Read Kapampangan Sirach 9 Bible Online

Sirach 9 - Kapampangan bible

Sirach 9

¹E me pangalaluan ing asawa mung pakamalan ban e ya gawang kamulangan keka.

²E ka pailalam king upaya ning ninumang babai ban e na damusakan ing kekang katuliran.

³E ka makiabe karing asawa da ring kalupa mung lalaki, pota manabu ka king tuksu ra.

⁴E ka paisoso karing babaing ing kapanintunan da teterak, pota marakap ka king karelang bitag.

⁵E me lalawan maratna ing metung a dalaga, pota mamayaran kang multa king uli na.

⁶E ka magbabad king kandungan da ring babaing magtinda king katawan da, pota magisan ing kekang pibandian.

⁷E ka balikid nang balikid karing dalan na ning siudad o lakad nang lakad karing alanganin a lugal.

⁸Ilako mu ing lawe mu king babaing malagu, e mu lalawan ing leguan ning e mu asawa. Dakal na lang mipahamak a lalaki uli ning malagung babai a pasari king pita ning laman a milalablab anting api.

⁹E ka mamangan kayabe ning asawa na ning aliwang lalaki o miminum kayabe na, pota matuksu ka king lagu na at kaybat ing pangatau mu masira ya.

¹⁰E me kakalinguan ing maluat mu nang kakaluguran; e ne akua ulaga ning bayung kakaluguran. Mengari yang bayung alak ing bayung kakaluguran, nung kapilan luluat makatigang kanita lalung maging maniaman.

¹¹E mu sa kakaririan ing tagumpe ning makasalanan, uling e mu naman balu ing kapahamakan a keka manenaya.

¹²E ka sa tutula karing bage a ikakatula da ring taung alang Dios a katawan, uling e ra alisian ing kaparusan kabang bie ra.

¹³Lumaut ka king taung ating upayang makamate keka, at milako ing takut mu king kamatayan. Nung e mu apangilagan ing e me lapitan, kailangan ing maingat ka ban e na ka apate. Isipan mu ing anti ka sanang maglakad karing makaumang a bitag o king babo ning pader neng panaun ning labanan.

¹⁴Pakikuanan mung akilala mo ngan ding sablang tau king paligid mu, at karetang atin mung kabiasnan karela ka tanggap payu.

¹⁵Kareta mung biasa karin ka makipagsalita at ding Kautusan ning Kakataskatasan a Dios ilang kekong pisabian.

¹⁶Ding taung ating kayapan ilang bukud kekang pakiabayan king pamangan at ing takut mu't kagalangan king Dios ya ing kekang ipagparangalan.

¹⁷Mapupuri ya ing taung magaling a pangamat karing bage a keyang depat, oneng makikilala ya ing kabiasnan ning manimuna king pamagsalita na.

¹⁸Ing tsismoso ya ing pitatakutan da ring kabalen na; pikakasaman de ring sabla uli ning pabigla-bigla nang pamagsalita.