Read Kapampangan Obadiah 1 Bible Online

Obadiah 1 - Kapampangan bible

Obadiah 1

¹Iti ya ing ula nang Obadias, ing sinabi na ning Ginung Dios tungkul king bansang Edom. Tinubud ne ning Ginu ing talapamalita na karing bansa, at dimdam ming sinabi na: Magsadia na kayu! Tara, kekatamu neng labanan ing Edom!

²Ngana ning Ginu king Edom, Ilako da ka sikanan; ding bansa ika ing karelang insultuan.

³Pirait na ka ning kekang ketasan. Ing pagmaragul mung balen metung yang kuta a gewa karing batu, atyu karing matas a bunduk ing kekang tuknangan, inya king sarili mu kekang sasabian, Ninu mo ing misaldak kaku?

⁴Agyang matas ya pang anti king sale ning agila ing kekang tuknangan angga king balamu atyu libutad da ring batuin, makanyan man agyu da ka ring ibaba. fig,...makanyan man agyu da ka ring ibaba.,(4)fig*

⁵Neng daratang la ding mapanako king kabengian, kakuanan da mu itang karelang kailangan. Neng mamupul lang ubas ding tau, atin la pa mu ring tatagan. Oneng ding kekang kalaban ganap da kayung gisan.

⁶Lahi nang Esau, ing kekong pibandian ikua na nang mesamsam.

⁷Pirait da kayu ding kekong kakampi; king lual ning kekong bansa karin da kayu tinabi. Ding taung keyabe yu king kapayapan karela kayu ngeni makapailalam. Detang kakaluguran a kesulu yung mengan bitag ya ing kekayu ra inumang; tungkul kekayu karelang sasabian, Nukarin ngeni ing sabla rang kayalistuan?

⁸King aldo a parusan ke ing Edom, kaku lang gisanan ding alistu nang lalaki, at kakung ilako ing sabla rang kabiasnan.

⁹Mitakutan la ngan ding matapang nang lalaki ning Teman, at sundalus ning Edom mate la ngan.

¹⁰Uling keka lang pete at penakawanan ding kekang kapatad a lahi nang Jacob, malasak ka at milako dangalan angga na king kapilan man.

¹¹E ka bitasang kinimut kanitang kayaldawan a ding kalaban piglasak do ring karelang pasbul siudad. Kalupa da ka namang e mayap detang dayuan a sinamsam king pibandian ning Jerusalem, at kaybat karelang pipartian-partian.

¹²Sukat sanang e ka metula king kakulangan palad a digpa karing kapatad mu king Juda. Sukat sanang e ka mesaya king aldo ning karelang kapahamakan. Sukat sanang e mo keylian king karelang kalipitan. fig,Sukat sanang e ka metula...,(12)fig*

¹³Sukat sanang e ka linub king siudad ding kakung memalen ban kaylian ing karelang kasakitan, at samsaman ing karelang pibandian king aldo ning karelang kagipitan.

¹⁴Sukat sanang e ka tinalakad karing pikurusan da ring dalan ban keka lang pandakpan detang migkapilit makatakas muman. Sukat sanang e mo dinuang karing gamat da ring kalaban king aldo ning karelang kaguluan.

¹⁵Malapit na ing kayaldawan nung kapilan, aku, ing Ginu, bansa kaku la ngan ukuman. Edom, itang kekang depat, ya naman ing keka marapat. Itang binie mu keka magbalik pasibayu.

¹⁶Ininum de ring kakung memalen ing mapait nang kopa ning kaparusan karin king banal kung bunduk-bundukan. Oneng ding sablang bansang makapadurut inuman de ing lalung mapait a kopa ning kaparusan; gisanan deng aldukan at mawala la ngan.

¹⁷Oneng ating mapilan a makatakas king Bunduk ning Zion, at iti maging banal yang lugal. Abandi de ring memalen nang Jacob ing bansang karelang pangaintuliran.

¹⁸Maging anti la king api ding memalen nang Jacob at Jose; anti ing aping duruluk king pipalutan memalen nang Esau karela yang siran. Karing lahi nang Esau alang mitagan. Aku, ing Ginu, ing mengamanu.

¹⁹Ding tau king dane mauli ning Juda ilang sumakup king Edom; detang king bulubundukan dane ning albugan ing Filistia yang karelang bihagan. Ding Israelita karela yang bandian ing sakup ning Efraim at Samaria; ding memalen ning Benjamin ing Gilead yang karelang kuanan.

²⁰Ding sundalus a miyugse ning dane norti ning Israel magbalik la, at sakupan de ing Fenicia angga na king norti ning Zarepat. Ding miyugse memalen ning Jerusalem a atyu Sardis bihagan do ring balen ning dane mauli ning Juda.

²¹Ding matagumpe lalaki ning Jerusalem lusuban de at pamahalan ing Edom. At ing Ginu mismu ya ing maging karelang ari.