Read Kapampangan Sirach 8 Bible Online

Sirach 8 - Kapampangan bible

Sirach 8

¹E me lalabanan ing taung ating kayupayan, pota manabu ka karing gamat na.

²E ka makipate king taung dakal a pibandian, pota suhulan na la ding tau at magtestigu lang laban keka. Dakal ne sinirang tau at pirait a ari ing gintu.

³E ka makipate king ninumang taung madaldal, e mu na tatamban pa ing kadaldalan na.

⁴E ka makibiru king taung alang modu, pota lapastanganan na la ding kekang makatua.

⁵E mu ne insultuan pa ing taung sinisi na, uling itamu ngan atin tamung kasalanan.

⁶E me insultuan ing taung matua na, uling tutua ta ngan.

⁷E mu ikakatula ing kamatayan ning ninu man, uling mate tamu munaman.

⁸E mu gagawan biru ing sasabian da ring taung biasa, pakapagaralan mu la ding karelang kasebian. King kapamilatan na ning karelang kabiasnan makapagaral kang maging tapat a taung susuyu karing tatalan kayupayan.

⁹Pakapakiramdaman mu ing sasabian da reng makatua, uling ila man mebiasa la karing turu da ring makatua ra. Makapagaral kang misip masalese at abalu mu ing kekang daptan king oras ning pamangailangan.

¹⁰E me dirinan dalan ing makasalanan ban e ya mika oportunidad pang dapat e ustu at e ka miyawa.

¹¹E ka makiabe king taung barumbadu, pota ika ing masilu king sarili mung amanu.

¹²E ka paparam nanuman king ninuman a mas mayupaya kesa keka, at nung peparam ka kalinguan mu na ita.

¹³E me tatalakaran ing ninumang manutang a e mu agyung bayaran, at nung menalakaran ka kailangan ing makasadia kang mamayaran.

¹⁴E ka mandalum laban king ukum, uling ya ing papaniambutan da ring kalupa nang ukum.

¹⁵E ka maglakbe kayabe ning e maingat a tau, uling mitake ka mu king panganib. Gawan na ing sablang agyu na at kayabe na kang kawalan bie.

¹⁶E ka makipate king taung mapali buntuk o maglakbe a ya mung kekang kayabe. Alang ulaga keting tau ing pamanampalasan at malyaring panasakitan na ka nung alang sumaup keka.

¹⁷E ka maniawad payu king taung mangmang, uling e na balung ingatan ing sabian mung lihim.

¹⁸E mu daraptan king arap ning taung ala kang kabaluan ing bage a sukat mung isikap, uling e mu balu nung nanu ing gawan na keka niting tau.

¹⁹E mu paniabian kenu man ing kekang babalakan ban ing mayap mung kalma e mawala.