Read Kapampangan Numbers 1 Bible Online

Numbers 1 - Kapampangan bible

Numbers 1

¹Kanitang mumunang aldo ning kadua nang bulan ning kaduang banua kaybat dang meko ring Israelita king Ehipto, migsalita ya ing Ginu kang Moises king Toldang tuknangan ning Ginu karin king Disyerto ning Sinai. Ngana,

²Moises, ika at i Aaron gawa kayung metung a sensus karing memalen na ning Israel agpang king karelang pamilya at lahi. Ilista yu la ngan a lagyu ding lalaking

³maki idad nang aduang pulung banua o migit kanita. Iyabe yu la karing sundalus yu detang malyaring makilaban karing kalaban.

⁴Pakisabian me ing balang metung a pekapun da ring pamilya ning balang tribu ban sumaup king pamangawang sensus.

⁵Oreni ding lagyu da ring lalaking makasaup keka: i Elizur a anak nang Sedeur ning tribu nang Ruben;

⁶i Selumiel a anak nang Zurisadai ning tribu nang Simeon;

⁷i Nason a anak nang Aminadab ning tribu nang Juda;

⁸i Netanel a anak nang Zuar ning tribu nang Isacar;

⁹i Eliab a anak nang Helon ning tribu nang Zebulun;

¹⁰at karing apu nang Jose kang Efraim, i Elisama a anak nang Amiud; at kang Manase, i Gamaliel a anak nang Pedazur;

¹¹i Abidan a anak nang Gideoni ning tribu nang Benjamin;

¹²i Aiezer a anak nang Amisadai ning tribu nang Dan;

¹³i Pagiel a anak nang Ocran ning tribu nang Aser;

¹⁴i Eliasaf a anak nang Deuel ning tribu nang Gad,

¹⁵at i Aira a anak nang Enan ning tribu nang Neftali.

¹⁶Ila deti ring mepiling pekakatawan at pamuntuk ding sarasarili rang pamilya at tribu.

¹⁷Ila deti ring akayabe da ri Moises at Aaron king pamagsensus.

¹⁸Inyang mumunang aldo na ning kaduang bulan tinipun da la ring sablang Israelita. Linista da la lagyu ring sablang lalaking atyu na king idad a aduang pulung banua at paitas, agpang king sarasarili rang pamilya at tribu.

¹⁹Merapat iting pamagsensus king Disyerto ning Sinai, agpang king inutus ning Ginu. Iti ing meging bunga na ning pamagsensus:

²⁰king tribu nang Ruben, ing pangane anak nang Israel,

²¹apat lang pulu't anam a libu at limang dalan;

²²king tribu nang Simeon,

²³lima lang pulu't siam a libu at atlung dalan;

²⁴king tribu nang Gad,

²⁵apat lang pulu't limang libu at anam a ralan limang pulu;

²⁶king tribu nang Juda,

²⁷pitu lang pulu't apat a libu at anam a ralan;

²⁸king tribu nang Isacar,

²⁹lima lang pulu't apat a libu at apat a ralan;

³⁰king tribu nang Zebulun,

³¹lima lang pulu't pitung libu at apat a ralan;

³²king tribu nang Efraim,

³³apat lang pulung libu at limang dalan;

³⁴king tribu nang Manase,

³⁵atlu lang pulu't aduang libu at aduang dalan;

³⁶king tribu nang Benjamin,

³⁷atlu lang pulu't limang libu at apat a ralan;

³⁸king tribu nang Dan,

³⁹anam lang pulu't aduang libu at pitung dalan;

⁴⁰king tribu nang Aser,

⁴¹apat lang pulu't metung a libu at limang dalan;

⁴²king tribu nang Neftali,

⁴³lima lang pulu't atlung libu at apat a ralan.

⁴⁴Ila deti ring lalaking milista king sensus a gewa da ri Moises at Aaron a seupan da ring labing aduang pamuntuk a pekakatawan da ring balang tribu.

⁴⁵Ing kabilugan dang bilang, manibat king idad a aduang pulu at malyari nang makilaban king gera:

⁴⁶anam a ralan atlung libu at limang dalan limang pulu.

⁴⁷E la kayabe keting sensus ding pamilya at lahi na ning tribu nang Levi,

⁴⁸uling sinabi na ning Ginu kang Moises,

⁴⁹E mu la yayabe king sensus na ning Israel ding Levita.

⁵⁰Ila ring tulduan mung manibala king Toldang tuknangan ku, ing Ginu, at karing kasangkapan na. Ila ring maging talapagdala kareti ngan at manuknangan la lele na niti.

⁵¹Ila ring kalag at mitalakad king Tolda nukarin kayu man munta. Paten ya ing ninumang e karapatdapat a lumapit king Toldang tuknangan ku, ing Ginu.

⁵²Mitalakad lang tolda ding aliwang memalen na ning Israel agpang king grupu ning sarili dang kampu lalam ning sarili rang bandera.

⁵³Pero magkampu la ring Levita king makapadurut na ning Toldang tuknangan ku, ing Ginu, ban aguardia re. Ala kanitang milapit ban e dugpa ing mua ku, ing Ginu, karing memalen na ning Israel.

⁵⁴Inya tiparan da ngan ding memalen na ning Israel ing sablang inutus na ning Dios king kapamilatan nang Moises.