Read Kapampangan Numbers 12 Bible Online

Numbers 12 - Kapampangan bible

Numbers 12

¹Mipagsalita la ri Miriam at Aaron; ing pipagsalitan da laban kang Moises uli na ning ing asawa na tau ya Cus.

²Ngara, Bukud mu waring kang Moises ya migsalita ing Ginu? E ya wari migsalita munaman kekata? Dimdam ning Ginu ing pamipagsalita ra.

³Tau yang tutung mapagpakumbaba i Moises; mababa yang dili lub karing tau keti king yatu.

⁴Kabud-abud migsalita ya ing Ginu kari Moises, Aaron, at Miriam. Ngana karela, Ikayung atlu, munta kayu karin king Toldang tuknangan ku. Inya minta la ilang atlu.

⁵Tinipa ya at minta munaman karin ing Ginu king kapamilatan na ning asias a biga, at migpuestu ya arap ning pasbul. Inaus na la ri Aaron at Miriam. At inyang milapit na la,

⁶ngana ning Ginu, Makiramdam kayu king sabian ku. Nung ating propeta libutad yu, pakit ku keting propeta king kapamilatan na ning vision at pakipagsalitan ke king kapamilatan na ning paninap.

⁷Oneng e makanyan ing daraptan ku king talasuyu kung i Moises a pepamahalan ku karing memalen ku.

⁸Makipagsalita ku kang Moises arap-arapan, tapatan, at e king malabug a pamakipagsalita. Ikit na ing itsura ku. Inya ala kayung matulid magsalitang laban king talasuyu kung i Moises.

⁹Mibua ing mua na ning Ginu kari Aaron at Miriam; kaybat na nita likuan na la.

¹⁰Meko ya ing biga king tulid ning Toldang tuknangan na ning Ginu. Kaybat na nita, mika sakit yang lepra i Miriam; meputi ya balat. Mengilabut ya i Aaron inyang ikit neng ating lepra i Miriam.

¹¹Ngana kang Moises, Gagalangan da ka at ipakisabing kung mayap king e mu sana paintulut ing miparusan kami uli na ning kamangmangan mi at kasalanan.

¹²E mu sa paburen ing maging anti yang mete ing kapatad ta a laso na kapitna nang katawan inyang ibait neng ima.

¹³Inya menigapu ya i Moises king Ginu. Ngana, O Dios, ipakisabi kung mayap keka king pakayapan me sana i Miriam.

¹⁴Nganang mekibat ning Ginu, Nung liran ne lupa ning tata yu i Miriam, e ya wari mipakarine at salikut pitung aldo? Paburen me king lual ning kampu kilub ding pitung aldo at kaybat na nita malyari neng lungub.

¹⁵Inya atyu ya i Miriam king lual ning kampu kilub ding pitung aldo, at e la miglakbe ring memalen na ning Israel anggang e ya mekapagbalik king kampu.

¹⁶Kaybat na nita, meko na la king Hazerot, at miras la ampon migkampu king ilang ning Paran.