Read Kapampangan Sirach 6 Bible Online

Sirach 6 - Kapampangan bible

Sirach 6

¹at sukat kang maging kakaluguran lugal king maging kalaban ka. Magdalang kamarinayan at alang tiwala ing sira ka dangalan. Mangaintulid mu iti karing makasalanan a malaram.

²E ka paisoso king pelian ning buntuk; pota saguan ne ing kaladua mu antimo nung makananu neng sasaguan ning toro ing kalaban na.

³O laklakan na la ding bulung mu at gisanan ding bunga, at lakuan na kang anti ing malanging tanaman.

⁴Siran na ka ning e mayap a kapagnasan mu angga king gawan da kang pikaylian ding kekang kalaban.

⁵Ing banayad at magalang a pamakipagsalita mamungang dakal a kakaluguran. Ing magalang a pakibat tanggap yang malagung pakibat.

⁶Pakikuanan mung maging kakaluguran da ka ding dakal, oneng karing libu metung ya mu sanang tau ing aduananan mung payu.

⁷Neng makipagkaluguran ka e mo agad pagkatiwalan, subukan mo pa mu.

⁸Uling ating kakaluguran a magsamantala mu; e mu la ayasahan potang atyu ka king kagipitan.

⁹Ating kakaluguran a maging kapate mu at kaybat ibulalag na karing dakal a tau ing pamipate yu.

¹⁰Atin munamang kakaluguran a kayabe mung mamangan, oneng e king kekang kaguluan.

¹¹Potang atin ka, anti yang anino a tuki-tuki keka, at utusan na pati ding kekang ipus.

¹²Potang atyu na ka king kaskupan maging keka yang kalaban at e me akit nukarin man.

¹³Lumaut ka karing kalaban at mimingat ka karing kakaluguran.

¹⁴Ing tune tapat a kakaluguran anti ya king matibe tuknangan. Ing manakit kakaluguran anti neng menakit dakal a pibandian.

¹⁵Mal ya at ala yang alaga ing tapat a kakaluguran, ala yang katimbang a salapi.

¹⁶Anti ya king panulu a maniagip bie, at ding bukud mung makatagpu king tapat a kakaluguran ila detang ating takut king Dios.

¹⁷Itang tatakut king Ginu manakit yang tune kakaluguran, uling nung makananu neng pakamalan ing bie na makanyan neng pakamalan itang kakaluguran na.

¹⁸Anak ko, dinan mung ulaga ing Kabiasnan kabang anak ka; e ka tutuknang manintun Kabiasnan angga na king tumua ka.

¹⁹Nung makananu neng sasarulan at sasalbagan ning ortelanu ing marangle na at kaybat manenayang pupulan na, makanyan ing kekang daptan king pamanese king Kabiasnan. Wa, magal ka king ditak a panaun, oneng kaybat takman mu ing bunga ning kekang kapagalan.

²⁰Masakit deng akua detang e bisang magaral, at e naman manatili ing Kabiasnan karetang alang kapibabatan.

²¹Karela ing Kabiasnan anti ya king pusan a batung mabayat at e lumuat agad deng ibagsak.

²²Anti ya king lagyu na ing Kabiasnan at e la dakal deng mipabaluan.

²³Anak ko, makiramdam ka sa kanaku at e mu tatanggian ing payu ku.

²⁴Ibili mu la ding bitis mu king tanikala ning kabiasnan, at ing paud na king kekang batal.

²⁵Duku ka ban apusan me karing kekang pago, at e ka magbuysit karing renda na.

²⁶King mabilug mung pusu keka yang tukian at pamintuan mu lang tuntunan na king mabilug mung sikanan.

²⁷Panintunan me at akit me at pakilala ya keka. At e mu ne palakuan kabud keka yang atalan.

²⁸Kanita keka nang akua ing babie nang kapasnawan at ya ing maging kekang kaligayan.

²⁹Maging matibe mong kuta ding tanikala na, maging balabal meng mal ing paud na,

³⁰at ing tanda ning kekang panga-ipus maging tanda ne ning kekang pangamarangal.

³¹Isulud meng Kabiasnan anting koronang makintab.

³²Anak ko, mabiasa ka nung bisa ka. Maging biasa ka nung magkapilit ka.

³³Nung mabiasa kang makiramdam, mabiasa ka at maging magaling.

³⁴Munta ka ketang lugal nung nu la mititipun ding makatua; karin ka manintun taung biasa at keka yang pakiabayan.

³⁵Taimtim ka sanang makiramdam karing pisasabian tungkul king Dios, at pakatandanan mu la ding kasebian a payabut da ring mangabiasa.

³⁶Nung atin kang akatagpung biasa, maranun kang migising at puntalan me, at e me patugutan pupuntalan angga king magasgas ya ing talpakan nang bitis ning pasbul na.

³⁷Gamitan mu ing sablang panaun mu king pamagaral karing kautusan ning Ginu at pakapibulayan mu la. At ya naman dinan na kang kamalinawan a isip at ibie na ing Kabiasnan a kekang pakikuanan.