Read Kapampangan Baruch 5 Bible Online

Baruch 5 - Kapampangan bible

Baruch 5

¹Jerusalem, ilukas mu na ing imalan ning kalungkutan at kasakitan, at kaybat isulud mu ing maslag nang ligaya ning Dios.

²Ibalabal me keka ing balabal na ning hustisia ning Dios. Ibili me king buntuk mu ing korona na ning ligaya ning Alang Anggang Dios,

³uling ipakit na na ning Dios ing kekang kamalan king balang bansa ning yatu.

⁴King kapilan pa man mayaus kang: Ing Kapayapan a Bunga ning Katuliran at ing Kamalan a Bunga ning Katapatan king Dios.

⁵Jerusalem, talakad na ka at talakad babo ning bunduk. Lumawe ka king aslagan at king albugan uling king metung na mung amanu ning Bukud mung Banal mitipun la, at tumula la uling e no kelinguan ning Dios.

⁶Likuan da ka uling mebihag la karing kalaban at midalang maglakad mu king bansa ding kalaban da. Oneng ngeni, iyuli na la ning Dios at ning maragul nang tula. Mengari la king ari a makalukluk king tronu.

⁷Inutus na ning Ginu ing patagan ya ing balang bunduk at talimunduk, at tambunan la ding lubak-lubak a lugal ban ligtas lang makayuli ding memalen na ning Israel a kayabe ing ligaya ning Ginu.

⁸At king utus ning Ginu lunto la ding kagubatan at tanaman a mabanglu ban munie lang salilung karing memalen ning Israel.

⁹Muli lang kayabe ing maragul a tula ning kamalan na. Tairan na la ning Dios king lunus na at katuliran.