatad a anak nang Onias ya i Simon, ing matas dili katungkulan karing pari. Linarin ne ing Templo kanitang kapanaunan na.

²Ya munaman ing mibili karing matibe pitalakaran na ning matas a dobling pader, at ning matas a pader ning paligid ning Templo.

³King kapanaunan na nia naman kilkul ing pititipunan danum a kasing dagul na ning tangking tangsu.

⁴Ginawa yang paralan ban iligtas na la ding kabalen na king panganib ning kasiran, inya pepagawa na lang matibe ding pader ning siudad ban e la makalusub ding kalaban.

⁵Kasanting nang lalaki inyang linual ya king Kabanal-banalan a Lugal.

⁶Mengari ya king batuin ning daratang a abak a saslag libutad ding biga; anti ya king mabilug a bulan.

⁷Mengari ya king aldo a saslag king Templo ning Kakataskatasan; anti ya king pinanari a saslag karing masalang biga.

⁸Mengari ya karing sampagang rosas king kapanaunan da; anti ya karing sampagang liryu lele ning batis; anti ya karing tanaman a sedro ning Lebanon neng kaleldo.

⁹Mengari ya king maduduluk a insenso; anti ya king kopa a megawa king purung gintu, at mipalamutian karing miyayaliwang iyas.

¹⁰Mengari ya king mabungang tanaman a olibo; anti ya king tanaman a sipres a miraras karing biga.

¹¹Neng susulud ne ing masanting nang imalan, ing imalan nang pari, at kaybat munta king banal a altar, maging malagu yang akakit ing patyu ning Templo.

¹²Potang iduang da ring pari kang Simon itang mepirasung dake ain-sakripisyu kabang makatalakad ya lele ning altar at makapaligid karing kalupa nang pari, anti ya king tanaman a sedrong malagu ning Lebanon a makapadurut karing tanaman a palma.

¹³Ila deti ring lahi nang Aaron; susulud da ing banal dang imalan, makatalakad la arap ning kapulungan ding memalen ning Israel, tatalnan da la ring regalu para king Ginu.

¹⁴Inyang ayari na ing kasuyuan na king altar at ayayus ing ain-sakripisyu para king Kakataskatasan, ing Mayupaya,

¹⁵kinua ne ing kopa at tigtug na ing mabanglung alak king bitis ning altar bilang ain king Kakataskatasan, ing Ari ning meto sikluban.

¹⁶Kanita kinulisak la ding pari at tiniupan ding trumpetang megawa king purung pilak; pepasari da ing masikan a inge ban damdaman na la ning Kakataskatasan.

¹⁷Agad lang siniklaud at migdukung buntuk ding tau ban samban de ing karelang Ginung Mayupaya, ing Kakataskatasan.

¹⁸Kanita migkanta lang kapurian ding talapagkanta at kakabling ing malagu rang pamagkanta.

¹⁹E la tinuknang manalangin ding tau king malunusan a Ginung Kakataskatasan angga king meyari ing kasuyuan pamanyamba.

²⁰Kanita kinuldas ya king altar i Simon at tinas na la ding gamat na king kapulungan ding memalen ning Israel ban ibie ing bendisyun ning Ginu.

²¹Pasibayu lang dinuku ding tau king pamanyamba ban tanggapan ing bendisyun ning Kakataskatasan.

²²At ngeni, purian ye ing Dios ning meto sikluban a darapat makapagmulalang bage nu mang lugal. Ya ing meningat kekatamu manibat na kanitang kabait tamu, at makiutus kekatamu king mitmung lunus.

²³Mananu na sanang dinan na katamung tula at paintulut nang mika kapayapan king Israel king kapilan pa man.

²⁴Mananu na sanang isundu nang babie ing lunus na kekatamu at iligtas na katamu king oras ning pamangailangan tamu.

²⁵Ating aduang uring tau da ring bansa a tune kung kasaman, at e ya man karampatan mayaus bansa ing katlu.

²⁶Ila deti: ding Edomita, ding Filisteo, at ding mangmang a manuknangan king Sikem.

²⁷Aku, i Jesus a anak nang Sirac at apu nang Eleazar at tau Jerusalem, sinulat ku ngan keting libru ing sabla kung kabiasnan at beluan, agpang king tinggap kung kabiasnan.

²⁸Mapalad ya ing taung babie pansin kareting aral, at mipabiasnan ya.

²⁹Nung tuparan na la deti, ayarapan na ing nanuman uling aslagan ne ning Ginu king sala na ing daralanan na.