Read Kapampangan Lamentations 5 Bible Online

Lamentations 5 - Kapampangan bible

Lamentations 5

¹Ganakan mu, O Ginu, ing kekami milyari. Lawan mu kami, keka sanang lawan kekeng kamarinayan.

²Atyu karing gamat ding dayuan ing kekeng pibandian; dayuan la ding atyu karing kekeng tuknangan.

³Ding kalaban pete da lang tata mi, at ding kekeng ima mebalu la ngeni.

⁴Kailangan ming mamayad king danum a kekeng inuman, kailangan ming saliwan ing dutung para karing kekeng kalang.

⁵Anti keng kabayu o kamelyu, mapagal na keng tutu, oneng e ra ke dirinan panaun magpaynawa.

⁶Ban e ke mate king danup, migpalimus ke king Ehipto at Asiria.

⁷Mikasala lang kekeng makatua, oneng ngeni ala na la; ngeni ikami ing magdusa king depat dang pamikasala.

⁸Ding taung kekami sasakup ila mismu ding ipus; ala metung man ing kekami makapagligtas king kekeng pangapailalam karing karelang gamat.

⁹Libut-libut la karing baryu ding makamate tau; king panganib mibibili ing kekeng katawan uli ning pamanintun ming pamangan.

¹⁰Ing danup yang pepasari king matas ming lagnat, anti ya king ornu kapali ing kekeng balat.

¹¹King mismung Bunduk ning Zion kekeng asawa karela lang silbahian; karing balang balen ning Juda ding anak ming dalaga karin da la pemuersa.

¹²Dekap da lang kekeng manimuna, at kaybat binite da la; e da la ginalang ding kekeng makatua.

¹³Ding kayanakan a lalaki pinilit da lang gumiling trigu; ding anak a lalaki sayasayukut no man uling mabayat ing dutung a karelang pupusanan.

¹⁴Ding makatua e no miluluklukan ketang lele pasbul ning siudad, at ding kayanakan e no makapanigtigan.

¹⁵Tebugan na ning tula ing bie mi; ing kekeng pamanerak naman kalungkutan ing meging kalibe na.

¹⁶Alang mitagan king sablang kekeng pagmaragul. Mikasala kami at ngeni iti pagdusan mi!

¹⁷Ding pusu mi mangaina la; e ke maybug manakit uli ning lua a tutulu karing kekeng mata,

¹⁸uling ing Bunduk ning Zion magdili-dili ya at meulila, uling asu lang gubat ding gagala karing bale nang mengasira.

¹⁹Oneng ika, O Ginu, ari ka kapilan man, at manimuna ka angga king kawakasan.

²⁰Baket likuan mu keng maluat? Ganakan mu ke pa kaya?

²¹Ibalik mu kami keka, O Ginu! Ibalik mu kami! Sadiang kekeng dangalan kekang isubli.

²²Lubus mu na ke pin kayang gilutan? Ing mua mu kekami ala na kayang kayangganan?