Read Kapampangan Lamentations 4 Bible Online

Lamentations 4 - Kapampangan bible

Lamentations 4

¹Kinupas ing kekatamung gintung kikinang; ding batu ning Templo pakakalat la karing dalan.

²Ding pakamalan nang baintau ning Zion kekatamu gintu ing karelang kalupa, oneng ngeni mengari lang matbud a kuran ding karelang gewa.

³Agyang ding gaindung asung-gubat pasusuan dong karelang anak, oneng mengari la karing ayup a ostrich, karing anak da misna la king kabagsik.

⁴Paburen da lang mate ding karelang bingut king kau at king danup; magpalimus lang pamangan ding karelang anak, oneng alang babie karela.

⁵Ding tau kanitang misan maniaman la pamangan, ngeni mamamate la king danup karing dalan; detang mibait king pibandian, manintun la ngening pamangan karing basurahan.

⁶Ding kakung memalen miparusan la maygit karing memalen ning Sodoma a mibagsak bigla king gamat ning Dios.

⁷Sadia malinis la ding kekatamung prinsipi, anti la king bulak kadalise, matipunu la at masikan; masanting la pamikakatawan.

⁸Ngeni karing dalan pakakalat la; karela alang makakilala; mete lang metuling a lupa, malanging anting dutung ing balat da, at makapakat karing butul da.

⁹Detang king gera mete, mas masuerti la kesa kareting tauling mete a tunggal ditak mapapatad a bie, uling ala lang akit a pamangan king marangle.

¹⁰Ing kasakitan a dinatang king kakung balen migdalang makapangilabut a takut; ding imang malugud linutu da lang karelang anak ban e la mate king danup.

¹¹Bignus ning Ginu ing bagsik ning mua na; silaban ne ing Zion angga king mipatag ya king gabun.

¹²Ala metung man at nukarin man, agyang ding pamuntuk ding dayuan ing mika kapaniwalan king ing ninumang kalaban ing pasbul dalan ning Jerusalem aluban ne.

¹³Oneng mepalyari iti, uling ding propeta at pari parehu lang mikasala, at ing bunga na niti mete la ding taung inosenti.

¹⁴Anti lang bulag ding manimuna, libut-libut la karing dalan na; mimantsahan lang daya, inya alang bisa mang tagkil karela.

¹⁵Ngarang kukulisak ding tau, Mabating kayu! Marinat kayu! Bawal ing tagkil kayu! Inya karing bansa libut-libut la; metung man alang bisang tanggap karela.

¹⁶Ala neng pakialam ing Ginu karela; ya mismu ing miniambulat karela. E ne pepakit kagalangan pa karing pari at manimuna da.

¹⁷Menintun keng saup angga king mepagal keng manaya king saup a e mi kimtan. Menatili keng manenayang kasaupan king bansang ala namang ayampang.

¹⁸Babanten na kami ning kalaban; e ke makalakad man karing dalan. Ding kekeng aldo miyangganan na la; uling ing kawakasan dinatang na.

¹⁹Mas mabilis la karing agilang susulapo banua king kekami pamanagal da. Tikian dang bakas mi karing bunduk-bundukan, at king disyerto karin da ke sebatan.

²⁰Arakap de ing manimuna king bie mi, ing ari a ing Ginu mismu yang memili, ing kekeng penaligan migdipensa kekami karing sablang kalaban.

²¹Wa, tumula kayu, memalen ning Edom at Uz; magsaya kayu kabang atin pang panaun. Ing kabiguan kekayu datang munaman; ikayu man mipaid kayung lubusan king kamarinayan.

²²Mekabayad ne ing Zion king keyang kasalanan; ing Ginu e na na paintulut ing manatili tamu pang malambat king pangayugse tamu karing bansang dayuan. Oneng, Edom, ing Ginu ya ing mamarusa keka; ilantad nang depat mung pamikasala.