Read Kapampangan Bel and Dragon 1 Bible Online

Bel and Dragon 1 - Kapampangan bible

Bel and Dragon 1

¹Inyang mete ya at mikutkut i Aring Astiages, ing meging ari ya i Ciro ning Persia.

²Maralas neng kayabe ning ari i Daniel at lubus neng pagkatiwalan kesa karing aliwang tagapayu na.

³Atin lang sasamban a dios ding tau Babilonia at ausan deng Bel. Aldo-aldo dirinan deng labing aduang sakung mapinung arina, apat apulung tupa, at limang pulung galun a alak.

⁴Paniwalan na ning ari king tune yang dios i Bel at sasamban ne aldo-aldo. Oneng sasamban neng Daniel ing tune Dios.

⁵Inya ngana ning ari kang Daniel, Baket e me sasamban i Bel? Pekibat nang Daniel, E ku sasambang dios a gewa da mu ring tau; ing sasamban ku ya ing mabie Dios a linalang king banua at yatu at sasakup karing sablang tau.

⁶Ngana ning ari, Ing buri mung sabian e ya tune mabie dios i Bel? E mu wari akakit nung nu anti karakal ing kakanan na at inuman aldo-aldo?

⁷Mipakayli ya i Daniel at ngana, E kayu sana pailinlang, Makamal a Ari. Metung ya mung pila i Bel a belutanan dang tangsu, at ala yang nanumang kakanan o inuman.

⁸Mimua ya ing ari, inya pepayaus na la ding pari nang Bel. Ngana karela, Ipapate da kayu nung e yu sabian kaku nung ninu ing gigisan king pamangan a babie tamu.

⁹Nung apatunayan yu king i Bel ya ing mamangan, i Daniel ya ing ipapate ku, uli na ning sasabian nang i Bel e ya tune dios. At nganang Daniel, Ing buri yu ya ing matupad.

¹⁰Pitu lang pulu ding pari nang Bel; e la kabilang kareti ding asawa ra at anak. Minta ya ing ari at i Daniel king templo nang Bel.

¹¹Ngara ding pari nang Bel king ari, Makamal a Ari, lumual na kami; ikayu na ing mibili king altar nang Bel king pamangan at alak. Kaybat isara ye ing pasbul at tatakan ye king singsing yu.

¹²Nung king pamagbalik yu bukas abak akit yung e na gisan Bel ing pamangan at ing alak, paten yu kami; nung gisan na, i Daniel ya ing paten yu uling migsalita yang kalaraman tungkul kekami.

¹³E la tatakut mate ding pari uling atin lang lihim a pidadalanan king lalam ning lamesa. Karin la daralan at ila ding gigisan king miyain a pamangan at alak.

¹⁴Inyang meko na la ding pari nang Bel, binili na la ning ari ding ain a pamangan at alak king altar. Kaybat na nita, inutusan na lang Daniel ding ipus na king magdala lang dakal a abu at ikalat da king mabilug a templo nang Bel. Ing bukud menakit kaniti ya ing ari. Kayari da, meko la ngan; sera de ing pasbul at tetakan king singsing ning ari.

¹⁵Inyang bengi na, antimo ing sadia rang daraptan, linub la ding pari king templo a kayabe ding asawa ra at ding anak da king kapamilatan na ning lihim a pidadalanan. Gisan da ing sablang pamangan at ing alak.

¹⁶Kabukasan, migising yang maranun ing ari at i Daniel at minta la king templo.

¹⁷Kitang na ning ari, Daniel, mesira la ding tatak king pasbul? Pekibat nang Daniel, Ali la pu, Makamal a Ari.

¹⁸Kabuklat ning pasbul, ikit na ning ari king ala na itang mibili king lamesa. Inya nganang kinulisak, Sakdal ing degulan mu, O Bel! Keka alang pamaglinlang nanuman.

¹⁹Mipakayli ya i Daniel at ngana king ari, Bayu kayu lungub lawen ye pa ing suelu at lawan yu la ampon sabian nung kaninu la deng bakas a ren.

²⁰Ngana ning ari, Bah, bakas da la ring lalaki, babai at anak deti!

²¹Kanita mimua ya ing ari at peparakap na la ding pari, ding asawa ra, at ding anak da. Tiru de king ari ing lihim a sadia rang pidadalanan ban milub la king templo at kanan ampon inuman ing sablang atyu king altar nang Bel.

²²Uli na niti, pepapate na la ngan ning ari at binie ne kang Daniel ing rebultu nang Bel, at ya naman pinyira ne ing kikilalanan dang dios at pepalasak ing templo nang Bel.

²³Atin munamang metung a maragul a dragon a sasamban da ring tau Babilonia.

²⁴Ngana ning ari kang Daniel, E mu malyaring asabi kanaku king e ya dios a mabie, inya sukat meng samban.

²⁵Oneng pekibat nang Daniel, Ing sasamban ku ya ing Ginu, ing kanakung Dios, uling Dios yang mabie.

²⁶At nung dinan yu kung kapaintulutan, O Makamal a Ari, paten ke iting dragon agyang e ku gumamit espada o palupalu. Ngana ning ari, Sulung, paintulutan da ka.

²⁷Inya i Daniel kinangwa yang alketran, taba ampon buak at saka na piyabe-abe at gewa na lang bibingka. Kaybat, pepakan na la ding bibingka king dragon. Pengan na la, meragul ya atian; memakbung ya at misambulat. Kanita nganang Daniel, Makamal a Ari, oyan ing kekayung sasamban!

²⁸Inyang abalitan da ring tau Babilonia ing milyari, mimua la at mitipun la ban sabian king ari ing e ra buri. Ngarang kinulisak, Meging Judio ya ing ari! Piglaso ne i Bel at pepapate ding pari. Ngeni naman pepapate ne ing dragon!

²⁹Pintalan de ing ari at inawad king isuku ne karela i Daniel. Ngara, Makamal a Ari, nung e ye isuku, paten da kayu at ing mabilug yung pamilya!

³⁰Inyang akit ning ari king e la makibiru king sinabi ra, mepilit yang isuku ne karela i Daniel.

³¹Dela re i Daniel at inugse king kulungan da ring leon. Menatili ya karin kilub ding anam a aldo.

³²Ating pitung leon ketang kulungan a ita; aduang tau at aduang tupa ing papakan da karela aldo-aldo. Oneng kilub da ring anam a aldong deta e da la bitasang dininan pamangan ding leon ban i Daniel ya ing karelang kanan.

³³King panaun a ita, ating metung a propeta king Juda; Habakuk ing lagyu na. Miglutu yang gule at semutanan nang pirapirasung tinape. Inyang papunta ne king marangle ban iyatad ing linutu na para karing taung papalut,

³⁴migsalita ya ing anghel ning Ginu. Ngana, Habakuk, iyatad mu kang Daniel ing daralan mung pamangan a yan. Atyu ya karin Babilonia, king kulungan da ring leon.

³⁵Nganang tinutul, Makamal, e ku pa bitasang mekapunta Babilonia at ala kung balu tungkul king kulungan da ring leon.

³⁶Telanan ne buak ning anghel i Habakuk; inalsa ne at anti ing mabilis a angin dela ne king Babilonia at binili ne siping ning kulungan da ring leon.

³⁷Karas na, nganang minaus, Daniel, Daniel! Oyni ing pamangan a pepadala na ning Dios para keka. Kuanan mu.

³⁸Nganang Daniel, O Dios ko, salamat e mu ku kelinguan; tune e mu la kakalinguan detang malugud keka.

³⁹Tinalakad ya; kinua na ing pamangan at mengan ya. At kanita mu rin binalik ne ning anghel na ning Dios i Habakuk ketang lugal a ibatan na.

⁴⁰Kalabas na ning pitung aldo, minta ya ing ari ketang kulungan da ring leon ban panangisan ne i Daniel. Sinilip ya at ikit neng makalukluk i Daniel.

⁴¹Mipakulisak yang masikan ing ari. Ngana, Tune sakdal ka kamalan, O Ginu at Dios nang Daniel. Ala nang Dios nung e mu ika!

⁴²Inya liwal ne i Daniel king kulungan, at detang bisang makamate kang Daniel ilang pepayugse na karing leon. Kanita mu rin, king akakit na ning ari, ding leon piglapak da la't pengan.