Read Kapampangan Lamentations 1 Bible Online

Lamentations 1 - Kapampangan bible

Lamentations 1

¹Kalungkut na bili ning Jerusalem, ing siudad a kanitang misan mitmung taung manuknangan! Napun nakadua na gelangan ne ning yatu, oneng ngeni anti ya king babaing mebalu. Ya ing maragul dili karing siudad, oneng ngeni anti niang ipus.

²Kabukas manangis ya; lua na mamagus karing pisngi na. Karing sablang meging kakaluguran na, alang mitagan ba reng pamatulan. Pigtaksilan de ring kakampi na, at kalaban de ngeni.

³Ding memalen ning Juda ipus lang alang akarapat, uling bihag la at mitabi king tuknangan dang lugal. Karing aliwang bansa la menuknangan; ala nang ayaus sarili dang tuknangan. Makakubkub la karing kalaban, at ing pamanakas masakit dang gawan.

⁴Ala metung mang daratang ngeni king Templo ban samba karing mituldung banal a aldo. Manamdaman la ngeni ding babaing karin magkanta, at ding pari saingsing ing karelang panalangin. Ala nang tau karing pasbul dalan ning siudad, at ing Zion mibili ya king kalungkutan.

⁵Migtagumpe la ding kalaban na; makapailalam ya king kayupayan da. Peintulut ning Ginu ing magkasakit ya uli ning dakal nang pamikasala; pati anak na mebihag la't leko da. fig,...anti ya king babaing mebalu...Kabukas manangis ya...,(1:1-2)fig*

⁶Ala na ing malagu king Jerusalem; ding manimuna na mengari lang usang mangaina king danup; halus ala nong sikanan tumakas karing karela tatagal.

⁷Lasak-lasak ya't makalunus ngeni ing Jerusalem; agaganaka na itang milabas nang leguan. Ala metung mang sinaup inyang karing kalaban mebaldug ya; kalaban na keylian da ing pangasambut na.

⁸Ala na ing dangalan na; lubas ya't me-insultu uli ning kasalanan na. Sasaingsing ya, at tatakpan neng lupa na, uli ning kamarinayan na. Ing Jerusalem ya ing mismung mindinat king sarili na, uli ning makapangilabut nang kasalanan a depat.

⁹Ing dinat na masala nang mayayakit, oneng ing keyang kabilian e na dininan pansin. Makapangilabut ing pangasaldak na; ala metung mang mekirame keting bansa. Simbut de ring kalaban na; ngeni maniawad yang lunus king Ginu na.

¹⁰Kinua da ring kalaban ing sabla nang pibandian. Ikit nong linub king mismung Templo nung nu na babawal ning Ginu ing lungub ya ing ninumang paganu.

¹¹Sasaingsing lang manintun apangan ding keyang memalen; paglibe ra king pamangan ing pibandian da ban e la mate king danup a miras karela. Ngana ning siudad, Lawan mu ku, Ginu, keka sanang lawan ing makalunus kung kabilian.

¹²Lawan yu ku, ngana karing sablang taung daralan. Ala pang mika kapanamdaman king kakung kasakitan; ing kasakitan a pepagpa ning Ginu king panaun ning mua na kaku.

¹³Pepatipa yang api a ibat babo, aping milalablab king mabilug kung pangatau. Migsadia yang bitag para kaku, at king gabun bitbat na ku. Kaybat likuan na ku at pepaburen king alang anggang kasakitan.

¹⁴Tindanan na lang sabla kung pamikasala, at tinali king lubid a gewa na; king batal ku karin sinabit na la, at mengaina ku uli ning bayat da. Pepaburen na ku ning Ginu karing kakung kalaban, at ala kung ilaban karela.

¹⁵Keylian na la ning Ginu ding sablang mayap kung sundalus; tinubud na lang dakal a kawal ban paten sabla kung lalaking kayanakan. Dilpak na lang kakung memalen; mengari lang ubas king pigagawan alak.

¹⁶Iti yang sangkan nung inya tutulu ing lua ku. Ala metung mang makirame kaku alang makaibie sikanan lub kaku. Simbut na ku ning kalaban; ding kakung memalen ala nang mitagan.

¹⁷Inatiat ku lang kakung gamat, oneng metung man alang kaku lilingap. Karing sablang suluk ning yatu minaus yang kalaban ing Ginu laban kaku; at linawe da kung anting bage marinat.

¹⁸Oneng makamatulid ya ing Ginu, uling sinalangsang ku. Nu kayu man karin, O memalen ku, makiramdam kayu kaku. Lawan yu ing kasakitan a ngeni kakung daralanan. Dela da la bilang bihag ding kakung kayanakan a lalaki at babai.

¹⁹Ding kakung kakampi kaku lang inaus, oneng pigkait dang karelang saup. Ding pari at ding manimuna mibagsak la karing dalan ning siudad da; mete lang manintun pamangan ban ing bie ra e miwakasan.

²⁰Lawan mu, O Ginu, ing kasakitan a kakung daralanan, ing kaladua kung atyu king kaguluan! King lungkut pusu ku masaspak ya, uli ning pamaglaban keka. Ating patayan karing dalan; agyang kilub ding bale atyu ing kamatayan.

²¹Pakiramdaman mu sa ing kakung dalung; metung man alang mamatula kaku. Kalaban ku matula la, uling ing kasakitan kaku mu pepagpa. Parala mu neng aldo pengaku mu, padalanan mu la naman ding kalaban ku king kasakitan a kakung pagdusan.

²²Atulan mu lang kasakitan uli ning e mayap dang daraptan, parusan mu la anti ing parusang kaku digpa uli ding kakung dakal a kasalanan. Sasaingsing ku uli ning kasakitan, at maskup ne ing kakung pilubluban.