Read Kapampangan Numbers 14 Bible Online

Numbers 14 - Kapampangan bible

Numbers 14

¹Inya kabukas yang menangis ing balen ning Israel.

²Magreklamu ya ing metung at metung karing Israelita laban kang Moises at Aaron. Ngara, Mayap pa ing mete ta na king Ehipto o kaya mate keti king ilang!

³Obat darala na kata pa mu ning Ginu king gabun a ita? Ban paten da katamu mu ring tau karin at mabihag la ring asawa tamu at anak? Mas masanting pa ing mibalik ta na Ehipto.

⁴At ngara king metung at metung, Mamili tamung metung a manimuna kekatamu king pamagbalik Ehipto.

⁵King arapan da ring memalen na ning Israel, migsakab ya king gabun i Moises at i Aaron.

⁶I Josue, ing anak nang Nun at i Caleb, ing anak nang Jefune, ginabak da ing susulud dang imalan uli na ning lungkut. Kayabe la karetang ispia a minta king Canaan.

⁷Ngarang migsalita ri Josue at Caleb karing memalen na ning Israel, Ing gabun a pintalan mi at selugsugan tune yang masanting a gabun.

⁸Nung tumula ya kekatamu ing Ginu idala na katamu karin at ibie ne kekatamu. Gabun yang mataba at labis-labis king kabiayan.

⁹Mu pin, e ya sukat lalabanan ing Ginu at e tamu sukat mitakutan karing taung manuknangan karin at sambutan ta la. E la masikan. E tamu sukat mitakutan karela uling kayabe ta ya ing Ginu; simbut na la ning Dios tamu ding kikilalanan dang dios.

¹⁰E la meniwala ding memalen na ning Israel at belan da lang pamasibasan batu ri Josue at Caleb angga king mate la. Kanita ing masalang aslag na ning panga-atyu ning Ginu sinlag babo na ning Toldang tuknangan ning Ginu.

¹¹Ngana ning Ginu kang Moises, Kapilan la tuknang maninsultu kanaku deting tau? Angga kapilan la manatiling e maniwala kanaku agyang dinapat kung dakal a milagru para karela?

¹²Paten ku la king kapamilatan na ning salut a ipagpa ku karela. Ilako ku ing mana ra, oneng ika gawan da kang tata na ning metung a bansa at mas mayupaya kesa karela.

¹³Nganang Moises king Ginu, Nung yan ing gawan yu siguradung abalitan da ring tau Ehipto. Balu da ring tau Ehipto king liwal yu la Ehipto ring Israelita king kapamilatan na ning upaya yu,

¹⁴at paniabian da karing sablang taung manuknangan keti ing sinabi yung daptan karing Israelita. Balu da na ring taung e Israelita king atyu kayu libutad mi at pepakit kayu kekami lupa't lupa, makatalakad ya babo mi ing biga yu, at manimuna kayu kekami king kapamilatan na ning asias a biga neng aldo at ning asias a api neng bengi.

¹⁵Nung paten yu la deting tau sabian da ring bansa nung nu kayu pikabaluan

¹⁶king inya pete yu la king disyerto ding memalen yu uling e yu la agyung idala king gabun a pengaku yung ibie karela.

¹⁷Inya manigapu ku kekayu, Ginu, ipakit yu ing maragul yung upaya at tuparan itang pengaku yu inyang sinabi yu,

¹⁸E ku agad mimimua, ing Ginu, at labis-labis ampon e kukupas ing lugud ku; patawaran ku ing kasalanan at ing kapanialangsangan. E ku la payalang sala ding mikasalang pengari at parusan ku la ding anak da angga king katlu at kapat a lahi.

¹⁹Patawaran yu la sana, Ginu, ding memalen yu king kasalanan da, agpang king degulan na ning e kukupas yung lugud, antimo ing pamamatawad yu karela manibat na inyang likuan de ing Ehipto.

²⁰Nganang mekibat ning Ginu, Patawaran ku la uli na ning pamakisabi mung mayap.

²¹Oyni ing tandanan yu: nung makananung aku mabie ku at kakatmuan ing yatu king panga-atyu ku

²²ala metung man kareting taung menakit king upaya ku at ding bage pagmumulalan a depat ku king Ehipto at king disyerto at paulit-ulit maniubuk kanaku at e bisang makiramdam kanaku

²³ing milub king gabun a pengaku kung ibie karing makatua da. Alang miras karin metung man kareting minyakuil kanaku.

²⁴Makayaliwa ya karela i Caleb a talasuyu ku. Tapat ya at memintu ya kanaku. Inya miras ya king gabun a pintalan na at maging bandi de ring lahi na.

²⁵Manuknangan la king kapatagan ding Amalekita at Cananeo, inya bukas magbalik kayu king ilang at tukian ya ing direksyun papunta king Dagat da ring Timbu.

²⁶Ngana ning Ginu kari Moises at Aaron,

²⁷Angga kapilan la magreklamu laban kanaku deting e mayap a memalen na ning Israel? Bubulung lang bubulung laban kanaku.

²⁸Sabian yu karela king aku, ing Ginu, itang dimdam kung sasabian da ya naman ing daptan ku karela.

²⁹Mate kayu at mikalat la ding bangke yu king ilang, ikayung mebilang king sensus, ikayung migreklamu laban kanaku, ikayung kayabe karing mebilang manibat king idad aduang pulung banua.

³⁰Ala metung man ing miras kekayu king gabun a pengaku ku, subali mu kang Caleb a anak nang Jefune at i Josue a anak nang Nun; ila mu ring miras karin.

³¹Sinabi yu king mabihag la ring anak yu, pero ali la uling ilub ku la karin king gabun a kekayung sikuil at karin la manuknangan.

³²Oneng ikayu, mate kayu keti king ilang.

³³Magdurut-durut la king ilang ding anak yu kilub ding apat apulung banua at dumalan lang kasakitan uli na ning keyalan yung katapatan kanaku. Miyangganan mu ing kasakitan yu potang mate ya ing katataulian a tau kekayu.

³⁴Apat apulung aldo yeng selugsugan ing gabun a mipangaku, inya naman apat apulung banua kayung magdusa ban panamdaman yu ing e ustung depat yu kanaku. Ing metung a aldo katumbas ne ning metung a pabanuang dusa.

³⁵Aku, ing Ginu, sasabian ku king daptan ku iti karing sablang e mayap a memalen na ning Israel a misanmetung laban kanaku. Mate la ngan keti king ilang.

³⁶Ding apulung lalaking tinubud nang Moises ban salugsugan ya ing gabun a mipangaku at kaybat minie lang ulat a e tutu karing memalen ya ing pepasari king pamagreklamu da ring tau laban king Ginu.

³⁷Inya mete la king salut a peparala na ning Ginu.

³⁸Pero e ya mete i Josue a anak nang Nun at i Caleb a anak nang Jefune.

³⁹Tutu lang melungkut ding memalen na ning Israel inyang sinabi nang Moises karela itang sinabi na ning Ginu.

⁴⁰Itang kabukasan migising lang maranun at minta la king babo na ning bunduk-bundukan. Kaybat ngarang sinabi, Makasadia na kaming munta king gabun a pengaku na ning Ginu. Tatanggapan mi ing mikasala kami.

⁴¹Nganang Moises karela, Nung makanyan, obat angga ngeni e ye pa pamintuan ing Ginu? E kayu magtagumpe!

⁴²E yu na susulung ing buri yu; masambut kayu mu karing kalaban yu, uling ala yu kekayu ing Ginu.

⁴³Atyu la karin ding Amalekita at ding Cananeo at manenaya la ban makamate kekayu. E na kayu pakiabayan ning Ginu, uling sikuil ye.

⁴⁴Sinulung la mu rin agyang ala yu karela ing Kaban ning Kasunduan na ning Ginu at e kayabe i Moises.

⁴⁵Kanita ding Amalekita at ding Cananeong manuknangan karin lisuban da la at simbut ding Israelita at penagal angga king Horma.