Read Kapampangan Numbers 11 Bible Online

Numbers 11 - Kapampangan bible

Numbers 11

¹Migreklamu la king Ginu ring memalen na ning Israel uli na ning kasakitan a delanan da. Inya mimua ya karela ing Ginu. King mua na karela pepauran yang api, at digpa king metung nang maragul a dake ning lugal nung nu la migkampu.

²Migpakalunus la kang Moises at ya naman menigapu ya king Ginu, at mitda ing api.

³Inya ing lugal a ita meyaus yang Tabera, uling karin na la silaban ning aping peparala na ning Ginu.

⁴Ating miyayaliwang dayuan a mekiabe king pamaglakbe ra ding Israelita. Miras ing panaun a sabik lang mangan king karning sadia rang kakanan at antimu rin ding Israelita. Inya migreklamu no naman ding Israelita. Ngara, Sana atin tamung karning apangan!

⁵Masanting pa king Ehipto uling karin makapangan tamung asan, pipinu, pakwan, leek, sibuyas, at bawang anggang bisa tamu.

⁶Oneng meyayat ta na keti uling ala tamung akakit ampon apapangan nune mu iting manna. (

⁷Kalupa ne ning butul kulantru ing manna at kakule ne ning bedelio.

⁸Iti ya ing lululualan dang pupulutan ding Israelita, at gigilingan da o kaya daraldakan king asung. Kaybat gawan dang maimpis a bibingka. Potang malutu na lalasang tinape linutu king larung olibo.

⁹Kayabe nang mababaldug ning ambun ing manna neng bengi.)

¹⁰Dimdam nang Moises ing reklamu rang maki tangis ding tau at ding pamilya ra kabang makatalakad la arapan da ring sarasarili dang toldang tuknangan. Meligalig ya i Moises uling mimua ya ing Ginu kareting tau.

¹¹Inya kitang na king Ginu, Obat sinubu yu ku kaniting maragul a pakibatan karing tau? Nanu waring kasalanan ku ba't kakanianan yu ku?

¹²Aku wari ing ima ra? Aku wari ing makipasari king pangalto ra keti king yatu ban ingatan ku la at kilikan anting anak a pasusuan angga king miras la king gabun a pengaku yung ibie karing pipumpunan da?

¹³Nukarin ku kumang karni ban ipakan kareting tau? E ra ku patugutan guguluan a buntuk. Ngara, Dinan mu keng karning apangan mi!

¹⁴E ku na la agyung lingapan magdili-dili. E na ku malyaring makapibata pa karela.

¹⁵Nung makanyan mu rin ing tratu yu kanaku, mayap pa ing paten yu na ku ngeni mu rin ban milako na kanaku ing kapahamakan. fig,E ku na la agyung lingapan magdili-dili.,(11:14)fig*

¹⁶Ngana ning Ginu kang Moises, Pamili mu kung pitung pulung lalaki karing makatua ning Israel a balu mung kikilalanan dang manimuna at gagalangan da ring tau. Kaybat ituki mu la karin king Toldang tuknangan ku.

¹⁷Tipa ku at makipagsalita ku keka karin. Kuma ku king espiritung binie ku keka at ibie ku karela ban e ka magdili-diling magobra.

¹⁸At sabian mu karing Israelita ing magsadia la uling bukas makapangan na lang karni. Sabian mu karela king aku, ing Ginu, dimdam ku ing karelang reklamu at ing kapagnasan dang makapangan karni antimo inyang atyu la king Ehipto. Dinan ku lang karni at makapangan na la.

¹⁹E mu bukas o makadua o kilub ding limang aldo o apulu o aduang pulu,

²⁰nune pabulan angga king manyuka la at masumami uling sikuil da ku, ing Ginu, agyang patnubayan ku la. At kikiak dang sinabi king mayap pa kanu ing e ku la leko king Ehipto.

²¹Nganang Moises king Ginu, Anam lang dalan a libu ring taung maglakbe panimunan ku, at sinabi yu king dinan yu lang apangan dang karni kilub ning pabulan.

²²Agyang pang paten la ngan ding tupa at baka at dakpan ding sablang asan king dagat, makanyan man e la pa mu rin makagyu deti kareting tau!

²³Ngana ning Ginu kang Moises, Atin waring e ku arapat? Ngeni akit mu nung tutu o e tutu ing sinabi ku.

²⁴Inya meko ya i Moises at sinabi na karing tau itang sinabi na ning Ginu. Memili yang pitung pulung manimuna karing Israelita, at pepatalakaran na lang makapadurut king Toldang tuknangan ning Ginu.

²⁵Kaybat tinipa ya king biga ing Ginu at migsalita ya kang Moises. Kinangwa ya ketang espiritung binie na kang Moises at binie na karing pitung pulung manimuna. Inyang tinggap de ing espiritu, megumpisa lang migsalitang anting propeta, oneng ita e naman migluat.

²⁶Ating aduang makatua a menatili king kampu; ila ri Eldad at Medad. Kayabe da la ring pitung pulung manimuna a mepili, oneng e la tinuki karela king Toldang tuknangan ning Ginu. Makanyan man midinan la king espiritu at memagsalita lang anting propeta.

²⁷Ating metung a kayanakan a lalaki a pupulaying linapit kang Moises. Ngana, I Eldad pu at i Medad magsalita lang anting propeta king kampu.

²⁸Kanita nganang Josue, ing anak nang Nun a kayaduangan nang Moises at metung karing pinili nang lalaki, Makamal a Moises, iyutus yu karela ing tuknang lang magsalita.

²⁹Nganang Moises, Pigaganakan mu ing mabawas ku dangalan? Nung malyari mu sana midinan la king espiritu ding sablang Israelita ban magsalita lang anting propeta!

³⁰Kaybat na nita, mibalik ya king kampu i Moises at ding pitung pulung manimuna na ning Israel.

³¹At tiniup ing angin a peparala na ning Ginu at migdala yang dakal a pugu a ibat king lipat ning dagat. Susulapo lang manga atlung talampakan king katas king gabun. Digpa la king kampu at king paligid nang mamabut dakal a kilometru king miyayaliwang lugal.

³²Inya king aldong ita, angga na king miras ing kabengian, ala lang gewa ring Israelita nune mu ing mandakap pugu. Makanyan munaman ing depat da itang kabukasan. Apulung kaing a pugu ing pekamaritak nang diling arakap ning metung a tau. Dinaing da la at bilad king paligid na ning kampu.

³³Oneng bayu da la apangan, meragul na ing mua na ning Ginu karing Israelita, at pete na la king kapamilatan na ning makapangilabut a sakit a peparala na.

³⁴Inaus deng Kibrot Hattaava ing lugal a ita uling karin la mikutkut ding taung mete king pamagnasa rang makapangan karni.

³⁵Ibat karin king Kibrot Hattaava miglakbe la ring Israelita papunta king Hazerot at karin la migkampu. fig,...mandakap pugu.,(11:32)fig*