Read Kapampangan Epistle of Jeremiah 1 Bible Online

Epistle of Jeremiah 1 - Kapampangan bible

Epistle of Jeremiah 1

¹Kopia ya iti king sulat nang Jeremias a peparala na karing memalen ning Jerusalem bayu la mebihag karing tau Babilonia, at kaybat midala king Babilonia. Mayayakit keting sulat ing pamangondena na ning Dios a pepayabut na karela king kapamilatan nang Jeremias.

²Ing kasalanan yu king Dios ya ing sangkan nung inya mabihag kayu kang Aring Nebucadenesar at midala king Babilonia.

³Manatili kayung bihag karin kilub ning makabang panaun angga king kapitung lahi. Kaybat na nita, gawan na kayung malaya ning Dios at panimunan na kayung payapa king pamanuli yu king bansa yu.

⁴Akit yu la king Babilonia ding idolong megawa king dutung, pilak, at gintu a kikilalanan dang dios ding paganu, at pupusanan da ampon pitatakutan.

⁵E yu la pakiapusan deting tau. E kayu sukat mitatakutan kareting idolong kikilalanan dang dios agyang pang akit yu lang pagprusisyun da la at sasamban.

⁶Oyni ing sabian yu king sarili yu: Ginu, ika mung bukud ing samban mi.

⁷Pakiabayan na kayu ning anghel ning Ginu at ingatan na kayu.

⁸Belutanan lang pilak at gintu ding idolo at ding makigawa karing dila da ila ding taung mandukit dutung. Oneng e la makapagsalita uling e no man tune dios.

⁹Gagawa lang koronang gintu deng tau at kaybat bibili da la karing buntuk da reting idolong kikilalanan dang dios a anti waring babaing mahilig kareng alahas.

¹⁰Neng misan kakuanan da reng pari ning Babilonia ing gintu at pilak da ring kikilalanan dang dios, at gagamitan da para king sarili da.

¹¹Neng misan ya ing gagamitan dang pamayad karing babai ning templo ra a magtinda karing katawan da. Megawa la king dutung, pilak, at gintu deting idolo a piniblasan dang anting tau.

¹²Oneng agyang pang pipiblasan da lang mal a imalan anting ari deting idolong kikilalanan dang dios, kakanan da no man ning kalawang at ding ane.

¹³Mangayalipugpugan la king alikabuk ning templo at kailangan ing pulisan la lupa.

¹⁴Anti ding ukum, atin lang tatalnan a setro, oneng ala no mang upayang mamarusa karetang maninsultu karela.

¹⁵Atin lang tatalnan a punyal at palakul, oneng e ra naman adipensa ing sarili da king pangasira da neng gera o karing manako neng panakawanan da la.

¹⁶Patutuan na niti ngan king e la dios, inya e la sukat samban.

¹⁷Mengari la deting idolong kikilalanan dang dios king nanumang kasangkapan a sira a makalukluk king templo da, oneng ala lang kasilbian. Mitmu la ding mata ra king alikabuk a ibat karing bitis ding taung lulub king templo.

¹⁸Kakandadu da la ring pari ding pasbul ning templo ban e la makalub deng mapanako. Inya makakulung la deting idolong kikilalanan dang dios; balamu mu wari tau lang makasukul a malapit nang bitayan uli na ning depat dang kasalanan.

¹⁹Sisindi lang sulu deng pari para kareting idolo; mas masala la ding karing idolo kesa karing sulu da ring pari. Oneng alang manakit metung man kareting idolo.

²⁰Nung makananu da lang kakanan ding ane ding dutung king bubungan ning bale, makanyan da la namang kakanan ding kakilubkiluban da reting idolo, at antimu rin ing imalan da, at iti e ra man balu.

²¹Manuling la lupa king asuk a manibatan king templo.

²²Dagpanan da lang talibatab at tutuklu la karela ding denas at ding miyayaliwa pang ayup, at lulukluk la reng pusa karela.

²³Patutuan na niti ngan king ding idolo e la tune dios, inya e la sukat samban.

²⁴Belutanan da lang gintu deting idolo ban maging masanting la, oneng e la kintab nung alang manguskus karela. E la manamdaman sakit neng mumoldi da la.

²⁵Mesali la king mal a alaga, oneng e no man mangisnawa.

²⁶Atin lang bitis, oneng e no man makalakad. Kailangan ing ibuat la at pusanan. Tune ala lang akarapat.

²⁷Mangapakarine la pati na detang magasikasu karela. E la makatalakad deting idolo neng mibabagsak la. At neng ating mitalakad karela e no man makakimut. Nung talangkibi ing pangatalakad da e ra atulid ing sarili da. Anti na ka mo waring babie ain keng mete neng mamain ka karela.

²⁸Pamisali da la reng pari ding ain a miyabie kareting idolong kikilalanan dang dios, at gagamitan da ing ayabli ra para karing sarili da. Lugal king ipamie ra ing aliwang miyabie para karing pakakalulu, titipunan da at asinan da ring asawa da ring pari.

²⁹Paburen da lang tatagin karing ain pati ding babaing kaybat-ibat pang menganak o menaregla. Patutuan na niti ngan king ding idolo e la tune dios, inya e la sukat samban.

³⁰Baket kailangan ing kilalanan lang dios deting idolong megawa king dutung, pilak, at gintu? Pati babai paintulutan dang babie ain para karela.

³¹Neng panaun ning pamagpaldas, lukluk la ding pari da kilub ning templo a gabak a imalan, alang balbas, at alang takap king buntuk da.

³²Kukulisak la at manangis arapan da reting kikilalanan dang dios a kalupa da retang kikiak arap ning mete.

³³Paminsan-minsan kakuanan da la ring pari ing imalan da reting kikilalanan dang dios, at ya ing pasulud da karing asawa ra at anak.

³⁴E la makaibie ablas nung suyuan mu la o insultuan deting kikilalanan dang dios. E la makapamiling ari o e re apalako ing ari.

³⁵E re agawang mabandi ing ninuman. E re apilit tupad ing ninumang menata karela a e mekatupad.

³⁶E de aligtas king kamatayan ing ninuman, at e de adipensa ing ninumang gigipitan da.

³⁷E da la apasala mata ding bulag, at e da la asaupan detang atyu king pamangailangan.

³⁸E da la asaupan ding mebalu at ding ulila.

³⁹Deting idolong kikilalanan dang dios a megawa king dutung at belutanan pilak at gintu mengari lang batu a ibat king bunduk. Mangapakarine la mu detang sasamba karela.

⁴⁰Makananu lang meisip at makikilalang dios deting idolo? Ding mismung tau Babilonia ilang papakit king kamangmangan mu ing pamanyamba karing idolong kikilalanan dang dios.

⁴¹Darala re ing metung a pipi king templo nang Bel ban aduan ing makapagsalita ya sana ing pipi ngening ala ne mang pakiramdam i Bel.

⁴²Agyang balu rang ala yang arapat iting kikilalanan dang dios, sasamban de pa mu rin uli na ning kamangmangan da.

⁴³Atin munamang babaing pakataling kuldun king katawan da at pakalukluk lele ning dalan at duruluk insenso at babie ing sarili da bilang babaing magtinda king katawan da. Potang mayagkat ya ing metung karela ban sipingnan ning lalaking menagkat, kaylian ne ing kayabe nang babaing magtinda king katawan na a e mepili uling e ya malagu.

⁴⁴E ngan tutu at kapamiraitnan mu ing nanumang pamakiugnayan kareting idolo. Makananu lang meisip at mekilalang dios deting idolo?

⁴⁵Ding ginawa mu karela ila ding pande at ding mangagaling a pangamat king pamandukit dutung. Itang buri dang lunto itsura da ring idolo ya ing gawan da.

⁴⁶Makuyad la bie deting gagawang idolo, inya makananu la ngening maging dios ding gewa ra?

⁴⁷Ing maragul a kapamiraitnan ya ing lakuan dang mana para karing lahi da reting tau.

⁴⁸Neng daratang ing gera at ing kapahamakan e ra balu ing daptan da ring pari nung nukarin la salikut a kayabe da reting idolong kikilalanan dang dios.

⁴⁹Ala lang akarapat deting idolo king panaun ning gera at aliwa pang panganib. Baket e ra aintindian ding tau king deting idolo e la dios?

⁵⁰Dutung la mu a belutanan pilak at gintu. Lunto mu rin king daratang a panaun king deting idolo e la dios.

⁵¹Abalu ra kanita ding sablang tau at ding ari king ding kikilalanan dang dios gewa da la mu ring taung mangagaling a pangamat. Ala lang upayang kalupa na ning king Dios,

⁵²uling e no man talagang dios.

⁵³E la makagawang ari o makaibie uran karing tau.

⁵⁴E ra alunasan ing sarili dang problema o makaibie hustisia karing mayayalipit. Mengari la karing ayup a awakala lang kasilbian.

⁵⁵Neng mikakasilab king templo, mamulayi la deng pari at malakuan la ding idolong kikilalanan dang dios a dutung a belutanan gintu at pilak, at masilab lang anting dutung.

⁵⁶E da la malyaring labanan ding kalaban o ding ari. Makananu la ngening mekilalang dios?

⁵⁷E da naman aligtas deting idolong megawa king dutung at belutanan pilak at gintu ing sarili da karing mapanako at tulisan.

⁵⁸Ala lang bitasang agawa potang kuanan da ring mapanako at tulisan ing pilak at ing gintung makabalut karela at ing imalan a susulud da.

⁵⁹Mayap ya pa kareting idolo ing metung a ari a pepakit na ing katapangan na o ing kasangkapan a magamitan king pibalebale. Mayap ya pa karela ing metung a pasbul ning bale a makasaup king pamaningat king laman na. Maygit ya ulaga ing asias king palasyu kesa king metung kareting idolo.

⁶⁰Lelang ne ning Dios ing aldo, ing bulan, at ding batuin ban munie sala, at mamintu no man king Dios.

⁶¹Makanyan ya naman king Dios ing kildap at ing angin. Mayayakit ing kislap ning kildap king malapit at king marayu, at tutiup ya ing angin nukarin mang lugal.

⁶²Mamintu ya namang mikalat ing ulap king mabilug a yatu neng utusan ne ning Dios.

⁶³Mamintu ya naman ing api potang utusan ne ning Dios a kuldas ibat banua ban silaban la ding bunduk at ding kagubatan. Oneng ing anti kanita e ra agawa ding idolong kikilalanan dang dios.

⁶⁴Baket kilalanan la pang dios ngening ala no mang asasaup o apapanasakit king kenu man?

⁶⁵Masalang balu ra king e la dios, inya e yu la dapat samban.

⁶⁶Ala lang upaya karing ari deting idolong kikilalanan dang dios; ala lang upayang maniumpa o munie bendisyun.

⁶⁷E da la naman adinan ding bansa nanumang tanda a ibat banua. E la naman makaibie sala a antimo ing aldo at ing bulan.

⁶⁸Mayap la pa karela ding animal uling aliligtas da ing sarili da king panganib at adipensa ra ing sarili da.

⁶⁹Masalang-masalang anti ing aldo king deting idolo e la dios. Uli na niti, e yu la sasamban.

⁷⁰Deting kikilalanan dang dios a megawa king dutung at belutanan pilak at gintu, anti la king tau-tauan a panabuang ayup libutad ning palayan. Ala lang bitasang asaup.

⁷¹Mengari la pa king dikut a masuksuk king mulahan. Lugal king itabi da la ring ayup, ding ayup ilang mamapun karela. Mengari la deng idolong den karing mete a miyugse busal ning karalumduman.

⁷²Mangupas at mangagisi ing mangamal dang susulud a imalan. Iti katunayan king e la tune dios. King katataulian kanan da lang ane ding katawan dang dutung. Kanita na mayakit king ala lang kasilbian.

⁷³Maygit ya ing taung ating kagalangan king Dios uling ala yang idolo. Inya e ne apirait ning ninuman.