Read Kapampangan Sirach 51 Bible Online

Sirach 51 - Kapampangan bible

Sirach 51

¹Babie kung kapasalamatan keka, O Ginu ku at Ari; pupurian da ka, O Dios ko at Talapagligtas. Pasalamatan da ka.

²Pupurian da ka, uling iningat mu ku, at patnubayan. Linigtas mu ku king bitag ning kamandagan a dila, at karing labi a papalual kalaraman; sinaupan mu ku laban karing kakung kalaban.

³Uli ning lunus mu, at lagyung banal sikluluan mu ku at linigtas karing ipan a manayang maglaklak kaku. Linigtas mu ku karing gamat a bisang makamate kening bie ku, at karing dakal a kasakitan a kakung delanan.

⁴Linigtas mu ku king api a makapaligid kaku, at e ku mesilab libutad ning api a aliwa aku ing makipasari.

⁵Inangu mu ku king bangin ning kamatayan; linigtas mu ku king dilang malaram a sinumbung king ari laban kaku.

⁶Mibili ing bie ku king bingit ning kamatayan; ing katawan ku atyu ne lele ning kutkutan.

⁷Makapaligid ku karing kakung kalaban, at ala metung mang sumaup kaku. Papiglo ku oneng mebigu ku, uling alang sinaklolu kaku.

⁸Oneng aganaka ku, Ginu, ing lunus mu at ing depat mu manibat na kanitang minuna; seupan mu la detang mapibabatang mamasa keka, at linigtas mu la karing mabagsik dang gamat ding kalaban da.

⁹Inya kabang atyu ku king yatu minaus ku keka, at inawad king iligtas mu ku king kamatayan.

¹⁰Menalangin ku keka, O Ginu ku, ika ing tatang ku, king e mu ku sa paburen kening kakung kagipitan, kaniting penandit a atyu ku karing gamat ding palalu.

¹¹Manatili kung pupuri at magkantang kapasalamatan keka. Pekibatan mu ing kakung panalangin,

¹²at linigtas king kapahamakan a manaya kaku. Inya pasalamatan da ka at pupurian. O Ginu, pupurian da ka, at pasalamatan!

¹³Inyang anak ku pa at e pa mekapunta karing aliwang lugal, ing parati kung panalangin ya ing midinan ku sanang kabiasnan.

¹⁴Minta ku king Templo at ita ing inawad ku at panintunan kabang mabie ku.

¹⁵Manibat na inyang anak ku angga na inyang metua ku, ing tula ning pusu ku ya ing Kabiasnan. Malati ku pamu buri ku na ing mibiebie matulid, ing tuntunan ke ing dalan ning Kabiasnan.

¹⁶Ikua ku na ing Kabiasnan inyang magumpisa kung makiramdam; mekatuklas kung dakal a aral.

¹⁷Migkapilit kung mabiasa at pasalamat karing sablang tinuru kanaku.

¹⁸Ing panata ku ya ing mibiebie ku agpang king tuntunan na ning Kabiasnan. Migkapilit kung dapat mayap at e ku kapilan man sisisian iti.

¹⁹Migkapilit kung mika Kabiasnan at meging maingat ku king kakung ugali. Parati kung kikilalanan ing kakulangan ku, inya naman maniawad kung saup king Dios.

²⁰Ya ing parati nang pagnasan ning pusu ku, at atagpuan ke king kapamilatan na ning malinis a pamibiebie. At e ku ne man kawanian king kapilan pa man.

²¹Uli ning kapibabatan at pamagkapilit yang kamtan, ya ngeni ing maulaga kung pibandian.

²²Bilang ablas, dininan na kung kabiasnan magsalitang masalese ning Ginu. Inya gamitan ku iti king pamamie kapurian king Ginu.

²³Me ko keni, ikong bisang mituruanan; lungub kayu kening kakung pipagaralan.

²⁴Nung tune kayung kakau king Kabiasnan, obat e yu lunasan?

²⁵Mamaus ku ban ipakilala ke kekayu; tanggapan yeng alang bayad.

²⁶E ya kailangan panintunan king marayu. Ipailalam ya mu ing batal yu king paud na at makasadiang tanggap king aral na.

²⁷Lawan yu ing milyari kanaku: akamtan ku ing kapayapan king ditak mung kapagalan.

²⁸E kayu sana mikakunu king kekong maging puhunan akua ya mu sana ing Kabiasnan.

²⁹Pagpiestan yu ing kayapan ning Ginu at e kayu mikakunung munie kapurian at kapasalamatan.

³⁰Kabang maranun pa, daptan yu na ing kekong katungkulan, at ablasan na kayu ning Dios potang datang na ing mitakdang oras.