Read Kapampangan Leviticus 6 Bible Online

Leviticus 6 - Kapampangan bible

Leviticus 6

¹Ngana pa ning Ginu kang Moises,

²Mikasala ya ing ninuman nung ilingad ne ing bage a penilas da keya o e tinupad king kasunduan o menako ya o kaya migsamantala ya king kalupa nang tau

³o payalian ne ing metung a bage a apulut na at sinumpa yang e ne ikit.

⁴Bayaran ne ning mikasala itang penako na, ing bindian nang apulut o mipanilas keya a babandian na.

⁵Isubli ne ing isanu man kareting mebanggit, at saka ne pa patunganan beinti por sientu ing alagang sukat bayaran na.

⁶Kailangan ya namang miyain metung karing sese nang lalaking tupa o lalaking kambing a alang dipektu. Idala ne iti king pari bilang kapamayaran kanaku, ing Ginu. Makayagpang ya ing alaga na ning animal king timbangan ning santuaryu.

⁷Iyain ne iti ning pari para king pangapatawaran ning kasalanan na ning mikasala, at mipatawaran ya.

⁸Ngana pa ning Ginu kang Moises,

⁹Sabian mu la kang Aaron at karing anak nang lalaki deting tuntunan tungkul karing ain-a-durulukan. Sukat yang manatiling kabukas ing metung a ain-a-durulukan king altar a ating aping e matatda.

¹⁰Kaybat na nita, isulud ne ning pari ing barung makabang linen ampon salol a linen at saka na ilako ing abu. Ibili na iti king lele na ning altar.

¹¹Kaybat na nita, manalili yang piblas ing pari, at idala na ing abu king lual na ning kampu; ketang lugal a malinis a mitalaga para kaniti.

¹²Sukat manatiling mitatau ing api king altar; tamban kabukas. Dagdagan na tangab ning pari balang abak; ayusan ne babo ning tangab ing ain-a-durulukan at dulukan na ing taba na ning ain-ning-pamisulusulu.

¹³Sukat manatiling mitatau ing api king altar; e paburen matatda.

¹⁴Ila naman deti ring tuntunan tungkul king ain-a-binutil. Ding pari a anak nang Aaron ilang malyaring miyain kaniti king altar ku, ing Ginu.

¹⁵Kuma yang kasakmal ing metung karela king mapinung arinang semutanan laru at insenso. Kaybat, dulukan na iti king altar bilang tanda king ing kabilugan a ain miyain na kanaku, ing Ginu. Babie tula kanaku, ing Ginu, ing bau na niting ain.

¹⁶Mangaintulid karing pari ing mitagan king ain.

¹⁷Gawan dang tinape alang lebadura at kanan da iti king metung a lugal a banal; kilub na ning patyu ning Tolda. Binie ku na, ing Ginu, iti karing pari bilang dake ra karing ain-a-pamangan. Iti tune banal; kalupa re ding ain-a-kapamayaran-king-kasalanan at ding ain-a-kapaglarinan-king-kasalanan.

¹⁸Malyari dang kanan king kapilan pa man ding sablang lalaki king lahi nang Aaron iting dake ra king pamangan a miyayain kanaku, ing Ginu. Manasakit ya ing ninumang tagkil king ain-a-pamangan, uli na ning kabanalan na niti.

¹⁹Ngana pa ning Ginu kang Moises,

²⁰Iti ya ing ain a idala na kanakung Aaron at anak nang lalaki king aldo na ning karelang ordinasyun: atlu at kapitnang litrung mapinung arina (anti ring karaniwan ain-a-binutil). Iyain neng abak ing kapitna kaniti at itang kapitna neng gatpanapun.

²¹Samutanan tabang olibo at ilutu king sala-salang bakal. Kaybat na nita, pisian yang mangalati at iyain bilang ain-a-binutil. Babie tula kanaku, ing Ginu, ing bau na niti.

²²Karing panaun a daratang, iting pamiyain sukat neng gampanan ning balang lahi nang Aaron a susuyu bilang Pamuntuk da ring Pari.

²³Iting ain-a-binutil a iyain ning pari sukat ngang dulukan kabilugan; e malyaring kanan iti.

²⁴Ngana pa ning Ginu kang Moises,

²⁵Sabian mu kang Aaron at karing anak nang lalaki king deti naman ila ring tuntunan tungkul karing ain-a-kapamayaran-king-kasalanan. Sukat yang paten ing animal a magamit king ain-a-kapamayaran-king-kasalanan king dane nang norti ning altar nung nu ra la papaten ding animal para karing ain-a-durulukan. Iti metung yang ain a tune banal.

²⁶Kanan ne ning pari a miyayain kaniti ketang lugal a banal, ing patyu na ning Toldang tuknangan ku.

²⁷Manasakit ya king upaya na ning kabanalan na niti ing ninumang makatagkil king laman na niting animal. Nung ating nanu pa mang imalan a mitalamsikan king daya na ning animal, pipian ya iti king lugal a banal.

²⁸Sukat yang balbalan ing isanu mang kasangkapan a kapsa a megamit king pamipabukal king karni. Nung kasangkapan yang bakal ing megamit, sukat yang isisan at luglugan king danum.

²⁹Malyari yang mangan kaniting ain ing ninumang lalaking miembru da ring pamilyang pari; iti metung a bage banal.

³⁰Nung atin lang linub king Tolda king daya na niting animal at megamit iti king seremonia na ning pamaglako king kasalanan, e ya sukat kakanan ing animal; dulukan ya.