Read Kapampangan Baruch 3 Bible Online

Baruch 3 - Kapampangan bible

Baruch 3

¹O Ginung Mayupaya, Dios ning Israel, mamaus la keka ding katawan ming mibabayatnan at ding kaladua ming misasakitan.

²Pakiramdaman mu kami sana, O Ginu, at malunus ka kekami, uling mikasala kami keka.

³Ari ka king kapilan pa man, oneng ikami mawala kami.

⁴O Ginung Mayupaya, Dios ning Israel, pakiramdaman mu ing panalangin mi. Ala keng pangayaliwa karing mete. Mikasala la keka, O Ginung karelang Dios, ding makatua mi. E la memintu keka, at ikami ngeni ing misasakitan uli da ring depat dang kasalanan.

⁵Kalinguan muna sana ing depat dang kasalanan ding makatua mi king milabas a panaun; ing ganakan mu sana ngeni ya ing kayupayan mu at dangalan,

⁶uling ika ing Ginung kekaming Dios at purian da ka.

⁷Binili mu karing pusu mi ing takut keka ban manalangin ke keka. Keting kekeng pangayugse pupurian da ka uling gilutan mi la ding kasalanan da ring makatua mi.

⁸Atyu kami king pangayugse; kinalat mu kami karing aliwang bansa at pituya-tuya da kami ampon paniumpa. Paparusan mu kami, O Ginung kekaming Dios, uling mikasala la keka ding makatua mi.

⁹Makiramdam ka, O Israel, karing kautusan ning bie. Pakiramdaman mu la ban mabiasa ka.

¹⁰Israel, baket atyu ka king bansa ding kalaban mu? Baket metua ka king aliwang bansa? Baket meging marinat ka, agpang king relihiun mu, at mengaring mete?

¹¹Baket mibilang na kang mete?

¹²Uli na galang ning gilutan me ing sibul ning Kabiasnan?

¹³Nung tinuntun ka mu king dalan ning Dios, marahil mabibie kang payapa kabang panaun.

¹⁴Panintunan mu ing kabiasnan, ing sikanan, at ing beluan. Kanita mu abalu nung nukarin panintunan ing makabang bie, ing sala a matnube keka at ing kapayapan.

¹⁵Atin na waring menakit king tuknangan ning Kabiasnan o mekalub king pisisinupan na?

¹⁶Nukarin la ngeni ding pamuntuk da ring bansa? Nu la karin deting maglimbang king kapamilatan ning pamandakap malyap a animal at ayup?

¹⁷Nu la karin detang tinipun pilak at gintu a panaligan da ring tau, oneng kapilan man e masaya king atipun da?

¹⁸Nu la karin ding pande pilak a mapibabata at ing lihim ning mangagaling dang pangamat?

¹⁹Mete na la ngan at atyu na la king tuknangan da ring mete, at atin nang menalili karela.

²⁰Ating lintong bayung lahi a manuknangan king bansa. Ikit de ing sala ning aldo, oneng e re ikit ing dalan ning Kabiasnan. E ria munaman ikit ing dalan ning beluan, inya e re kimtan.

²¹Mebigu la namang anti ding pengari da.

²²E ria naman atagpuan ding Cananeo ing Kabiasnan at antimu rin ding Idumeo

²³agyang pang penintun de. E ria naman ikit ding anak nang Hagar at ding komersianti ning Meran at Teman. E ria naman ikit ding gagawang alamat at manialiksik king Kabiasnan.

²⁴O Israel, karagul na ning tuknangan ning Dios! Karagul na ning sasakupan na!

²⁵Ala yang angganan at e ya malyaring sukdan ing lapad na at katas.

²⁶Kanitang minunang panaun mibait la ding pikabaluan a lahing higant, maragul la at masikan ampon biasa king pamakilaban.

²⁷Oneng e na la pinili ning Dios o dininan kabiasnan.

²⁸Mete ya ing lahi ra uli na ning ala lang beluan; megisan la uli na ning kamangmangan da.

²⁹Atin nang mekaukiat king banua ban kumang Kabiasnan at kaybat ikuldas ne iti king biga?

³⁰Atin nang taung lipatan ne ing dagat ba neng panintunan o bayaran king ginto?

³¹Alang makibalu king dalan papunta king Kabiasnan o mekaisip nang paralan ban makalapit.

³²Bukud mung ing Dios ing makibalu king Kabiasnan. Atataruk na naman iti king kapamilatan ning pamanalastas. Ya ing linalang king yatu at mibili karing miyayaliwang animal.

³³Gagalgal ya at mamintu ing sala neng ausan ne. Lunto ya at sunlag ing sala potang utusan ne.

³⁴Inaus na la naman ding batuin at agad-agad lang mekibat, at migpuestu la karing lugal da ban paligayan de king kapamilatan ding aslag da itang linalang karela.

³⁵Ya at alang aliwa nune ing kekatamung Dios. Ala yang kalupa.

³⁶Ikit ne ing dalan papunta king Kabiasnan at tiru ne iti kang Israel a pakamalan na.

³⁷Linto ne manibat na kanita ing Kabiasnan at menuknangan yang kayabe da ring tau.