Read Kapampangan Baruch 1 Bible Online

Baruch 1 - Kapampangan bible

Baruch 1

¹Sinulat neng Baruk a anak nang Neraia iting libru. Apu neng Maseia at lahi neng Zedekia, Hasadia, at Hilkia. Misulat ya karin king Babilonia

²kanitang kapitung aldo ning bulan ning kalimang banua kaybat deng sinakup at silaban ding tau Babilonia ing Jerusalem.

³Binasa neng Baruk iting libru kang Jeoiakin a anak nang Jeoiakim, ing ari ning Juda, at karing sablang memalen.

⁴Dinatang la ding ating matas a katungkulan, ding kamaganak ning ari, ding makatua, at ding aliwa pang Judio a manuknangan king lele ning Ilug ning Sud ning Babilonia ban pakiramdaman ing pangabasa na.

⁵Inyang mebasa ne ing libru, menangis la ding sabla, mig-ayunu la, at menalangin king Ginu.

⁶Kaybat na nita, minie yang salapi ing metung at metung agpang king agyu na.

⁷Pepadala da la ring metipun a salapi king Pekapun a Paring i Jeoiakim, ing anak nang Hilkia at apu nang Salum. Migpadala la namang salapi karing aliwa pang pari at karing taung kayabe na karin king Jerusalem.

⁸Kanitang kapulung aldo ning bulan ning Sivan, kinua na lang Baruk ding kasangkapan a pilak a mesamsam king Templo at pepabalik na la king Juda. Deting kasangkapan ila ding pepagawa nang Zedekia a anak nang Aring Josias ning Juda

⁹kaybat neng abihag Aring Nebucadenesar i Jeoiakin, ding pamuntuk, ding magobra, ding nobling tau, at ding karaniwan a memalen ning Jerusalem, at dela na la Babilonia.

¹⁰Ngana ning sulat: Gamitan yu la deng peparala ming salapi para saling animal a kailangan king pamamie ain-a-durulukan at ain-a-kapamayaran-king-kasalanan, ing insenso, at ain-a-binutil. Idala yu la deti king altar ning Ginung kekatamung Dios,

¹¹at ipanalangin ye i Aring Nebucadenesar ning Babilonia ampon ing anak nang i Belsazar ban kumaba la bie anggang atyu ya ing banua.

¹²Kanita pasiknangan na katamu at patnubayan ning Ginu. Mibiebie tamu lalam nang upayang Aring Nebucadenesar at ing anak nang i Belsazar, at maging tapat tamu karela kabang bie tamu. Uli na niti, tumula la kekatamu at idipensa da katamu.

¹³Aduan mi munaman kekayu ing iyabe yu kami neng manalangin kayu king Ginung kekatamung Dios, uling mikasala kami at angga ngeni e pa milako ing mua na kekami.

¹⁴Basan ye king Templo iting librung parala mi kekayu at ikumpisal ing kasalanan yu king mumunang aldo ning Piesta da ring Dalungdung, at neng pagselebran yu ing aliwa pang mitakdang piesta.

¹⁵Anti kaniti ing sabian yu neng mangumpisal kayu: Makatuliran ya ing Ginung kekatamung Dios, oneng angga ngeni atyu tamu pa king makarine kabilianitamung memalen na ning Juda at Jerusalem,

¹⁶at pati na ding ari tamu, ding pamuntuk, ding pari, ding propeta, at ding makatua tamu

¹⁷uling mikasala tamu king Ginung kekatamung Dios.

¹⁸E ta la tiparan ding utus na; e tamu mekiramdam king Dios. E ta la tikian ding tuntunan a binie na kekatamu.

¹⁹Manibat na kanitang leko na la ning Ginu ding makatua tamu king Ehipto angga na king aldong iti, e tamu menatiling tapat at e meging mapamintu king Dios.

²⁰Kanitang malambat nang panaun, inyang leko na la ning Ginu ding makatua tamu king Ehipto ba neng ibie ing mabandi at matabang gabun, piniumpa na katamu king kapamilatan nang Moises. At ngeni misasakitan tamu uli da retang sumpang deta.

²¹Birian tamu ing e tamu mamintu karing amanu na ning Ginung kekatamung Dios a binie na kekatamu kapamilatan da ring propeta. Ing kaburian tamu ya ing tiparan tamu at e mayap ing depat tamu. Sinamba tamu karing aliwang dios at depatan tamu itang e na buring daptan tamu ning Ginu.